Amos 5 - Old Testament Quechua Wanca（QVW）

Wanaculcänanpämi anyapan

1Israel läducuna, amcunapïta aya taqui nishäta uyalipäcuy:

2“Umricta manalä lisï Israelmá palpülun.

Manañamá śhalcunchu; quiquinpa pampanćhümá jitalayan.

Mayanpis śhalcachïnin manañamari canchu” nil.

3 Tayta Diosmari caynu nin:

“Walanga (1,000) cachacuncunawan yalü malcaca,

paćhac (100) cachacullanwanñamá cutiycamunꞌa.

Paćhacwan (100) yalücäñatacmi ćhuncallawanña cutiycamunꞌa.

Chaynümá jinantin Israelćhu canꞌa” nil.

4Chaynütacmi Israel läducunäta Tayta Dios nin:

“Ashipämalꞌa cawsapäcunquimá.

5Amañari Bet-elta liyalcayñachu,

Gilgalmanpis amaña yaycuyalcayñachu,

Beersebapapis amaña pasayalcaychu.

Gilgalꞌa prïsumá puśhaśha capäcunꞌa.

Bet-elñatacmi pampaman muyüchisha capäcunꞌa” nil.

6Chayurá Tayta Diosta ashiycälilꞌa cawsaycälinquimá.

Yanꞌalätac Israelta ninanu camacaycülu imanman.

Jinäluptin Bet-elćhu manamá mayanpis wañuycachï canmanchu.

7Amcuna, allin tincüninman lulaycuyta lulaycälinayquitá,

mana allin piñachiyllactañamá lulayalcanqui.

Allin cällanman lulaycuycätapis pampamanñamá muyuyalcächinqui.

8Uyllurcunätawan lusiru luläcäta ashipäcuy;

tutawyaycäta acchiman muyuycachïcäta,

muyuncäta tutaman licalichïcätari ashipäcuy;

chaynütac lamarcäćhu yacucunäta ayalcul

jinantin allpäman chächumücätari ashiycäliy.

Paypa śhutin Tayta Diosmá.

9Paymi sumä callpayücunäta pampaman muyuchin;

sumä murällayücunätapis pampamanmá muyuchin.

10Malcap yaycunanćhu tincüllanman cäraycücäta ćhïniculcanquimá.

Rasuncäwan limäcäta licaytapis manamá munapäcunquichu.

11Chaymi mana cäniyücunäta jalutaculcal

cusichancunapïpis alcabälacunacta mañapäcunqui.

Chay mañapäcuśhayquiwan labräśha lumipïta lulapäcuśhayqui

wasiquicunaćhu manamá cawsapäcunquichu.

Manatacmi üba talpupäcuśhayquicunap

bïnuntapis upyapäcunquichu.

12Yaꞌa tuquictamá yaćhayá pasaypi cullu linli capäcuśhayquita,

sumä mana allin lulaycunacta lulapäcuśhayquita.

Yaćhayätacmi allin nunacunäta ñacachipäcuśhayquita,

yanꞌalpi mañapäcuśhayquita; jinaman fiscunäćhu

wacchacunaca llallisha cananpä lulapäcuśhayquitapis yaćhayämá.

13Chay timpucuna mana allincällaña timpuyaptinmá,

chaynücunaćhu yaćhayniyu nunacá upällacuycun.

14Cawsaycälinayquipäri allincäta ashiycäliy,

amari mana allincätá.

Chayćha amcuna nipäcuśhayquinu

sumä munayniyu Tayta Dios amcunawan cawsaycunꞌa.

15Mana allincäta ćhïnipäcuy; allincätañatac cuyapäcuy.

Cäraycunapä cäcunäćhu tincüllanmanꞌari cäraycäliy.

Chaynu lulapäcuptiqui ichaläpis Josepa quïdä aylluncunacta

sumä munayniyu Tayta Dios llaquipaycunman.

16Caynümi sumä munayniyu Tayta Dios nin:

“Jinantin läsacunäćhümi waꞌacuylla cacunꞌa.

Jinantin cällicunäćhümi apalcaćhaylla cacunꞌa.

Ćhaclaćhu luläcunämi llaquicuyman ayaśha capäcunꞌa.

Waꞌayta yaćhäcunätapis waꞌapäcunanpämá mincacalcämunꞌa.

17Amcunaman lawćhaycü śhamuptïmi

jinantin üba lantacunäćhu waꞌacuylla cacunꞌa.

Yaꞌa Tayta Diosmari niyá” nil.

18Imanuylä capäcunqui Tayta Diospa

muyunnin ćhämunanta am alcäcuna.

Chay muyunca acchi canantá,

tutawyaycälla amcunaćhu cayaptinꞌa ¿ima allinmá canman?

19Chay muyun caycunꞌa,

liyuncäpi ayiyal ucumäliwan tincücänümá,

ütac wasinman yaycuycul pilanman chalapacuptin

juc culibra caćhuśhancänümá.

20¿Manachun Tayta Diospa ćhämunan muyunca acchi canantá,

sumä-sumä yanawyayä canꞌa imamá? Pasaypi tutawyayämari cacunꞌa;

ima acchillapis manamá caycunꞌachu.

21Tayta Diosmi nin:

“Fistacunacta lulapäcuśhayquita yaꞌa ćhïnicümá.

Juntunaculcäśhayquicuna manamá śhunꞌupänüchu.

22Masqui cañaywan uycunacunacta,

ćhacla micuycunacta apaycälimuptiquipis

manamá ćhasquipäcuśhayquićhu.

Manatacmá allin cawsaśhayquipi wira-cama uywacuna

uycälimäśhayquita licaytapis munaśhächu.

23Lädüpïta taquiquicunacta aśhuchipäcuy.

Arpayquicunap suynayninta manamá uyaliycuyta munächu.

24Aśhwanpa tincüninman licaycuyca mayunu caycuchun.

Imam cällanman licaycuycäpis mana camacaycü pucyunu caycuchun.

25“Israel nunacuna, ¿chunyäcäćhu tawa ćhunca (40) wata cayalcal

cañaywan uycunacunacta uycapämälanquichun imamá?

¿Uycunacunactapis uycälimälanquichun imatá?

26Aśhwanpam taytachayquicuna Molocta, Quiunta

uyllurcunaman tincuycachil

‘diosnïmi’ nil śhawaycaćhapäcunqui.

27Chaymi Damascopïtapis

mas calunninmanlä puśhachipäcuśhayqui.

Chaynu niyá yaꞌa Tayta Diosmari” nil.

Paypa śhutin sumä munayniyu Tayta Diosmari.