Numeros 31 - Old Testament Quechua Wanca（QVW）

Israel caśhtacunämi Madian läducunäta cutichicun

1Chaypïtam Moisesta Tayta Dios nin:

2“Manaläpis wañucul Israel caśhtacunäpa pudirnin Madian läducunäta cutichicüluy” nil.

3Niptinmi jinantin malcäta Moises nin: “Waquinniquicuna allichaculcay Madian läducunäta cutichicuywan camacaycünayquipä. Tayta Diospa piñacuynintam paycunaman ćhaycachishun.

4Jinantin Israel caśhtacunäpi ayllunpi-camam walanga wayapacunacta pilyapämunanpä caćhapäcunqui” nil.

5Chaymi ayllupi-cama walanga nunacunacta pilyananpä aclalälin. Lluy capäcula ćhunca ishcayniyu walanga (12,000) nunacunam.

6Moisesñatacmi ayllupi-cama chay walanga (1,000) cäcunäta pilyamü caćhäla. Sasirdüti Eleazarpa chulin Fineesmari carpap ima cänincunactapis, chaynütac pilyay allaycunanpä cä tucana curnitilläta apaculcul lila.

7Chaynu Tayta Dios Moisesta nishanmannümi Israel caśhtacunaca Madianta pilyä lipäcul lluy umricunäta camacaycälälila.

8Jinaman Madian malcap picha mandacünincunactapis wañüchilam: Evicta, Requemta, Zurta, Rebata, Hurtapis. Chaynütac Beorpa chulin Balaamtapis ispädawanmi wañüchila.

9Israel caśhtacunäñatacmi Madian läducunäpa walmincunacta, chulincunacta prïsu puśhaculcäla. Chaynütac uywancunactapis, ima cänincunactapis apaculcäla.

10Jinaman lluy malcancunactapis yaćhaśhancunactapis lluymi cañaycalälila.

11Chaynüpam walmincunacta, wawincunacta, uywancunacta, ima cänincunactapis chalacaycälila.

12Chaycunactam Moisesman, sasirdüti Eleazarman, jinantin israelman apapäcula. Paycuna cayalcäla Jerico malcap chimpanćhu, Jordan mayup patanćhu cä Moab lädup ulꞌunćhümi.

13Chaymi Moises, sasirdüti Eleazar, malcap puydïnincunawan jamapäcuśhanpi waśhaman yalapämula ćhasquïnin.

14Moisesñatacmi piñacüla pilyaśhanpi cutimu walangantinpa, paćhacnintinpa puydïnincunapä.

15Chaymi Moises nin: “¿Imapïmi lluy walmicunäta cawsayniyüta caćhaycälälilanqui?

16Chay walmicunämari Balaampa umachäśha cayalcal Tayta Diosta ipanchananpä Israel caśhtacunäta śhalcachipäcula, Baal-peorNum 25.1-9; Apo 2.14. taytachacta alawachiyninwan. Chaymi Tayta Dios nunancunacta juyu ishyaywan camacaycüla.

17Chayurá canan-pacha walaśh wawincunactapis, umricta lisï walmicunätapis wañuchipäcuy.

18Ñatac umricta manalä lisï wamlacunätam ichá caćhaycapäcunqui; amcunapäñamari canꞌa.

19“Ñatac amcunaćhu nunacta wañuchïcunaca ütac wañüśhacta yataycücunaca anćhish muyunmi jamapäcuśhayquipi calućhu capäcunꞌa. Jinalmi amcunapis, prïsu puśhapämuśhayquipis quimsayänan muyuncäćhu, anćhishyänan muyuncäćhu chuyanchaculcanqui.

20Chaynütacmi lluy müdanayquita, utapi luläśhactapis, capishpa ächanpi luläśhacunactapis, jinaman ilupi luläśha sirbichicuncunactapis chuyanchapäcunqui” nil.

Lluy waycamuśhancunätam aypunacun

21Chaypïtam pilyamuśhanpi cutimu lluy nunacunäta sasirdüti Eleazar nin: “Tayta Dios Moisesman uycuśhan camachicuyca caymi:

22Ürupis, illaypis, brunsipis, jïrrupis, estañupis, plomupis,

23jinaman ninawan mana lupäcäta chuyanchaśha cananpämi ninap pasachinqui. Jinaman chuyanchana yacuwanmi paꞌapäcunqui. Ninawan lupäcätá chuyanchana yacuwanmi paꞌapäcunqui.

24Chaynütac anćhishyänan muyuncäćhu müdanayquicunacta täśhapäcunqui chuyanchäśha capäcunayquipä. Chaypïtañam jamapäcuśhayquiman cutiycapäcunqui” nil.

25Chaypïtam Moisesta Tayta Dios nin:

26“Sasirdüti Eleazarwan malcap puydïnincunam yanapapäcuśhunqui Madian läducunäpi ayca nunacunacta, uywacunacta apapämuśhayquitapis fintayta.

27Chaycunactam ishcayman laquilcul jucnin particta pilyamü lïcunäman aypuycunqui; juc partictañatacmi quïdäcunäman.

28Pilyamü lïcunaca apapämuśhanpïmi Tayta Diospä japächaycälinqui. Masqui nunacuna, wäcacuna, aśhnucuna, uwishcuna captinpis picha paćhacpïta-camam (500) jucta-cama japächaycunꞌa.

29Chay japächaycälishanpïmi Tayta Diospäña cananpä sasirdüti Eleazarman uycunqui.

30Mana lï israelcunäman aypuycuśhan nunapïta, wäcapïta, aśhnupïta, uwishpïta, jinaman ima uywapïtapis picha ćhuncapïta-camam (50) levitacunäman jucta uycunqui. Paycunamari carpacta licaycälïca cayalcan” nil.

31Chaynu Tayta Dios nishanmanümari Moiseswan sasirdüti Eleazar lulaycälila.

32Chay pilyupi apapämuśhancunaca cala: Süta paćhac anćhish ćhunca pichayu walanga (675,000) uwishcunam,

33anćhish ćhunca ishcayniyu walanga (72,000) wäcacunam,

34süta ćhunca jucniyu walanga (61,000) aśhnucunam capäcula.

35Manalä umri lisï wamlacunäñatacmi quimsa ćhunca ishcayniyu walanga (32,000) capäcula.

36Ishcayman laquilcul pilyamü lïcunäta aypuptinmi jucninman quimsa paćhac quimsa ćhunca anćhishniyu walanga (337,000) uwishcuna tücala.

37Tayta Diospäñatacmi süta paćhac anćhish ćhunca pichayu (675) uwishcuna cala.

38Pilyä lïcunäpämi quimsa ćhunca sütayu walanga (36,000) wäcacuna cala; Tayta Diospäñatacmi anćhish ćhunca ishcayniyu (72) cala.

39Aśhnucunäpïñatacmi quimsa ćhunca walanga picha paćhacniyu (30,500) cala. Tayta Diospäñatacmi süta ćhunca jucniyu (61) cala.

40Wamlacunäpïtañatacmi pilyä lïcunäpä ćhunca sütayu walanga (16,000) wamlacuna cala. Paycunapïta Tayta Diospäñatacmi quimsa ćhunca ishcayniyu (32) cala.

41Tayta Dios nishanmannümi japächaśha cä uycuśhancunäta sasirdüti Eleazarman Moises uycula.

42Chay ishcayman laquishanpa jucnin particta quïdä Israel caśhtacunäman Moises uycuśhanca caycunam cala:

43Quimsa paćhac quimsa ćhunca anćhishniyu walanga picha paćhac (337,500) uwishcuna,

44Quimsa ćhunca sütayu walanga (36,000) wäcacuna,

45quimsa ćhunca walanga picha paćhac (30,500) aśhnucuna,

46ćhunca sütayu walanga (16,000) wamlacunapis.

47Israel caśhtacunäta laquishanpi picha ćhuncapïta-camam (50) jucta Moises ćhasquila, masqui wamlacuna ütac uywacuna captinpis. Chay laquishancunätam Tayta Diospa carpanta licaycu levitacunäman uycula. Tayta Dios camachishanmannümari lluy lulaycula.

48Chay pilyamü walanga lïcunäpa, paćhac pilyäcunap puydïnincunam Moisesman lipäcula.

49Chayćhümi Moisesta nipäcun: “Cay nunallayquicuna maquïćhu cä lluy pilyä lïcunäta fintaycäliptïmi lluy cayalcan.

50Chaymi lluy talipäcuśhäta ürupi aläjacunacta Tayta Diosman uycälilá: ćhipacucunacta, pulsiracunacta, surtijacunacta, ariticunacta, jinaman imaymana aläjacunactapis. Caycunactam uycälilá juchäcunacta Tayta Dios chuyanchaycälimänanpä” nil.

51Chaymi chay ürupi cä lluy aläjacunäta Moiseswan sasirdüti Eleazar ćhasquiycula.

52Walanga (1,000) pilyacunäpä, paćhac (100) pilyacunäpä puydïnincuna Tayta Diosman ürupïta aläja uśhancunämi paćhac pusä ćhunca tawayu (184) quïlu masninman ćhäla.

53Pilyamü lïcunaca imactapis quitamuśhancunaca quiquinpämari cala.

54Chaynüpam chay walanga (1,000) pilyäcunäpa puydïnincuna, paćhac (100) pilyäcunäpa puydïnincuna upäcuśhan ürupi aläjacunäta Moiseswan sasirdüti Eleazar ćhasquipäcula. Jinalculmi Tayta Dioswan tincuna carpaman apaycapäcula. Chaynüta lulapäcula Israel caśhtacunäta Tayta Dios imaypis yanapänanpämi.