1 Tayta Diosllay, ima quijalläta ćhaycachimuptïpis
tincüllanmanmá am licaycunqui.
Chaymi cay quijacuylläta niycuśhayqui,
¿imapïmá mana allin nunacunäta imapis allinlla yaluycuyan?
¿Imapïmá ipanchäcunaca allincällaćhülä caycälinpis?
2Am lantaycuptiquimari paycuna sapichacälälin;
wiñälälilñatacmi wayuyniyü-camaña cacuyalcan.
Janä shimillanwanꞌa lläwayalcäśhunquimá;
śhunꞌunñatacmi ichá ampïta calućhu cayan.
3 Tayta Diosllay, yaꞌa imanuy cawsaśhätam ichá tuquicta lisimanqui.
Śhunꞌú amllaćhu caśhanta yaćhanquimari.
Chay nunacunätá uwishta wañuchinapä aysaśhantanuꞌari aysäluy.
Wañuchisha canan timpupäri ćhulaycüluy.
4¿Imaycamañamá allpaca chaquilla cayanꞌa?
¿Imaycamañamá ćhaclacunäćhu
pastucunäpis awïshalla cayanꞌa?
Cay nasyunćhu yaćhäcunäpa mana allin
lulayninpïmá munti uywacunäpis, pälïcunäpis wañutityayalcan.
Paycuna niyalcanlämari canpis: “Śhamücunäćhu ima pasamänanchictapis
Tayta Diosꞌa manamá licanchu” nil.
Tayta Diosñatacmi Jeremiasta nin5Chaynu niptïmi Tayta Dios niman:
“Ćhaquillap cürrïcunäwan llallinacuyćhu pishipayalꞌa,
¿imanuypamá sillädacunäwanlä llallinacunquiman canpis?
Allin allpallaćhüpis mana jawca cayalꞌa,
¿imanuylä canqui Jordan mayup sumä muntincunaćhuꞌa?
6Aśhta wawꞌi-caśhayquicunapis,
aylluyquicunapis ipanchäśhunquiñamá.
Apalcaćhaywanlämá waśhayquitapis limayalcan.
Masqui tuqui allincunallacta nishuptiquipis
paycunaman amari chalapacuyaychu.
7“Yaꞌamari ayllücunacta jitälú;
tücänïtam caćhaycülú.
Ćhïnicünincunap maquinmanmi
cuyaśhá malcäta ćhulaycülú.
8Tücäní malcämi muntićhu apalcaćhayä
liyunnu cuntrá licalïlälin.
Chaymari paycunacta licaytapis manaña munächu.
9Tücäní malcaca imaymana culurniyu wisculcunanümá licalïlälin.
Paycunactamari juc wisculcuna wicpi caypi cunćhacaycälin.
Jinantin munti uywacuna śhapämul
juntunacuyculꞌari micacälälichun.
10“Achca michïcunam üba lantäta
mana caśhanman muyülächin;
ćhaclätamá lluy jalutacälälin.
Tuquish allin allpätamá pulumäśha chunyäman muyülächin.
11Pasaypi pampaman muyüchisha,
chaquïsha llaqui allpactamá caćhaycälälin.
Jinantin allpaca pasaypi cayaptinpis
manamá mayantapis imapis ucunchu.
12Jinantin chunyäcäpa ulꞌuncunapïtamá
juyu suwacuna śhapämunꞌa.
Yaꞌa caćhamuśhá gïrram,
jinantin nasyunta manyan-manyan lluy camacaycülunꞌa.
Chaymi jawca cawsay mayanpäpis nï canꞌañachu.
13Malcá trïgucta talpuyalcalpis caśhacunallactañamá cusichapäcun.
Maynu-maynu callpanchaculcäśhanpis yanꞌal-yanꞌalpäñamá.
Pinꞌacuy uyshulayllactañamá cusichapäcunꞌa.
YaꞌaTayta Dios sumä piñacüśha caśhäpïmari chaynu capäcunꞌa” nil.
Israel lädup bisinuncunapämi Tayta Dios nin14 Tayta Diosmi caynu nin: “Israelman uycuśhá allpancunacta chay mana allin juyu chalacuycü nasyuncunätamari wicapäśhä. Paycunap ćhawpinpïmá Juda läducunätapis alapacüśhä.
15Ñatac Israeltá llaquipayculmi allpanman-cama, tücäninman-cama caśhan cutiycachishä.
16Sïchuśh paycuna malcá yaćhachishanta yaćhapäcuptinꞌa jinaman malcäta taytacha Baalman puntacta limalicuyta yaćhachipäcuśhannu yaꞌap śhutïćhu: ‘Cawsä Tayta Dios-laycum limalicú’ nil limaliculcaptinꞌa aclacuśhá malcäpa ćhawpinćhu allinmari caycälinꞌa.
17Ñatac mana cäsuculcaptinꞌa chay nasyunta sapipi wicapalculmi mana caśhanman muyüchishä. Yaꞌa Tayta Diosmari niyá” nil.
Who We AreWhat We EelieveWhat We Do
2025 by iamachristian.org,Inc All rights reserved.
