1Efrain limaptin manchacuywanmá lluy licaycälila.
Israelćhu altumanmá julaycälila.
Ñatac taytacha Baalta alawapäcuśhanwanmá Efrain wañuyninta ashïlälishaña cayalcäla.
2Cananpis jinallam juchacunacta lulayan;
uman chalaśhanmannümá illaycunacta fundiycul
taytachacunacta lulapäcun.
Chaycuna aläja luläcunap lulaśhancunallamari cayan.
Jinalculmi nipäcun: “Alawaycäliy; cañaywan uycäliy.
Cay wäcactanu cä taytachaman uyshuycäliyꞌari” nil.
3Chaymi paycuna, chincacü pacha-pucutaycänülla capäcunꞌa.
Wäläluptin chincacü śhullinüllamá capäcunꞌa.
Trïgu ïrapïta waywa apaśhan päśhänüllamá capäcunꞌa.
Wasipi untay yaluśhancänüllamá capäcunꞌa.
4Tayta Diosmi nin:
“Ñatac Egipto lädućhu caśhayquipïtamá
Tayta Diosniqui yaꞌa cayá.
Yaꞌapïta juctá amari ‘Tayta Diosnïmi’ niyaychu.
Yaꞌallamá salbaycüniqui cayá.
5“Yaꞌami chunyäcäćhu taliyculac.
Yaꞌami chaqui ulꞌüćhu licayculac.
6Micaycachiptïmá maćhacaycälilanqui.
Maćhacaycälilñatacmi nunatuculcälil
yaꞌacta unꞌälälimälanqui.
7Chayurá liyunnümi amcunapä caśhä;
tigrinümá pulishayquicunäćhu awaytayäśhä.
8Wawinta quitayäśha ucumälinümá
läcaculcul śhunꞌuyquitapis julüśhä.
Liyunnümá lacsacalpuśhayqui;
munti uywanümá uchuy-uchuyllacta ticshiy pawäśhayquipis.
9“Am Israel, cuntrá śhalcuśhayquipïmá camacaycüśhä canqui.
Yanapäśhüniquip cuntran caśhayquipïmá
pampaman muyüchisha canqui.
10Lluy malcayquicunaćhu salbacü mandacüniqui,
¿mayćhütá cayan?
¿Mayćhütá mañapämäśhayqui puydïniquicuna,
licaycüniquicuna cayan?
11Piñacuynïćhümá mandacüta uyculac.
Rabyacuynïćhütacmi quitälacpis.
12“Efrainpa mana allin lulaynin ćhulaycuśhamá cayan.
Juchan yalpalcuśhamá cayan.
13Am Israelta, waćhacü walmip nanayninnümá chalaśhunqui.
Am pasaypi luclumá canqui.
Näsimunayquipä wactishćhu cayäcänümá cayanqui.
Näsinayqui üra manamá yalamuyta atipamunquichu.
14“¿Wañücuna canancäpa maquinpïchun julaycamuśhayqui?
¿Wañuycäpïchun libraycamuśhayqui?
Wañuy, ¿mayćhümá wañuchicuyniqui cayan?
Sipultüra, ¿mayćhümá camacaycü munayniqui cayan?
Cay nunacunäta yaꞌa manañamá llaquipaycuśhäñachu.
15Masqui wawꞌi-caśhancunaćhu sumä wayuyä lantanu
Efrain cayaptinpis inti yalamunan lädu
waywactamá yaꞌa Tayta Dios ishpïchimuśhä.
Chunyä lädupïmá pücachimuśhä.
Jinaptinmi pucyuncunapis chaquïlunꞌa;
yacu yalamü ñawincunapis camacälunꞌa.
Lluy cänincunactapis, ćhaniyu aläjancunactapis apacunꞌamá.
16Tayta Diospa cuntran śhalcuśhanpïtamá
Samaria malca camacaycüśha canꞌa.
Ispädawanmá wañupäcunꞌa.
Chulincunapis pampäman chapïśhamá capäcunꞌa.
Patayu walmincunapis patan laćhyäśhamá capäcunꞌa” nil.
Who We AreWhat We EelieveWhat We Do
2025 by iamachristian.org,Inc All rights reserved.
