Deuteronomio 23 - Old Testament Quechua Wanca（QVW）

Alawanapä juntunacuyman mayancuna yaycunanpämi nin

1“Tayta Diosta alawanapä juntunaculcäśhayquiman luntun paltäśhacunaca, umri caynin witüśhacunaca manam yaycapäcunmanchu.

2“Chaynütacmi Tayta Diosta alawanapä juntunaculcäśhayquiman ishu nunacunaca, aśhta ćhunca milay pasanancamapis ama yaycapäcuchunchu.

3“Chaynütac Tayta Diosta alawanapä juntunaculcäśhayquiman Amon läducunaca, Moab läducunaca, milaynincunapis aśhta ćhunca milaynincuna pasanancama ama yaycapäcuchunchu.

4Paycuna manamá yacullactapis micuyllactapis uycapäcuśhulanquichu Egiptopi yalapämul pasapäcamuptiqui. Aśhwanpam Mesopotamiaćhu cä Petor malcap Beorpa chulin Balaamta mincacüla mana allin cananpä nichishunayquipä.

5Ñatac Tayta Diosniqui amcunacta cuyalmi Balaam nishanta mana uyalilachu. Chaymi chay mana allin ninancäta allinman muyuycachila.

6Chayurá cawsapäcuśhayquicama chay malcawan amam apanaculcanquichu nï allin cawsapäcunanpäpis munapäcunquichu.

7“Edom läducunätañatacmi wawꞌi-caśhayqui-laycu jucmanpa ama licapäcunquichu. Egiptocunätapis malcanćhu unay capäcuśhayqui-laycum jucmanpa ama licapäcunquichu.

8Paycunap quimsa milaynin pasäluptinñam amcunawan cusca Tayta Diosta alawanaćhu alawapäcunꞌa.

Chay capäcuśhancäta mana anlachipäcunanpämi nin

9“Chaynütac ćhïnicüniquicunawan pilyä lipäcuśhayquićhu yaćhapämul anlapä licaśha lulaycunäpi japächaculcay.

10Chayćhu mayanniquipis tutanpä chulicuyniquita ćhalćhapacülulꞌa chay jamapäcuśhayquipïta waśhamanmi yalupäcunqui; amañam yaycapäcunquichu.

11Aspilpuyaptinñam yacuwan almacunqui; chaynütac inti jiꞌalpuyñam jamapäcuśhayquiman cutiycamunqui.

12“Chay yaćhapäcuśhayquipi caluscaćhümi ishpaculcänayquipä unanchapäcunqui.

13Lluypis ishtacayquiwan-camam capäcunqui ishpacunayquićhu aśhpiycul, ishpacuycul caśhallan pampaycunayquipä.

14Tayta Diosniqui yaćhapäcuśhayquićhümari puliyan licaycälishunayquipä jinaman ćhïnicüniquicunacta maquiquiman ćhulaycamunanpä. Chaymi chay yaćhapäcuśhayquica chuya caycunan amcunaćhu ima anlallactapis mana talinanpä. Mana chaynu captinꞌa Tayta Dios amcunapïta japächacunꞌam.

Allin cawsapäcunanpä camachicuycunactam nin

15“Patrunninpïta uyway nuna ayimul wasiquiman ćhämuptin amam patrunninpa maquinman cutiycachinquichu.

16Aśhwanpam munaśhan mayannin malcaćhu yaćhananpäpis caćhaycälinqui. Amamá mayanniquipis ñacachipäcunquichu.

17“Israel caśhtacunäpa walaśh wamla chulincuna taytachacunacta sirbïninwan amamá waticaculcanꞌachu.

18Chaynu millachicuy lulaywan gänapacuśhancunapïta Tayta Diosniquipä amam apapämunꞌachu. Amatacmi limalicuśhayquitapis chay illaywan uycunquichu. Chaynu lulaycunacta Tayta Diosniqui millachicunmari.

19“Malca-masiquita amam ima mañaśhayquipïpis milayninta mañanquichu: Illaypi, micuypi nï imacunapïpis.

20Chayurá malca-masiquita amamá milayninta mañanquichu. Juc caśhtacunätañatacmi ichá mañanqui. Chayćha uycuśhuśhayqui allpäćhüña cayalcaptiqui ima lulaśhayquićhüpis Tayta Diosniqui allinpä licaycälishunqui.

21“Tayta Diosniquiman limalicuśhayquita bïbullam lulaycunayqui. Mana lulayculꞌa juchayüñam canqui. Chaynu caśhayquipïmi Tayta Diosniqui cäraycuśhunqui.

22Ñatac mana limaliculꞌa manamá juchacunquichu.

23Chaymi śhunꞌuyquipi yalamuśhanwan Tayta Diosniquiman limalicuśhayquimannülla uycunayqui.

24“Malca-masiquip üba lantanman yaycul maćhaycunayquicamam micucuycunquiman. Ñatac amamá imallactapis canaśhtayquićhu apanquimanchu.

25Chaynütacmi malca-masiquip trïgu talpuyninman yaycul maquillayquiwan pallaculcanquiman. Cüśhawanꞌa amamá lutupäcunquimanchu.