Job 24 - Old Testament Quechua Wanca（QVW）

1“Sumä Munayniyüca, ¿imayñatá juyu nunacunäta cäraycunꞌa?

¿Imapïtá cäraycunanpä allin nunacunaca alcay-alcay cayalcan?

2Juyu nunacunaca ćhaclancunap culindancunacta aśhuchipäcunmá;

uywacunactapis suwaculculmá michipäcunlä canpis.

3Mana mamayu-taytayücunäpa aśhnuncunactapis waycälälinmá;

japanyäśha walmicunäta mañalpis wäcancunactalämi prindapä chalacaycälin.

4Mana cäniyücunäta caminuncunapïmá wicapälälin;

jinantin wacchacunämi manchacuypi pacaculcan.

5Munti aśhnucunaca chunyäcäćhu micuyta ashishannümá,

wacchacunaca micunanpä imaypis ashiyalcällan;

aśhta chunyäcunäćhüpis wawincunapä micuyta ashipäcullanmá.

6Juccunap ćhaclancunapïmá pallapaculcällan;

juyu nunacunap üba lantancunapïtamá ashipaculcällan.

7Tutanpapis calanllanmá wälapäcullan;

alalaycäpi aytucunanpä manamá imallanpis canchu.

8Ulꞌucunäćhu tamyapis sumä-sumätamá camacaycüllan;

llantupacunanpä mana captinmá aꞌacunäman pasaculcällan.

9“Japanyäśhacunäpa ñuñuyä iñachancunactapis waycälälinmá;

mänu capäcuśhanpïtamá chay iñachanta chalacaycälin.

10Wacchaca mana müdanayu calanllanmá pulipäcun;

micuypi wañuśhtinmá trïgucunacta aśhtapacullan.

11Yacupi wañuśhtinmá ulïbus asayticta julunanpä aꞌapacullan;

shimipis chaquïshamá bïnucta julunanpä übacunäta jalupacullan.

12Illacalpuyalcalñamá malcacunäpi apalcaćhapämun.

Pasaypi piswalpuyalcalñamá yanapaycunanpä ayaycaćhapämun.

Ñatac Tayta Diosꞌa manamá uyaliycunchu.

13“Juyu nunacunaca, acchïpa cuntranmá śhalcapäcun.

Acchïmannüchu manamá cawsapäcun;

allincäta manamari lulaycälinchu.

14Nuna wañuchicücämá manaläpis aylliptin

śhalcamun wacchacunäta, mana cäniyücunäta wañuchinanpä;

tutanpañatacmi suwacuyta ćhapan.

15Mansibäduca tutalpunantamá alcayan;

cäranta täpacuyculmá: ‘Manam mayanpis licamanꞌachu’ niyanlä canpis.

16Suwacunaca tutanpamá wasicunäman yaycapäcun;

muyunpañatacmi ichá puñupäcun.

Acchïta manamari licaytapis munapäcunchu.

17Paycunapá itiwyayäcämi muyunnin cayan;

sumä itiwyayäcätamá ama-pacha nipäcun.

18“Má, mana allin nunacunacá yacućhu pushumaycänümá chincaculcan;

awari, ćhaclancunapis mana allinllaćhüñamá cayalcan.

Üba lantancunaćhüpis manañamá mayanllapis lulapäcunñachu.

19Maynümi acachaycäwan usyaca ñïbïta chulluchin;

chaynümari sipultüraca mana allin nunacunäta chincachin.

20Paycunacta quiquinpa mamancunapis unꞌälälinꞌamá.

Culucunämá mishquillacta micucülunꞌa;

manañamá mayanpis yalpalcunꞌañachu.

Lanta cuchüśhanüñamari capäcunꞌa.

21“Mana wawiyu, mana pïllanpis limalcapünin cä walmicunätamá watyalayalcan;

japanyäśha walmicunäta manamari yanapaycälinchu.

22Ñatac Tayta Diosꞌa sumä munayninwanmi

lluy munayniyütucücunäta camacaycülun.

Tayta Dios lulaycuptinꞌa manamá mayanpis ayinmanchu.

23Tayta Diosꞌa caćhaycun: ‘Sigürum cayá’ nil pinsapäcunanpämi.

Chaynu pinsapäcuptinpis imanuy cawsapäcuśhantapis Tayta Diosꞌa licapayanmá.

24Masqui mana allin nunaca altuman juluycuśha cayalpis,

ñawi imchiycuyllaćhümá chincacun; chutäśha ulanümá awïlälin;

trïgup ispijan tiquïshanümá licalïlälin.

25“Chayurá ¿Cay nishäca manachun chaynu imamá?

¿Mayantá ‘manam chaynüchu’ nil nimanman?” nil.