Numeros 10 - Old Testament Quechua Wanca（QVW）

Curnitillawan llamädananpämi nin

1Chaypïtam Moisesta Tayta Dios nin:

2“Illaypïta ishcay curnitillacta martilluwan labräśhacta lulay. Chaymi malcacta juntuchimunayquipä ütac pasapäcunanpäpis llamädanayquipä canꞌa.

3Chay ishcay curnitilla tucalpämuptinmi tincuna carpap yaycuycunancäman jinantin malcaca anman juntunacamunꞌa.

4Ñatac curnitilla jucllacta tucämuptinꞌa Israel caśhtacunäćhu ayllucunap puydïnincunam anman juntunacamunꞌa.

5Chaynütac pasapäcunayquipä ayaycaćhaypa jucta tucämuptinꞌa inti ishpinan lädućhu cä ayllucunam yaluyta allaycapäcunꞌa.

6Pasapäcunanpänu ayaycaćhaypa ishcayta tucämuptinꞌa allï lädućhu cäcunämi yalupäcunꞌa. Chayurá apalcaćhaywanmi pasapäcunayquipä tucalcamunꞌa.

7Ñatac jinantin malcaca juntunaculcänayquipä curnitilla tucaycá manam ayaycaćhaypachu canꞌa.

8“Chay curnitillacunäta sasirdüti Aaronpa milaynincunam tucapäcunꞌa. Cay camachishäca imaycamapis lluy milayniquicunapämari wiñaypä canꞌa.

9“Ñatac quiquiquip malcayquićhu cayalñá ćhïnicüniqui śhacayämuptinꞌa, pilyupänu tucaytaćh curnitillacunäta tucanꞌa. Chayćha Tayta Dios amcunapi yalpal ćhïnicüniquicunapi salbaycuśhunqui.

10Chaynütacmi curnitillacta tucalcapäcunqui caycunaćhüpis: cushicuy muyunćhu, quillap allaycuyninćhu, warda muyuncunacta fistachacapäcuśhayquićhu, cañaycälinayquićhu, jinaman allin cawsaśhanpi uycunayquicunaćhüpis. Chayćha Tayta Dios amcunapi yalpanꞌa. Yaꞌamari Tayta Diosniqui cayá” nil.

Sinai chunyäcäpïtam Israel caśhtacunaca pasapäcun

11Chay ishcay watäćhu, ishcay quillap ishcay ćhunca muyunninćhümi limalicuśhan carpap janäninpi pucutayca licula.

12Jinaptinmi Israel caśhtacunaca chunyä Sinaipïta pasapäcula. Chaypïtam Paran lädu chunyäcäćhu pucutayca śhaycülun.

13Paycunam Tayta Dios Moisesman camachishanmannu wamäta pasapäcula.Num 2.1-34.

14Juda ayllucunämi bandiranwan puntala. Paycunap mandäninmi cala Aminadabpa chulin Naason.

15Isacar ayllucunäñatacmi Zuarpa chulin Natanaelpa mandaśha lipäcula.

16Zabulon ayllucunäñatacmi Helonpa chulin Eliabpa mandaśha lipäcula.

17Ñatac carpa lluy pasquïsha cayaptinñam Gerson, Merari ayllucunaca apapäcula.

18Chaypïtam bandiranwan Ruben ayllucunaca lipäcula. Paycunap mandäninmi Sedeurpa chulin Elisur cala.

19Simeon ayllucunäñatacmi Zurisadaipa chulin Selumielpa mandaśha lipäcula.

20Gad ayllucunäñatacmi Deuelpa chulin Eliasafpa mandaśha lipäcula.

21Chaypïta Coat ayllucunaca Chuya Sityućhu cäcunäta apacüśham lipäcula. Paycuna jamapäcuśhan sityuman ćhäpäcunanpá carpacta śhalcächishactañamari alcachipäcula.

22Chaypïtam bandirawan Efrain ayllucunaca lipäcula. Paycunap mandäninmi cala Amiudpa chulin Elisama.

23Manases ayllucunäñatacmi Pedasurpa chulin Gamalielpa mandaśha lipäcula.

24Benjamin ayllucunäñatacmi Gedeonip chulin Abidanpa mandaśha lipäcula.

25Chaypïta camacalpuycäćhümi bandiranwan Dan ayllucunaca ipanta lipäcula täpäcänu. Paycunap mandäninmi cala Amisadaipa chulin Ahiezer.

26Aser ayllucunäñatacmi Ocranpa chulin Pagielpa mandaśha lipäcula.

27Neftali ayllucunäñatacmi Enanpä chulin Ahirap mandaśha lipäcula.

28Caynu atinacuyllamari Israel caśhtacunaca pasapäcul lipäcula.

Moisesmi suydrunpa chulinta lipäcunanapä nin

29Chaypïtam Madian lädu suydrun Reguelpa chulin Hobat-ta Moises nin: “Tayta Dios limalicamäśhanchic allpamanmi canan yaluśhun. Yaꞌacunawan lishun; tuquipmi licaycälishayqui. Tayta Diosmari limalicula Israel caśhtacunäta allinpä licaycunanpä” nil.

30Niptinmi Hobad: “Yaꞌa manam lishächu. Malcämanmi, ayllümanmi cuticuśhä” nin.

31Niptinmi Moises jicutäcuyan: “Am tuquictam lisinqui cay chunyäcunäćhu maycäćhu jamanapä allin caśhantapis. Anmi caminaycüní canqui.

32Yaꞌacunawan lipäcuptiquiꞌa Tayta Dios lluy allincunäta uycapämäśhancunactam laquinacuycuśhun” nil.

33Chaynüpam Tayta Diospa ulꞌun caśhancäpïta yalapäcul quimsa muyun lipäcula. Chayćhu Tayta Diospa limalicuśhan babulca paycunap puntantam lila, mayćhu jamapäcunanpäpis ashishtin.

34Chay yaluśhanpïmi Tayta Diospa pucutaynin anyaśh muyun paycunap janäninćhu lila.

35Babulca yaluyta allaycuptinmi Moises nin:

“¡Tayta Dios, śhalcuy!

¡Ćhïnicüniquicuna chiꞌichisha cachun!

¡Ćhïnishüniquicuna licälälil ayipäcuchun!”Sal 68.1. nil.

36Chay babulca jamaptinñatacmi Moises nin:

“¡Tayta Diosllay yaꞌacunaman cutimuy!

¡Mana fintayta atipana Israel caśhtacunämanꞌari cutimuy!” nil.