1Micuypa janallanćhu cayalpis iwinacuyllaćhu cawsaypïtá
mas allin chaqui tantallacta miculpis jawca cawsaymi.
2Allin tantiayniyu sirbïninca patrunninpa suyla cära chulinpa puydïninmanmi muyun;
chay suyla cära wawꞌi-caśhancunäwanlämá, tücänincunactapis aypunaculcan.
3Crisol nishanćhümá illaycäta rasun caśhanta yaćhaycunapä chulluchinchic;
jurnućhümá üructa chulluchinchic allin cananpä;
nunap śhunꞌuntañatacmi ichá Tayta Dios tuquicta licaycun.
4Mana allin nunaca juyu nunap limapäcuynintamá ćhasquicun;
artish nunaca jamuya nunap nishantamá uyalicun.
5Waccha nunacta jalutacücá Lulänintamá jalutacuyan;
ñacayta pasayaptin cushipäcá mućhuycachishamá canꞌa.
6Awquillucunap curuna-yupay cushicuynin willcancunamá cayan;
chulicunap cushicuynin taytan-mamancunamá cayan.
7Tuqui mishqui limayca luclucunäman manamá tincunchu;
articuycunäpis malcacta mandacücäman manamá tincunchu.
8Imactapis taliyninwan yanꞌalpi uycücá,
imacta lulay munaśhancunapis allinnümá yaluycun.
Chaymi chay uycuśhancunacta allintanüla licanpis.
9Pampachaycü nunaca allinpä apanacuytamá taliycun;
willapacücäñatacmi ichá apanacuśhanwanpis laquinacun.
10Juc piñapayllawanmi yaćhayniyüca tantiacun;
luclüñatacmi ichá masqui paćhac cuti asutiyaptinpis nï tantiacunchu.
11Juyu nunaca pilyullactamá ashiyan;
ñatac juc muyun sumä camacaycücäwan tincuchishamá caycunꞌa.
12Mana tantiayniyüca luclu-cayninćhu śhaycapacücäwan tincuypïtá,
mas allin canman wawinta waycäśha cayal sumä piñäśha ucumäliwan tincuymi.
13Yanapäninta mana allincäwan cutiycachïcätá
wasinta manamá mana allinca caćhaycunꞌachu.
14Quijanacuyta allaycuyca, wićhalayä mayucta quićhayäcänümá;
chayurá manaläpis masman ćhäśhancamamá aśhucuna.
15 Tayta Dios sumä millachicun: juchayücäta allinpä
licaycuśhancäta jinaman mana juchayücäta juchayüpä licaycuśhancätamá.
16¿Imapätá luclüpa illaynin bälinman?
¿Mana tantiayniyu cayal yaćhayta lantïlunmanchun imatá?
17Rasunpa apanacuśhayquicá imaypis cuyacü calmi mana caćhaycuśhunquichu;
ñacaycunaćhüpis wawꞌi-caśhayquinümá licaycuśhunqui.
18Mana fisyuyücämá lisinacuśhanpa mänu cayninpi śhaycuycun;
jinal jucpa pudirnin mänu cayninta cutiycachin.
19Pilyayllacta ashïcá juchactamá cuyan;
limätucücá quiquinpa mana allinnintamá ashicun.
20Mana allinta pinsäca manamá imaypis allincäta talinꞌachu;
pasaypi artishca mana allincämanmá ćhanꞌa.
21Luclüpa taytan llaquicuyllaćhümá cayan;
mana tantiayniyücäpa taytan manamá imaypis cushisha canmanchu.
22Cushisha cawsaycá aychanchicpa jampinmá;
llaquisha cawsaycá aychanchicta chaquiyalpachinmá.
23Tincüllanman cäcäta jucman iwinanpämá
juyu mana allin nunaca pacallap imactapis ćhasquipäcun.
24Allin tantiayniyu nunap yaćhaycällaćhümá ñawinpis cayan;
luclüñatacmi ichá yanꞌalcunacta licaycaćhacun.
25Luclu chulica taytanpa uma nanayninmi;
mamanpa piñachïninmi.
26Mana juchayücäta mućhuchiy manamá allinchu;
allin nunäta asutiy manamá allinchu.
27Yaćhayniyücämá ashllacta liman;
allin tantiayniyücämá ima captinpis upällacuycun.
28Upälla caculꞌa aśhta luclupis yaćhaysapanülämá licachicun;
shiminta wićhacüśhalla caculꞌa, allin tantiayniyünülämá camalachicun.
Who We AreWhat We EelieveWhat We Do
2025 by iamachristian.org,Inc All rights reserved.
