1 Cronicas 22 - Old Testament Quechua Wanca（QVW）

1Chaymi David nin: “Tayta Diospa alawana wasin cayćhümi canꞌa; chaynütac israelcunaca uycapäcunanpä uycuna pataccäpis cayćhütacmi canꞌa” nil.

Alawana wasicta lulachinanpä David alistacun

2Chaypïtam David jinantin Israelćhu, mana Israel caśhta yaćhäcunäta juntüchila. Paycunapïtam Tayta Diospa alawana wasinta lulachinanpä lumi labräcunacta ćhulala.

3Chaynütacmi David achca-achca jïrrucunacta fundilcachil läbucunacta, bisagracunacta lulachila puncuncunacta chalachinanpä. Chaynütacmi achca-achca brunsicunactapis juntuchila.

4Chaynütac Sidon, Tiro malcayücunaca cedro ilucunacta apälälimuptinmi achca-achcacta David juntuchila.

5Davidñatacmi śhunꞌullanćhu nicula: “Tayta Diospa alawana wasinꞌa jinantin pachäćhu cäcunäpi mas jatu-jatun, sumä-sumänin lulaśham canꞌa. Chaypá chulí Salomon anchap walaśhllalämi cayan. Chayurá lluy listullactaña caćhaycüśhä” nil.

Chaymari David manaläpis wañucul lluy listullactaña caćhaycüla.

6Chaypïtam chulin Salomonta ayalcamul, israelcunäpa Tayta Diosninpa alawana wasinta lulananpä nila.

7Chayćhümari nin: “Iju, Tayta Diosnïpa alawana wasicta śhalcachinäpämi śhunꞌüćhu cala.

8Ñatac Tayta Diosmi nimäla: ‘Amꞌa, ñawpänïćhu achca nunacunacta wañuchïmi canqui; pilyucunallaćhu pilyämi canqui. Chaymi alawana wasicta amchu mana lulapamanqui.

9Aśhwanpa jawcalla cacü chuliquim näsimunꞌa. Paytam lluy ćhïnicünincunawan jawcallacta yaꞌa cawsaycachishä. Chaymi śhutinpis Salomon canꞌa. Pay mandacuptin, Israelta jawca allinllactam cawsaycachishä.

10Paymi alawana wasïta śhalcachipamanꞌa. Paymari chulí caycunꞌa; yaꞌañatacmi taytan caśhä. Paypa mandacuynin, Israelćhu wiñaypä cananpämá tacyaycachishä’ nil.

11“Chayurá iju, quiquin Tayta Diosniquiꞌari limalicuśhanmannu alawana wasinta lulanayquipä yanapaycuśhunqui.

12Israelpa mandacünin cayta allaycuptiqui, camachicuyninmannu lulaycunayquipä quiquin Tayta Diosꞌari tantiayta, yaćhayta uycuśhunqui.

13Chaynu Israel caśhtacunäta Moisespa-cama chay camachishancunacta, nishancunacta lulaycuptiquiꞌa lluy imapis allinmi yaluycuśhunqui. Chayurá mana jucmanyällal callpanchacuy. Amari manchacuychu nï jucmanyaypischu.

14“Cay licaśhayquinüpis sumä callpanchaculmi Tayta Diospa alawana wasinpä alistalá: quimsa millun quimsa paćhac walanga (3,300,000) quïlu üructa, quimsa ćhunca quimsayu millun (33,000,000) quïlu illayta, chaynütac manaña tupuyta atipana achca-achca brunsicunactawan jïrrucunactapis. Chaynütacmi ilucunactapis lumicunactapis alistalá; pishiptinꞌa chayman mastam yapaycunqui.

15Chaynütacmi luläcunapis achca-achca cayalcan: lumi labräcuna, piläcuna, carpintïrucuna, lluy ima lulaycunapä ishpisha-ishpishacunapis.

16Paycunamari ürupi, illaypi, brunsipi, jïrrupi luläcuna cayalcan. Chayurá lulayta allaycuy; quiquin Tayta Diosmi yanapäśhunqui” nil.

17Chaypïtam chulin Salomonta yanapapäcunanpä, israelćhu lluy puydïcunäta nin:

18“¿¡Manachun Tayta Diosniqui amcunawan cayan imamá!? ¿¡Manachun mayćhüpis allin jawca cawsayta uycälishunqui imamá!? Paymari jinantin pachäćhu nunacunäta maquïman ćhulaycamun, Tayta Diospa munayllanćhu jinaman malcanpa munayllanćhüña cananpä.

19Chayurá Tayta Diosllayquitaña llapan śhunꞌuyquiwan, llapan cawsayniquiwan ashiycäliy. Jinal Tayta Diospa alawana wasinta lulapäcuy, limalicuśhan chuya babulninta, jinaman payllapa japächäśha cäcunätapis chayman apapämunayquipä” nil.