Job 36 - Old Testament Quechua Wanca（QVW）

Eliumi Tayta Diospa sumä cayninpïta liman

1Nilculmi Eliu caśhanñatac nin:

2“Uchuyllacta alcaycamay, yaćhaycälichinacpä;

Tayta Diospa allinnincunapi niycunacpä maychicalämá cacuyan.

3Sumä yaćhaśhätamá licaycachishayqui;

camamäní tincüninman licaycü caśhantamá camalaycachishayqui.

4Yaꞌapa limaynïćhuꞌa manamá ima casquillapis caycunchu;

ñawpäniquićhuꞌa sumä yaćhayniyücämá cayan.

5“Má, Tayta Diosꞌa sumä munayniyu cayalpis manamá mayantapis ipanchanchu.

Payꞌa sumä yaćhayniyu calmari imactapis tuquicta tantiaycun.

6Mana allin nunacunäta cawsayniyüta manamá caćhaycunchu;

ñacaycunaćhu cäcunätam ichá tincüninman-cama yanapaycun.

7Allin nunacunätá ñawillanćhu caycachilmi,

mandacücunäpa dispächunmanlä taycaycachin,

jinaman wiña-wiñaypä altumanlä juluycunpis.

8“Masqui cadinawan cadinäśha cayaptinpis,

llaquicuywan ćhänachicüśha cayaptinpis,

9ima mana allin lulaśhancunactam Tayta Diosꞌa licaycachin.

Puydïtucü caśhancunawan juchapacuśhantamari licaycachin.

10Wanaculcänanpämá limapaycun;

mana allincunäta caćhaycunanpämá anyapaycun.

11Sïchuśh paycuna uyaliculcal sirbipäcuptinꞌa,

wañunancama allinmi caycälinꞌa;

wañunancama cushishallam caycälinꞌa.

12Mana cäsuculñatacmi ichá ispädawan camacaycüśha canꞌa;

mana tantiaculmi wañuycäman ćhanꞌa.

13“Ishcay cära nunacunaca piñacuyllactam śhunꞌunman ćhulapäcun.

Mućhuycachiptinpis manam ayaculcanchu yanapaycunallanpäpis.

14Paycuna müsullalämi pinꞌayćhu wañupäcun,

chay millachicuy waticacuycunaćhu lulapäcuśhanpïta.

15Ñatac ñacäcunätá ñacayninpam libraycun;

sasachacuyninpam tantiaycachin.

16“Canan am Jobtapis mana allincunäpi libraycuytam munayüśhunqui,

allin jawca cawsayman ćhaycachishunayquipä,

allin micuycunacta taliycachishunayquipä.

17Ñatac juchayu mana allin nunacunaca

mućhuchisha caśhannümari ampis mućhuycachisha cayanqui.

Chaymari cäraycuśha mućhuycachisha cayca ćhänalayächishunqui.

18Chayurá licacuy, ima cäniquicunawanpis ama apachicuyaychu;

yanꞌalpi ima ćhasquiyniquiwanpis ama apachicuyaychu.

19¿Maynu üruyquipis, cäniquipis,

munayniquipis ñacayniquita manalcachishunquichun imamá?

20Tutaca ćhämunanpi ama wañupacuyaychu;

nunacunaca chincacuśhancäćhu caypïta amaña wañupacuyaychu.

21Chayurá mana allincäpïta licacuy.

Cay ñacayta tantiacunayquipämari uycuśhulanqui.

22“Má, Tayta Diosꞌa sumä munayniyümá.

¿Paynuꞌa mayan yaćhachicüllapis canmanchun imatá?

23¿Mayanmá imallacta lulananpäpis niycunman?

¿Pimá ‘mana allintam’ lulayanqui niycunmanpis?

24Lluy lulaycuśhancunapi jinantin nunacunämá alawapäcun;

ampis alawayta yalpaćhacuyꞌari.

25Chaycunacta lluy nunacunämari licapäcun;

masqui calullapïtapis licapäcunmá.

26“Licayꞌari, Tayta Diosꞌa sumä jatu-jatunmá;

tantiayta manamari atipanchicchu,

nï ayca watayu caśhantapis fintayta atipanchicchu.

27Paymi altuman śhullicta juntuycul,

yacuman muyulcachil tamyachimun.

28Pucutaycäpïmi yacuca śhutumun;

cay pachämanmi sumä talliypa tallimun.

29¿Pucutayca imanuypa maśhtacacuśhanta mayanmá yaćhan?

¿Räyuca maypi waclimuśhantapis mayanmá yaćhan?

30Tayta Diosmi waclinta lamar jananman maśhtaycun;

lamarcunäpa lulintañatacmi ichá pacaycun.

31Chaycunawanmi cay malcacunäta Tayta Dios licaycun;

jinaman micuypa janallanćhümi nunacunäta caycachin.

32Räyucta maquinćhümi uywaycun;

mayman ćhänanpä niycuśhancämanmi ćhaycunpis.

33Tamyamunantamá waclica willacun;

uywacunäpis sumä-sumä tamyamunantam tantiapäcun.