Ezequiel 38 - Old Testament Quechua Wanca（QVW）

Gogpa cuntran willacunanpämi nin

1Chaypi Tayta Diosmi caynu niman:

2“Wañucülla nuna, Magog lädućhu cä Gogman, chay Mesec, Tubal läducunap puydïninmanꞌari ñawiquita ćhulaycul paypa cuntran willacamuy.

3Yaꞌa Tayta Dios nishätari caynu niycuy: ‘Mesecpa, Tubalpa puydïnin Gog, ampa cuntrayquim cayá.

4Amtamá cutichishayqui. Caquichcuyquipi ganchucunawan chalaycachilmari lluy pilyäniquicunactawan juluśhayqui. Chaynütac cawalluyquicunactapis sillädantin-camactamá juluśhä. Awari, armayüta, ispädayüta, jatun tacsha atajachicuyü-camactamá juluśhä.

5Amwantacmá Persia, Cus, Fut läducunäpis atajachicuncunawan, cascuncunawan-cama liwshipäcuśhunqui.

6Chaynütac Gomer lädupi lluy pilyänincuna, nurti lädup manyanćhu cä Togarma läducunäpis pilyänincunawan, jinaman achca malcacunapis amcunactamari liwshipäcuśhunqui.

7“ ‘Am Gog, uyat-uyatmi caycunayqui. Ampa maquiquićhu lluy cäcunäpis listullañamá capäcunayqui.

8Achca watacuna pasäluptinmi gïrraćhu caśhanpi allinpacuyä nasyunta duyñuchacuycunayquipä nishayqui. Achca timpu pampaman muyüchisha cä malcaman yaycunayquipämari nishayqui. Chay achca malcacunapi julaycamuptin cananꞌa Israelpa ulꞌuncunaćhüña allin jawca yaćhäcunäman yaycunayquipämari nishayqui.

9Chaymanmi yana pucutay sumä ñitiycücänu yaycapäcunqui. Lluy pilyäniquicunawan liwshïniqui malcacunawanmá lücu tamyanu jinantin nasyunman yaycapäcunqui.

10“ ‘Yaꞌa Tayta Diosmi niyá: Chay muyun imaymana lulaycuna umayquiman ćhämuptinmi mana allin lulaycunaman pinsal ninqui:

11“Paycuna mana murällayu, mana puncuyu, mana sigüruyu, chalapacälälisham cayalcan. Chay allin jawca cawsä malcanman lilculmari camacaycämushä.

12Yaycuyculmá ima cänincunactapis apacamuśhä. Pulumäśha malcacta, achca malcacuna juntunacuycul śhalcachishancämanmá yaycüśhä. Achca uywayu, lluy ima cäniyu, cay pachäpa ćhawpinćhünülä cayäcämanmari yaycüśhä” nil.

13Ñatac calućhu cä Saba, Dedan nishan läducunaca, jinaman Tarsis lädu nigusyanticunaca lluy puydïnincunawanmi nipäcuśhunqui: “Amcuna, ¿suwacüchun śhapämulanqui imatá? ¿Pilyäniquicunacta juntülunqui illaynïcunacta, ürücunacta, uywäcunacta, ima cänïcunactapis apaculcänayquipächun imamá?” ’ nil.

14“Chaymi am wañucülla nuna, Gogta caynu willaycunqui: Tayta Diosmi niyäśhunqui: Israel malcá jawcallaña cawsapäcuśhanta yaćhälulmi,

15nurti lädupi śhamunqui. Amwantacmi sumä-cama allin pilyäcunapis sillacälälisha-cama achca-achca śhapämunꞌa.

16Pampäman pucutay taycücänümá Israel malcäman yaycapäcunqui. Timpuca ćhämuptinmari am Gogta puśhamuśhayqui malcäpa cuntran canayquipä. Chaynüpam nasyuncunäćhu chuya caśhäta lisichicuśhä.

17“Yaꞌa Tayta Diosmi ní: ¿Ampïta manachun Israelpa cuntran śhamunayquipä una-unaypïtaña willacünïcunawan willacachimulá imamá? ¿Manachun paypa cuntran śhalcunayquipä willacünïcuna nila imatá?

18“Chayurá yaꞌa Tayta Diosmi ní: Israel malcacta camacaycünanpä Gog duyñuchacuycunan muyunmá piñacuyní sumä-sumä walälunꞌa.

19Chaynu piñacuyní latayaptinmá Israel malcäćhu sumä pacha cuyuy caycunꞌa.

20Jinaptinmi lamarćhu cä challwacunapis, imaymana pälïcunapis, munti uywacunapis, śhullwaypa pulïcunapis, jinantin pachäćhu cä nunacunäpis chucchupäcunꞌa. Chaynütacmi ulꞌucunäpis, aꞌacunäpis palpapämunꞌa; lluy murällancunapis tunïlälinꞌamari.

21Gogpa cuntranmá lluy ulꞌucunäćhu gïrracta śhalcachishä. Pilyänincunapis quiquin-pulamá wañuchinaculcanꞌa. Yaꞌa Tayta Diosmari niyá.

22Gogta yaꞌamari ishyaywan, wañuywan cäraycuśhä. Payman, pilyänincunaman, lluy liwshïnincunamanpis lücu tamyacta, luntucta, asufriyu ninactamá ćhächishä.

23Chaynüpamá sumä caynïta, chuya caynïta camalachicuśhä. Achca-achca nasyuncunaman lisichicuptïmá Tayta Dios yaꞌa caśhäta yaćhapäcunꞌa.