Proverbios 9 - Old Testament Quechua Wanca（QVW）

¿Yaćhayniyüchun icha lucluchun?

1Yaćhaycämi wasinta śhalcächin;

anćhish paradïruncunactam labrälun.

2Uywancunactam cumbidupä wañüchin;

allinnin bïnuctapis alistayculmi mïsaman lluy ćhulaycülun.

3Jinalculmi uyway walmicunäta caćhalcul

malcap altunninpi ayaycaćhachila:

4“Mana tantiayniyücuna cayman śhapämuy” nil.

Chaynütacmi mana fisyuyücunätapis ayachimula:

5“Lulachishá micuyta micü śhapämuy;

alistaśhá bïnucta upyä śhapämuy.

6Allin cawsapäcunayquipä luclu-cayniquita caćhaycapäcuy;

tantiayniyu nunacunänu pulipäcuy” nil.

7Allintucücunäta anyapaptiqui palaśham canqui;

juyu mana allin nunacunäta anyapaptiqui jalutacuśham canqui.

8Allintucücunäta limapaycuptiqui ćhïnishamari canqui.

Yaćhayniyücäta anyapaycuptiquiñatacmi ichá cuyaśha canqui.

9Yaćhayniyücäta yaćhaycachiptiquiꞌa mas yaćhayniyümi caycunꞌa;

allin nunäta yaćhaycachiptiquiꞌa mas allin umayülämi caycunꞌa.

10Yaćhayniyu cayta allaycunapä Tayta Diostamá manchacunanchic;

Chuya Tayta Diosta lisïcämá tantiayniyu.

11Yaꞌa yaćhaycämi achca muyuncuna uywaycuśhayqui,

achca watacuna cawsaycachishayquipis.

12Yaćhayniyu captiquiꞌa ampa allinniquipämá caycunꞌa;

yaćhaycäta jamuyaptiquiñatacmi ichá ñacayniquipä caycunꞌa.

13Luclu caycá piñacuyllactam śhalcachin;

mana tantiayniyu, imactapis mana yaćhä walminümi.

14Wasinpa puncunćhu täcunaman taycucuycul

malcap altunninćhu taycucuyculmi,

15caminup pasäcunäta,

allincäpa lïcunäta ayaycaćhayan:

16“Mana tantiayniyücuna cayman śhapämuy” nil.

Chaynütacmi mana fisyuyücunätapis nin:

17“Suwaśha yacuca mishquillamá;

pacallap micuśha tantaca tuquillamá” nil.

18Ñatac chaycuna manamá yaćhanchu chayćhu wañuyca caśhanta;

ayachishancunaca manamá tantianchu

wañuypa śhunꞌunman apaycuśha caśhanta.