Proverbios 25 - Old Testament Quechua Wanca（QVW）

Salomonpa juc yaćhachicuynincuna

1Caycunapis mandacü Salomonpa juc limapaynincunamá. Caycunacta Juda lädup mandänin Ezequiaspa isquirbïninmá isquirbila:

2Sumä cayninta Tayta Diosllam pacalächin tantiaycuśha cananpä.

Chay pacaläcäta mandacücämi tantiaycunan.

3Sïlüpa altun, allpäpa lulin mayćhu caśhantapis manamá pipis tantianchu.

Chaynümá mandacücäpa śhunꞌunćhu ima caśhantapis nï pipis tantianchu.

4Illaycäta chulluycachil anlanta julunchic,

luläca tuqui bäsucta juluycunanpämari.

5Chaynuꞌari mandacücäpa puntanpi mana allin nunacunäta wicapay;

chayćha gubirnunćhu tincüllanman licaycuyca tacyaycunꞌa.

6Mandacücäpa puntanćhu cayal ama alawacucuyaychu;

sumä cäcunäpa ćhawpinćhu canayquipä ama śhatipacuychu.

7Yanꞌalmi “aśhucuy” nishuptiqui puydïcunäpa ñawquin pinꞌayćhu canquiman.

Mas allin canman quiquin mandäca:

“Cayman śhamuy” nishuptiquimá.

Mayanpa ima lulaśhantapis licälul

8quijacamüña ama pasayaychu.

Yanꞌalätac nuna-masiqui “manam chaynüchu cala”

nishuptiqui pinꞌayćhu quïdälunquiman.

9Nuna-masiquiwan imaćhüpis mana awninacul ruyduyalꞌa,

mayanpis chalapacul willaśhuśhayquita ama willapacuyaychu.

10Uyalïca yanꞌalmi pinꞌayman ćhulaycuśhunquiman;

jinaptin waśhalimapä licaśhañaćh imaypis caycunquiman.

11Timpullanćhu allin limapaycuycá,

illaypi cä canaśhtaćhu üru mansananümá.

12Yaćhayniyu anyapaycuśhancäta uyalicü nunapá

ürupïta cä surtijanu, cullarnümá cayan.

13Caćhacuśhan chalapacuna nunaca caćhäninpá,

usya timpućhu laśhta laśhtamücänülämá cayan.

Duyñunpä sumä cushicuyninmá cayan.

14Uycunanpä limalicuyalpis imallactapis mana uycücá,

yana-yana pucutayalpis nï śhutuy yacullactapis tamyamücänümá.

15Pasinsiawan cäcá maynu piñäśha puydïtapis jawcayaycachinmá;

tuqui shimillawan limaycá lumi śhunꞌuctapis llampuyaycachinmá.

16Urunwaypa mishquinta talïlulꞌa atipäśhallayquita micucuycuy;

anchap micucüluptiquiꞌa ätüchishunquimanmá.

17Lisinacuśhayquiman amari cutiticlaylla liyaychu;

yanꞌalmi amïlul ćhïnipäśhunquiman.

18Nuna-masinpa cuntran yanꞌalpi tistïgunu śhaycücá,

martillunu, cuchillunu, flïchänümá cayan.

19Llaquicuyćhu cayal ishcay cära nunaman chalapacuyca,

nanayä quilunwan micuyäcänümá,

paquïsha ćhaquinwan puliyäcänümá.

20Llaquićhu cayaptin taquicunacta taquipaycá,

irïdanman puchucü binagricta jillpuyänümá,

calanllanta alalayćhu pulichïcänümá.

21Ćhïnicüniqui micuypi cayaptinꞌa micuyta uycuy;

yacupi cayaptinpis yacucta uycuyꞌari.

22Chaynu lulayculmá pampäćhu cärantapis cachinqui.

Tayta Diosmari amta cutiycachishunqui.

23Maynümi nurti lädu pucutayca tamyacta apamun,

chaynümi waśha limäcunaca pictañapis piñachin.

24Pilyayllacta ashï walmiwan tuqui wasićhu cawsaypïtá,

chucllallaćhu japallan yaćhaypis mas allinmá canman.

25Calu malcapïta ćhämü allin willacuyca cayan,

yacupi shimipis chaquilpuyaptin yacu ćhämücänümá.

26Allin nunaca, mana allin nunap munaśhanta awniycücá,

chuya pucyucta putcaman muyuchishancänümari cayan.

27Urunwaypa mishquinta anchap micuy manamá allinchu;

manatacmá allinchu altuman juluycuśha canapä wañupacuypis.

28Quiquinta sujitacuyta mana atipäcá,

mayanpis yaycunanpä mana murällayu libri cayä malcanümá.