1Israelpa puydïnincunapi cay sumä llaqui taquicta am taquiycuy:
2“Waw, sumä liyunnümá mamayqui liyuncunäpa ćhawpinćhu caculläña.
Liyuncunäpa ćhawpinćhümá wawincunactapis ishpiycachila.
3Jucninta uchuyllanpi ishpïchiptinmá
sumä malta liyunmanña wiñäla.
Chapataytapis yaćhälañamá;
nunacunäta micuytapis yaćhälañamari.
4Paypïta nasyuncunaca uyalïlulñatacmi
trampancunaman palpälächila.
Cadinacunawanmá Egiptoman aysapäcula.
5“Malta liyunca manaña cuticälimuptinmi
maman liyunca: ‘Manañaćh cutimunmanchu’ nil,
jucnin wawintaña sumä malta liyunman ishpïchila.
6Chay malta liyuncämi liyuncunap
ćhawpinćhüña cananꞌa liyun-liyunña cacuyäla.
Chapatayta yaćhälañamá;
nunacunäta micuytapis yaćhälañamá.
7Sumä sigüru cänincunactapis pampamanmá muyüchila;
malcacunactapis camacaycülamá.
Apalcaćhayninwanmá jinantin nasyuncunacta manchachila.
8Ñatac muyülïninćhu malcacunämi cuntran śhalcälälila.
Juc trampacta maśhtaycälilmá
ućhcuman palpälächila.
9Cadinalcul jawlaman wićhayculmá
Babiloniap mandacüninman apälälila.
Apalcaćhaynin Israelpa ulꞌuncunaćhu manaña
uyalisha cananpämá wićhanamanlä apaycächilapis.
10“Chaynütac üba lantacunap ćhawpinćhu
üba lantanümá mamayqui cala.
Mayup patanćhu lantäśhanümá sumä wayuyniyu,
pallaysapa cacula.
11Sumä-cama pallaynincuna
mandacücunäpä bäranpämi allin cacula;
sumä altu-altu pallaysapa-cama wiñälälilmi
lluypäpis uyaypa licapaśhlla cacula.
12Ñatac sumä piñacuywanmá chutäśha cala;
pampaman muyüchishamá cala.
Inti ishpimunan lädupi waywam wayuyninta awïchila;
alli-cama pallaynincunactamá paquïla.
Chaynu chaquïluptinmi ninaca camacaycüla.
13Cananꞌa chunyäcäćhümi lantäśha cayan;
mana yacuyu pasaypi chaqui allpaćhümá cayan.
14Jucnin pallayninpïmá nina latämula;
chay ninam wayuyninta camacaycüla.
Mandacücäpa bäranpa cä sumä-cama
pallaynincunapis manañamá licachillapäpis cananꞌa camalanñachu” nil.
Cayꞌa sumä llaqui taquimari cayan. Chayurá sumä llaqui taqui caśhanmannuꞌari taquiycuy.
Who We AreWhat We EelieveWhat We Do
2025 by iamachristian.org,Inc All rights reserved.
