Exodo 25 - Old Testament Quechua Wanca（QVW）

Chuya carpapä apapämunanpämi nin Exo 35.4-9

1Chayćhümi Tayta Dios Moisesta nin:

2“Israel caśhtacunaca ima uycunacunactapis apapämunanpä nimuy. Apapämuchun śhunꞌunpi yalamücunäta.

3Amñatacmi ćhasquipäcunqui: ürucunacta, illaycunacta, cobrecunactapis.

4Tïlacunaćhuꞌa: asulcunacta, muräducunacta, pucacunacta, fïnu lïnucunacta, capishpa pïluncunacta,

5ulu uwishpa utan pucawan tiñïshacta, fïnunnin utacunacta, acacia ilucunacta,

6michïrucunap asaytincunacta, japächaycunapä asaytip tuqui aśhnachicuncunactapis, jinaman tuqui aśhnä insinsiupä tuqui aśhnachicuncunactapis.

7Chaynütac apapämuchun: onice lumicta, juc fïnunnin lumicunacta puydï sasirdüticunap chalicunman pichïrunman chalachinapä.

8Ñatac juc chuya carpactam lulaycapamanqui amcunaćhu yaćhaycunäpä.

9Chay chuya carpactapis chayćhu lluy ima cänintapis canan camachishämannümi lulaycunqui.

Babulta lulapäcunanpämi nin Exo 37.1-9

10“Babulcäta acacia ilupïmi lulanqui. Largunmi juc mitru ćhunca (1.10) cintïmitruyu canꞌa. Anchunñatacmi süta ćhunca pichayu (65), altunninmanpis süta ćhunca pichayu (65) cintïmitrutacmi canꞌa.

11Lulïnintapis janänintapis ürunllanllanwanmi laꞌalunqui. Muyülïnintapis üruwanmi ribityälunqui.

12Tawa argüllactam ürupïta fundichinqui. Chaytam babulpa tawan isquinancunap ćhaquinman ćhulanqui.

13Bäractapis acacia ilupïta lulalculmi üruwan laꞌalunqui.

14Jinalculmi ishcay argüllacunäpä pasachinqui. Chaymi babulta apanapä allin canꞌa.

15Cay bäracuna mana yalucälïmi imaypis argülläman śhatiycuśha capäcunꞌa.

16Cay babulmanmi ćhuncantin camachicuy unäcäta ćhulanqui.

17“Täpantañatacmi ürunllanllanpi lulanqui. Largunmi juc mitru ćhunca (1.10) cintimitru canꞌa. Anchunñatacmi süta ćhunca pichayu (65) cintimitru canꞌa.

18Chaypa ishcaynin manyanmanmi ürupïta ishcay querubin anjilcunacta śhaycachinqui. Cay martilluwan labräśha masïsu-camam canꞌa.

19Chay täpawan ishcaynin querubin anjilcämi jucllayllaćhu luläśha canꞌa. Ñatac wic-lädu cay-lädu manyanćhu ćhuläśham canꞌa.

20Chaycunap laplanmi llantuyänu quićhäśha canꞌa. Cärancunañatacmi licanacuyänu täpaman uyshulayal licalayalcä canꞌa.

21Cay täpacta babulpa janäninmanmi ćhulanqui. Chay babulmantacmi ćhuncantin camachicuy unäcätapis ćhulanqui.

22Chaymi tincunanchicpä, limananchicpä canꞌa. Cay limalicuśhan babulpa jananćhu cä querubin anjilcunap ćhawpinpïtam camachicuynïcunacta willaśhayqui Israel caśhtacunäpä.

Mïsacta lulananpämi nin Exo 37.10-16

23“Chaynütacmi acacia ilupïta juc mïsacta lulanqui. Largunmi isun ćhunca (90) cintimitru canꞌa. Anchunñatacmi tawa ćhunca pichayu (45) cintimitru, altunñatac süta ćhunca pichayu (65) cintimitru canꞌa.

24Ürunllanllanwanmi lluy laꞌalunqui, manyancunactapis üruwanmi ribityälunqui.

25Ürupïtacmi muyülïninćhu aläjancunactapis anćhish cintimitrupi lulanqui.

26Ürupïtacmi tawan ćhaquinpa wätanćhu walcalänanpä tawa argüllacta lulanqui.

27Chay argüllaca aläjacunäpa ulapaycascanćhümi canꞌa. Chayman bäracunäta uśhtuycachil mïsacta apanapämari canꞌa.

28Cay apanan bäracunactañatacmi acacia ilupi lulalcul üruwan laꞌalunqui.

29Ürunllanllanpïtacmi chay mïsaćhu lätuncunactapis, wishlancunactapis, järrancunactapis, jinaman Diospa apapämuśhan bïnucta ćhulanapä bäsuncunactapis lulanqui.

30Cay mïsaćhümi yaꞌapä japächaśhayqui tantaca mana pishiycunꞌachu.Ürunllanllanpi jatun michïructa lulananpämi nin Exo 37.17-24

31“Chaynütacmi ürunllanllanpi martilluwan labräśha jatun michïructa lulanqui. Jucllayllapi luläśham canꞌa: täcucun, śhäcunanca, walachicuncuna, waytancuna lluy imaymana cänincunapis.

32Chay jatun michïrup wätanpïtañatacmi süta pallaycunanu yalunꞌa; jucnin lädunpïtam quimsa, juc lädunpïtapis quimsatac.

33Chay sütantin pallaycunanu cäcunäćhümi almindra waytanu aläjancuna canꞌa. Lluymi capäcunꞌa umanćhu waytayü-cama.

34Chay jatun michïrup śhäcunanćhüpis tawa bäsucunam canꞌa. Chaypis almindrap waytannümi canꞌa.

35Chay jatun michïrućhu quimsa pärish pallaycunam canꞌa. Chay jucnin pallaypa ulapayllanćhümi jucnin aläjan canꞌa. Chay ishcay pallaycäpa ulapayninćhüpis juc aläjam canꞌa. Chay quimsa pallaycäpa ulapayninćhüpis juc aläjatacmi canꞌa. Chay umacunam chalalanꞌa sütantin pallaycunäta.

36Cay umacunäwan pallaycunänu cäcunämi chay śhäcücällapi yalupäcunꞌa. Martilluwan labräśha ürunllanllanpïtacmi canꞌa.

37Chaynütacmi jatun michïrup puntancunaćhu anćhish walanancunactapis lulanqui. Chaycunacta chimpanmanmi acchinanpä ćhulanqui.

38Chay michïrup micha cuchucunta, ćhulacuntapis ürunllanllanpïtam lulanqui.

39Cay jatun michïructawan lluy imancunactapis quimsa ćhunca (30) quïlu ürunllanllanwanmi lulanqui.

40Caycunacta lulaycunqui Sinai ulꞌućhu licachishätanüllam.Hch 7.44; Heb 8.5.