Zacarias 7 - Old Testament Quechua Wanca（QVW）

Llaquipayniyu cuyacuyniyu capäcunantam Tayta Dios alcaycun

1Mandacü Dariop tawa wata, Quisleu nishan isun quilla, tawa muyun mandacuyninćhümi Zacariasta Tayta Dios limapäla.

2Chay timpućhümi Bet-el malcaca caćhala Sarezerta, Regem-melecta, chaynütac nunancunactapis,

3sumä munayniyu Tayta Diospa alawana wasinćhu sirbï sasirdüticunäman, willacücunäman caynu nil: “Tayta Diosman aśhuycälilꞌari niycälillämay, ¿watan-watan lulapäcuśhänüchun cay picha quillaćhu, jinalla punta alawana wasipi waꞌapäcuśhälä, micuytapis manalcapäcuśhälä?” nil.

4Chayćhümi sumä munayniyu Tayta Dios niman:

5“Jinantin Judaćhu cäcunätawan sasirdüticunäta niycamuy: ‘Cay anćhish ćhunca (70) watantin, picha quillaćhu, chaynütac anćhish quillaćhu waꞌapäcul, ayunapäcul, ¿munaśhämannüćhá ayunapäculanqui aw?

6¿Manachun miculpis, upyalpis patallayqui-laycu micapäculanqui, upyapäculanqui imamá?

7¿Manachun punta willacünincunawan Tayta Dios unaypïta chaynu willacula imatá? ¿Manachun Jerusalenćhu nunacuna junta yaćhayalcaptin jinaman jawcalla cayalcaptin nila imamá? ¿Manachun muyülïnin malcacunäćhu, Neguev lädućhu, Sefela lädućhüpis junta yaćhayalcaptin nila imamá?’ ” nil.

8Chaypi mastam yaꞌa Zacariasta Tayta Dios niman:

9“Sumä munayniyu Tayta Diosmari caynu nin: ‘Cäraycälilꞌa rasuncämannu cäraycäliy; quiquiqui-pula llaquipänacaycäliy, cuyanacaycäliy.

10Japanyäśha walmicunäta, mana taytayu-mamayücunäta, wacchacunäta, chaynütac juc caśhtacunätapis ama ñacachipäcuychu. Nuna-masiquita mana allin lulayta amari śhunꞌuyquićhu uywayaychu’ nil.

11Niyaptinpis paycunañatacmi ichá mana uyalïtuculcälachu. Muyucalcälilmi cullu linlicaycälila.

12Sumä munayniyu Tayta Dios punta willacünincunawan Ispiritunpa willacachishanta, camachishanta mana uyalïtuculcänanpämari śhunꞌuncunacta anä lumictanülä lumiyachipäcula. Chaynu lulapäcuptinmá sumä munayniyu Tayta Dios piñacüla.

13Chaymari sumä munayniyu Tayta Dios caynu nila: ‘Maynümi limapaptí paycuna mana cäsütucalcämälachu, chaynümi yaꞌapis mañacuyninta mana cäsulächu.

14Aśhwanpam mana lisishan nasyuncunäman sumä waywanu chiꞌichilá. Jinaptïmi allpancuna pasaypi chunyäman muyuptin manaña mayanpis chayninpa pulipäculañachu. Chaynüpamari chay sumä allin nasyunninta mana cäman muyülächila’ ” nil.