Proverbios 14 - Old Testament Quechua Wanca（QVW）

1Yaćhayniyu walmica wasinta allintam tacyachin;

lucla walmicunäñatacmi ichá quiquillan mana cäman muyuchin.

2Allin cawsayniyücá Tayta Diosta manchacunmi;

mana allin cawsaycücäñatacmi ichá licaytapis nï munanchu.

3Luclucunäpa shiminpi nunatucuycunalla yalamüca garutinümá;

yaćhayniyücätañatacmi ichá limaynin imapïtapis licaycun.

4Mana yunda captinꞌa pilwapis pulumäśhamá cayan;

yundap callpanwanlämi cusichapis achca.

5Rasuncällacta limäcá ima licaśhanpi niyculpis caśhancällactamá limaycun;

artishcunäñatacmi ichá licaśhanpi artinwan niycun.

6Jamuyäcunaca yaćhayta ashipäculpis manamá talipäcunchu;

tantiayniyücäpäñatacmi ichá yaćhayca talipaśhlla.

7Luclu nunäpïta aśhucuy;

paypa shiminćhuꞌa manamá ima yaćhayllactapis talinquichu.

8Yaćhayniyu nunacá imanuy cawsaśhantapis tuquictamá tantiacuycun;

sumä-sumä luclu nunätañatacmi ichá arti caynin pantalpachin.

9Luclucunacá mana allin lulaynincunapi asicaćhapäcunlämi;

allin nunacunäñatacmi ichá allin apanacul cawsaycälin.

10Ima llaquicuynintapis śhunꞌullanmá yaćhan;

cushicuynincunacta manamá juc yaćhaycunmanchu.

11Juyu mana allin nunaca wasintinmi pampaman muyuchisha canꞌa;

allin nunäñatacmi ichá wasintin allin caycälinꞌa.

12Nunacunäpa pulishan caminuca quiquillanpá allinnümá cayan;

ñatac chay caminu wañuycämanmá ćhäyächin.

13Mishquicta asicuptinpis waquincunapá śhunꞌunćhu nanaymi cayan;

cushiculpis sumä llaquicuyćhümá cayan.

14Mana tantiayniyüca mana allin lulaśhanpïmá cushicun;

tantiayniyücäñatacmi ichá allin lulayninpi cushicun.

15Mana tantiayniyüca ima nishantañapis awniyanmá;

sumä-sumä tantiayniyücäñatacmi ichá tuquictalä licaycul imactapis lulan.

16Yaćhayniyüca manchacuywan cawsalmi mana allincäpi ayicun;

luclütañatacmi ichá nunatucüśha cayaptin imapis mana ucunchu.

17Imallapïtapis juclla piñacücá luclunümi mana allinta lulan;

juyu nunaca ćhïnishamá capäcun.

18Mana tantiayniyücunaca luclu cayllactamá uywapäcun;

tantiayniyücäñatacmi ichá yaćhaycäwan sumä-sumä waytaycachisha canꞌa.

19Juyu nunacunaca allin nunacunämanmi uyshuycälinꞌa;

mana allin nunacunaca chuya nunacunap wasinpa puncunmanmi uyshuycälinꞌa.

20Waccha nunäta lisinacuśhancunapis manañamá licaytapis munapäcunchu;

rïcu nunätam ichá mayanñapis cuyapayalcan.

21Nuna-masinta mana llaquipäcá juchactam lulayan;

waccha nunäta llaquipaycücäñatacmi ichá sumä cushisha canꞌa.

22Mana allinta lulay munäcunaca pantapäcunmá;

allin lulayta munäcunäñatacmi ichá cuyacuytawan chalapacuna caycäta taliycälin.

23Callpanwan luläcunacá imallactapis taliycälinmi;

limaylla-limäcäñatacmi ichá wacchayayllacta taliycälin.

24Yaćhayniyücäpá yaćhayninmi curunannu;

luclüpañatacmi ichá luclu caynin adurnunnu.

25Tistïgunu śhaycul rasuncällacta limäcá wañuypïmi salbaycun;

tistïgunu śhaycul artishcá ipanchä nunam.

26 Tayta Diosta manchacuywan cawsäcunäpá

mayanman chalapacunanpis cayanñamá;

chulincunapis paymanmi chalapaculcanꞌa.

27 Tayta Diosta manchacuywan cayäcá cawsaytamá talin,

wañuycäpa maquinpïtamá libracun.

28Mandacücäpa maquinćhu achca-achca cayaptinꞌa allinpä licaycuśham;

ashllacta maquinćhu cachiptinñatacmi ichá mana cäpa licaśha.

29Ñacayta piñacücá allin tantiayniyümá;

juclla piñacücäñatacmi ichá sumä luclu cayninta licachicun.

30Allin śhunꞌuyu caycuy aychanchicpä tuqui allinmi;

sumä-sumä wañupacuycäñatacmi ichá tullunchictapis micuyan.

31Wacchacunäta usuchïcá Lulänintamá jalutacuyan;

wacchacunäta llaquipaycücäñatacmi ichá Luläninta altuman juluycuyan.

32Juyu mana allin nunäta quiquinpa lulayllanmi pampaman muyuchin;

allin nunätañatacmi ichá allin lulaynin jawcacta cawsaycachin.

33Tantiayniyu nunäpa śhunꞌunćhümi yaćhayca cayan;

luclucunäñatacmi ichá yaćhaycäta nï lisipäcunpischu.

34Tincüllanman lulayca nasyuntamá altuman juluycun;

juchañatacmi ichá nasyunta pinꞌayman ćhulaycun.

35Yaćhayniyu sirbïcäta mandacüca allinpam licaycun;

suyla cära sirbïcäpäñatacmi ichá piñacun.