Isaias 3 - Old Testament Quechua Wanca（QVW）

Juda läductam Jerusalen malcantinta cäraycun

1Awari, sumä munayniyu Tayta Diosmari,

Juda lädup, Jerusalen malcap yanapäninta, puydïninta julülunꞌa.

Mana yanapäniyütaña caćhaycüluptinmari

mana yacuyu, mana micuyniyüña quïdälälinꞌa.

2Sumä-cama mana pilyäniyüta,

mana cachacuyüta, mana fisniyüta,

mana willacüniyüta, mana licacüniyüta,

mana yaśha nunayütamari caćhaycülunꞌa.

3Chaynütacmi pilyäcunap mana puydïniyüta,

allinpä licaśha mana nunayüta, mana tantiachi nunayüta,

mana yaćhayniyüta, allicamacta lulä mana nunayüta,

jinaman mana licacüniyütapis caćhaycülunꞌa.

4Jinalculmi müsucunällacta puydïninpä yaꞌa Tayta Dios ćhulaycuśhä;

walaśhchacunallamá mandacünin canꞌa.

5Nunacunaca quiquin-pulam ñacachinaculcanꞌa;

apanacüpulamari ñacachinaculcanꞌa;

müsucunämi awquishcunäta palapäcunꞌa;

mana licaytapis munaśha nunacunämi

allinpä licaśha nunacunäta mana allinpä licapäcunꞌa.

6Chaynütacmi papäninpa wasinćhu cä wawꞌi-caśhantapis chalalcul ninꞌa:

“Amꞌa allin müdanayülämi cayanqui.

Cay pampaman muyüchisha cäcunäta

śhalcachinayquipä puydïniꞌari caycuy” nil.

7Niptinmi limalicunꞌa:

“¿Imanuypatá yaꞌa atipälüman

wasïćhu micuynïpis, müdanäpis mana cayaptinꞌa?

Cay nunacunäpa puydïnin canäpä ama ćhulamaychu” nil.

8Awari, lluy paycuna Tayta Diospa cuntran limapäcul,

lulapäculmi sumä cayninta jalutacälälin.

Chaymá Juda lädu pampaman muyülunꞌa;

Jerusalen malcanpis pulumäśham canꞌa.

9Mana allin lulaśhancunactamá cäran camalaycachin.

Sodoma lädu nunacunänümá juchancunacta aläjapä licachipäcun.

Manamá pacaycuyllapis pacaycälinchu.

¡Ay, imanuylä paycuna capäcunꞌa!

Quiquillancunamá mana allinninta ashicälälin.

10Allin cawsayniyu nunacunätañatac niycuy:

“Lluy ima lulaśhayquipis allinmi yaluycunꞌa.

Allinta lulaśhayquipïmá allin cawsaycunqui” nil.

11¡Ay, imanuylä capäcunꞌa mana allin nunacunacá!

Mana allin lulaśhanman tincütamá ćhasquipäcunꞌa.

12¡Ay, malcallay malca! Walaśhcunallamá ñacachipäcuśhunqui;

walmicunallamá mandapäcuśhunqui.

Puydïniquicuna ingañapäcuśhunquimá;

mana allin caminupmá puśhapäcuśhunquipis.

13 Tayta Diosñatacmi dispächunćhüña

taycuycun malcanta cäraycunanpä.

14 Tayta Diosmari malcanćhu

yaśhancunactawan puydïnincunacta cäraycunꞌa caynu nil:

“Üba lantanu cä israelcunätamá amcuna camacaycülunqui;

wacchacunäta waycamuśhayquicunaca wasiquićhümá cayan.

15¿Imaniltá malcäta chaynüpaña ñacachiyta ćhapalanqui?

¿Imaniltá wacchacunäta chaynüpaña usuchiyta ćhapalanqui?

Sumä munayniyu yaꞌa Tayta Diosmari niyá” nin.

Jerusalenta mućhuycachinanpämi nin

16Chaynütacmi Tayta Dios nin:

“Sionćhu cä walmicunaca nunatucüśhamá capäcun;

chütipacüśham pulipäcun;

ñawinwanpis ñuquicaćhaśhtinlämi imchipaycun;

pulipäculpis iwicaćhaśhtinlämi pulipäcun,

ćhaquinćhu adurnu śhalśhalyänanpäpis ićhicaćhaśhtinlämi pulipäcun.

17Chaymi yaꞌa Tayta Dios, Sionćhu cä walmicunäpa ächanta lutüśhä;

pinꞌayninpämi calallacta lluy ćhulaycüśhä” nil.

18Chay muyunmi lluy adurnuncunacta Tayta Dios chincachinꞌa:

ćhaquinćhu cä adurnucunacta, binchanilänincunacta, quillanu cä cullarnincunacta,

19arïtincunacta, pulsïrancunacta, śhucupacuncunacta,

20umanćhu adurnuncunacta, ćhaquinćhu aläjancunacta,

ganchuncunacta, butillachaćhu mishqui aśhnä pirfümincunacta, amulituncunacta,

21surtijancunacta, sinꞌanćhu arïtincunacta,

22fistapä sumä-cama müdanancunacta,

catancunacta, śhucupancunacta, luncuncunacta,

23ispïjuncunacta, allin-cama lïnuncunacta,

uma watacuncunacta, umanćhu adurnuncunactapis chincächinꞌamá.

24Chayurá mishqui pirfümi aśhnay caśhanpïtá millachicuy aśhnayllañamá cacunꞌa.

Wiꞌaw watacunpis watullañamá cacunꞌa.

Sumä ñächapacüśha caśhanpis siplay-siplay cala umallañamá canꞌa.

Alli-cama müdananpis shicacü lataśh müdanacunallañamá cacunꞌa.

Tuquish-tuquish caśhanpis caldaya jïrruwan lupachishanüñamá canꞌa.

25Umricunaca ispädawan wañüchishañamá capäcunꞌa;

alli-cama nunayquicunamá pilyaćhu wañupäcunꞌa.

26Malcap puncunćhu llaquicuycunalla, waꞌacuycunallamá cacunꞌa.

Jitäśha walminümá llaquicuypi pampäćhu täcuyal Jerusalen canꞌa.