1Chaypïtam Moisesta Tayta Dios nin:
2“Israel caśhtacunäta caytam ninqui: Mayan Israel caśhtapis, ütac amcunaćhu yaćha juc caśhtapis taytacha Molocman jucnin chulinta uycücá wañunꞌam; chay malcaćhu nunacunämari tamshälälinꞌa.
3Chay nunawan sumä piñacülulmi malcäpïta chincächishä. Caynu lulaśha jucnin chulinta chay Molocman uycuśhanwan chuya cuartüta, chuya caynïta anlaman muyulcachil jalutacuśhanpïtamari.
4Sïchuśh chay nuna, chulinta taytacha Molocman uycuśhanpi malcaca upatucuycul mana wañuchipäcuptinꞌa,
5yaꞌa quiquïmi chay nunawan lluy ayllunwanpis piñacülul malcapïta chincächishä. Manam payllactachu sinuꞌa paywan cusca Molocta alawayninwan waticanu lulaśhanpïtamari chincächishä.
6“Chaynütac mayanpis almacunäman, licacücunäman liyninwan waticanu lulaśhanpïta yaꞌam piñacüśhä. Jinalmi malcäpïta chincächishä.
7“Yaꞌa Tayta Diosniqui cayaptïmi amcuna japächäśha chuya capäcunayqui.
8Camachicuynïmannu cawsaycälil lulayman ćhulaycäliy. Yaꞌa Tayta Diosmari japächaycul chuyanchaycapäcuc.
9“Mayanpis taytanta ütac mamanta mana allinta nilꞌa wañunꞌam.
11“Mayanpis papäninpa walminwan cayäcá taytantam jalutacuyan chaymi pulanpis wañuchisha canꞌa; quiquinpa wañuynintamari ashicälälin.
12“Mayanpis llumchuyninwan cälulꞌa pulanmi wañuchisha capäcunꞌa. Anla lulayta lulapäcuśhanpïmari quiquillan mana allinninta ashicälälin.
13“Mayanpis umri-masinwan walmiwannu cäcä pulanmi wañuchisha capäcunꞌa. Millachicuy anla lulayta lulaśhanpam quiquillancuna wañuyninta ashicälälin.
14“Mayanpis walminta mamantinta uywäcá anla lulaytam lulälun. Chaymi amcunaćhu chay anla lulaycuna mana cananpä quimsanta cañälälinqui.
15“Mayan umripis uywawan cäluptin, pulanmi wañuchisha capäcunꞌa.
16“Mayan walmipis uywawan cäluptin, pulanmi wañuchisha capäcunꞌa; quiquincunamari wayuyninta ashicälälin.
17“Mayanpis taytapi ütac mamapi cä paninwan cuscälulꞌa anla pinꞌay lulaytam lulälun. Chaymi malcap ñawquin wañuchisha canꞌa. Paninwan cuscaśhanpam juchanpa wayuyninta quiquillan ashicülun.
18“Mayanpis quilla ishyacuyninćhu cä walmiwan cälulꞌa yawarnintam licälälin. Chaymi malcapïta pulan chincächisha capäcunꞌa.
19“Amatacmi papäniquip paninwan ütac mamayquip ñañanwan canquimanchu. Ayllunwan caśhanpam juchanpa wayuyninta pulanpis ashicälälin.
20“Mayanpis tiyanwan cälulꞌa tiyuntam jalutacuyan. Chaymi pulanpis mućhuchicuyninta apapäcul mana chuliyu wañupäcunꞌa.
21“Mayanpis wawꞌi-caśhanpa walminwan cuscälulꞌa wawꞌi-caśhantam jalutacuyan, millachicuy lulayta lulaśhanwan. Chaymi pulanpis mana chuliyüña capäcunꞌa.
22“Cay camachicuynïcunacta, yaćhachicuynïcunacta lulayman ćhulaycul cawsaycäliy. Chayćha yaćhapäcunayquipä puśhaśhä malcaca mana ätupäcuśhunquichu.
23Chay alupacuśhá malcap anla lulaynincunacta amari atichipäcuychu. Chaycunacta lulapäcuśhanpamari yaꞌa millachiculá.
24Chay malcancunam amcunap malcayquicunaña canꞌa. Chay imaypis tuqui-tuquicta wayuycachï allpacta yaꞌa quiquïmi maquiquiman tücäniquipä ćhulaycamuc. Yaꞌa Tayta Diosniquim juc malcacunäpïta japächaycüniqui cayá.
25Chaymi mayannin anla uywa, anla pälï caśhanta ütac chuya uywa, chuya pälï caśhantapis lisiycälinayqui. Chaymi anlapä unanchaśhä uywawan, pälïwan, nï ima śhullwaypa pulïwanpis anlaculcänayquichu.
26Yaꞌa Tayta Diosniqui chuya caśhäpam amcunapis chuya capäcunayqui. Jinaman lluy malcacunapi japächaycälilac yaꞌallapä capäcunayquipämari.
27“Mayan wayapapis ütac walmipis wañücunacta ütac licacücunawan licachiculꞌa wañuchisham canꞌa. Quiquin wayuyninta ashishanpamari tamshaywan wañuchisha canꞌa” nil.
Who We AreWhat We EelieveWhat We Do
2025 by iamachristian.org,Inc All rights reserved.
