Proverbios 28 - Old Testament Quechua Wanca（QVW）

1Juyu mana allin nunacunacá mana aticaćhaśhapis ayicaćhayalcammi;

allin nunäñatacmi ichá liyunnu jawca śhaycuycun.

2Nasyunćhu mana allinllaña captinꞌa juc-juc mandacücunam pasapäcun.

Yaćhayniyu, tantiayniyu mandacü captinñatacmi ichá allin tacyaycun.

3Waccha nuna puydïman ćhälul waccha-masinta ñacachïcá,

cusichacta camacaycü sumä lücu tamyanümá cayan.

4Camachicuyta jalutacuyꞌa juyu mana allin nunacunäta alawaymi.

Camachicuyta cäsucuymi ichá juyu nunacunap cuntran cay.

5Juyu nunacunaca tincüninman lulaycuy ima caśhantapis manamá tantiapäcunchu;

Tayta Diosta ashiycücäñatacmi ichá lluyta tantiapäcun.

6Rïcu calpis tincüllanman mana lulaycü caypïtá,

mas allin wacchalla calpis tincüllanman allin lulaycü caymi.

7Yaćhayniyu chulicá camachicuy nishanta cäsucunmá;

juyu walaśh-masincunawan pulicücá taytanpa pinꞌayninmá.

8Imactapis mañaycul achca puliynintinta mañayninwan

rïcuyäcá, wacchacunacta llaquipaycü nunäpämá juntuyan.

9Yaćhachicuyta mana cäsucü nunap,

mañacuyninta Tayta Dios millachicunmá.

10Allin nunacta mana allin caminuman jitaycücá,

quiquinpa trampanmanmi palpunꞌa.

Allin luläcäñatacmi ichá allincäta ćhasquiycälinꞌa.

11Rïcuca yaćhayniyütucunmi;

waccha tantiayniyücäñatacmi ichá imanuy caśhantapis tantiaycun.

12Allin luläcunaca mandacüman ćhaptinꞌa fistachaculcanmi;

mana allin nunacunaca mandacüman ćhaptinñatacmi ichá

lluy-lluy nunapis pacaculcan.

13Juchanta pacacüca manamá imaćhüpis allinman yaluycunꞌachu;

juchanta willapacul wanacücäñatacmi ichá pampachaycuśha canꞌa.

14Tayta Diosta imaypis manchacücäpá maynu cushicuymi canꞌa;

lumi śhunꞌuyücäñatacmi ichá mana allinman ćhanꞌa.

15Juyu mana allin mandacüca, waccha nunacunäpä cayan piñäśha liyunnu,

micuypi wañuyä ucumälinümari.

16Mana yaćhayniyu puydïca malcanta ñacachinmá.

Quiquillanpä imactapis mana allinllawan tawacuyta ćhïnicücämi ichá achca wata allin cawsaycunꞌa.

17Nuna wañuchïca wañunancamamá jawcayayta mana talil aticaćhaśha canꞌa;

manamá pipis śhalcünin canꞌachu.

18Allincäćhu pulïca imapïpis salbaycuśhamá canꞌa.

Mana allincäćhu pulïcäñatacmi ichá ñacayman unꞌaypi palpunꞌa.

19Ćhaclanćhu lulacücäpa micuynin imaypis cayanmá.

Mana cäcunallaman muspapacücäñatacmi ichá wacchalla caycälinꞌa.

20Chalapacuna nunaca allincätamá achca-achcacta ćhasquiycunꞌa;

rïcuyayllapi wañupacücá ñacaycunallactamá ćhasquiycunꞌa.

21Waquin nunallaman śhalcuy manamá allinchu;

waquincuna partin tantallapäpis cuntran śhalcuyalcanmari.

22Quiquillanpä imactapis munäca rïcuyaypïmá wañupacuyan;

manamá yaćhanchu pasaypi wacchayayman lishantá.

23Janä śhunꞌullanwan alawaycü nunapïtá,

anyapäcämi allipi-allipiꞌa allinpä licaycuśha canꞌa.

24Mayanpis mamanpi taytanpi suwaculcul:

“Cayllá imallamá” nïcá, nuna wañuchicünümi cayan.

25Ambisyacuyca pilyayllactamá śhalcachin;

Tayta Diosman chalapacücäñatacmi ichá imaćhüpis allin caycunꞌa.

26Quiquillanman chalapacücá luclum;

tantiaywan cawsaycücäñatacmi ichá libraycuśha canꞌa.

27Wacchacunäta yanapaycücá manamá pishipacuyta lisiycunꞌachu;

yanapayta mana munäcäñatacmi ichá mana allinćhu camacanꞌa.

28Mana allin nunacuna mandayta allaycuptinꞌa nunacunaca pacaculcanmi;

chincacuptinñatacmi ichá allin nunacunaca allinña cawsapäcun.