2 Cronicas 31 - Old Testament Quechua Wanca（QVW）

1Chay fista camacäluptinmi chayćhu cä israelcunaca jinantin Juda lädup malcancunaman pasaculcan taytachancunacta, mamacha Aserap liträtuncunacta camacaycälimü. Chaynütacmi Juda, Benjamin, Efrain, Manases ayllucunäćhu cä uycunacunactapis, uycuna pataccunactapis camacaycälälila. Chaypïtam malcanta-cama wasincunaman cuticulcäla.

Sasirdüticunäwan levitacunaca lulapäcunanpä caśhanmi camachin

2Chaypïtam Ezequias ćhulala sasirdüticunätawan levitacunäta imam lulaynin caśhanpa tücachinacuypa sirbipäcunanpä, cañaywan uycunacunacta uycunanpä, allin cawsaśhanpi uycunacta uycunanpä, sulpäta upäcunanpä, Tayta Diospa alawana wasinpa puncunta täpapäcunanpäpis.

3Mandacü Ezequiaspis quiquinpa cänincunapïmi uycula Tayta Diospa camachicuyninćhu nishanmannu wälanpa, tardinpa, jamana muyunninćhu, llullu quillacunaćhu, jatun fistacunaćhu uycapäcunanpä.

6Chaynütacmi Israel lädu nunacuna Juda lädućhu yaćhäcunaca, jinaman quiquin Juda lädu malcacunäćhu yaćhäcunäpis japächapäcuśhanpi, ćhuncapïta jucta-cama uycapäcula: wäcancunapi, uwishnincunapi, Tayta Diosman uycunanpä limalicuśhancunapïpis. Chaycunactamari muntun-muntunta juntupäcula.

7Quimsa quilläćhu apamuyta allaycapäculmi anćhish quilläćhülä camacapäcula.

8Chaynu achca-achca muntunäśha cäcäta, mandacü Ezequias puydïcunäwan licaycü śhapämulmi Tayta Diostawan lluy Israel malcanta allin caycunanpä niycälila.

9Chayćhu sasirdüticunätawan levitacunätam apapämuśhan muntuncunäpi Ezequias tapuycula.

10Chaymi Sadoc ayllupi cä puydï sasirdüti Azarias nin: “Tayta Diospa alawana wasinman apamuyta allaycapäcuśhanpïtá micapäcunäpä puchuy-puchuymi capäcú. Tayta Dios malcanta allinpä licaycamaptinchicmari caychicalä puchuycunpis” nil.

11Chay apamuśhancunäta Tayta Diospa alawana wasinman pilwanan captinmi lulapäcunanpä Ezequias nila. Jinaptinmi chay nishanmannu pilwacunacta lulapäcula.

12Ishpïchiptinñatacmi mana manalcullal apapämula: uycunanpä cäcunäta, ćhuncapi jucta-cama uycunancunäta, Tayta Diospa ima japächaycapäcuśhancunätapis. Chaycunacta puydï licaycüninpämi levita Conaniasta ćhulaycälila, yanapäninpäñatacmi wawꞌi-caśhan Simeita.

13Paycunap licawshïnincunapäñatacmi ćhulaśha capäcula: Jehiel, Azazias, Nahat, Asael, Jerimot, Jozabad, Eliel, Ismaquias, Mahat, Benaiapis. Paycunamari Conaniaspawan wawꞌi-caśhan Simeipa maquinćhu capäcula. Lluy paycunactamari Tayta Diospa alawana wasinćhu puydïnin Azariaswan mandacü Ezequias ćhulapäcula.

14Levita Imnapa chulin Coreñatacmi inti ishpimunan lädu puncucta täpäca cala. Paytacmi ćhasquiycüca cala, śhunꞌunpi yalamuśhan uycunacta Tayta Diospa apamuśhancunätapis. Chaynütacmi chay apamuśhancunätawan Tayta Diosllapäña japächäśha cäcunätapis pay aypuycula.

15Sasirdüticuna yaćhaśhan malcacunäćhümari Corepa yanapänincuna capäcula: Eden, Miniamin, Jesua, Semaias, Amarias, Secaniaspis. Paycunamá mana manalcullal imam tücaśhanpa-cama jatuntapis uchuyllactapis caśhtanpa-cama lluy aypunaculcä cala.

16Chaynu aypula quimsa watapi janaman apuntäśha umricunätamari. Paycunamari Tayta Diospa alawana wasiman imam tücaśhanpa-cama lulayninta lulapäcunanpä śhamü capäcula.

17Chaynütac ayllunćhu-cama apuntäśha sasirdüticunätapis aypupäculam. Jinaman ishcay ćhunca (20) watayüpi janaman levitacunäta imam lulayta yaćhaśhanćhu tücaśhanćhu apuntäśha cäcunätapis aypupäculamari.

18Chaynu apuntäśha capäcula Tayta Diosllactaña sirbipäcunanpä japächäśha lluy cäcunämari aśhta uchuchällantin, walmintin, walaśh wamla chulintin.

19Chayurá malcaćhu-camam nunacunacta ćhulala apuntäśha cä Aaronpa milaynin sasirdüticunäta, levitacunäta micuycunacta aypunanpä. Chaymi ichadïrunćhu cä levitacunäpis micuyta ćhasquipäcula.

20Chaynütam jinantin Juda lädućhu mandacü Ezequias lulaycula. Payꞌa Tayta Diosninpa ñawquin allinllacta, tincüllanman, rasuncällactam lulaycula.

21Llapan śhunꞌunwanmari Tayta Dios munaśhanmannu alawana wasićhu lluy imactapis lulaycachila camachicuy, yaćhachicuy nishanmannu. Chaymari lluy imapis allin yaluycula.