2 Samuel 14 - Old Testament Quechua Wanca（QVW）

Absalonmi Jerusalen malcaman cutin

1Chaypïtam Sarviap chulin Joab yaćhäla mandacüca chulin Absalonta licaycuypi wañupacuśhanta.

2Chaymi Tecoa lädu sumä atü-yupay walmicta ayalcachimul Joab nin: “Má, llaquićhu cayänümi lutucunqui; pirfümicta amam llusicunquichu. Aśhwanpa una-unaypïña lutucta apaśhayqui walminümi ćhanqui.

3Chay mandacücäman ćhayculmi yaćhachishätanülla niycunqui” nil. Chaynüpam imacunacta limananpäpis Joab yaćhaycachila.

4Chaymi Tecoa lädu walmica mandacücäman yaycuycul pampäcama cärantapis ćhulaycul: “¡Taytallay, yanapaycallämayꞌari!” nin.

5Niptinmi mandacüca: “¿Imam pasäśhunqui?” nin.

Niptinmi walmica: “Wayapá wañucunmi; japanyäśha walmim callá.

6Cay nunallayquip ishcaymi wawin cala. Paycunam ćhaclaćhu maꞌanacuyal mana mayanpis amachänin captin jucnin wañüchin.

7Chaymi lluy ayllücuna cay nunallayquip cuntran śhalcälälin: ‘Chay wañuchicücäta maquïcunaman ćhulaycamuy wawꞌi-caśhanta wañuchishanpi wañuchipäcunäpä. Chaynüpaćh tücänintapis manaña ćhasquinꞌachu’ nil. Chayurá chayllaña chalapacuná cayaptinpis lluyćha chincalpälächinꞌa. Chayćha wayapäpa milayninpis cay pachäpi chincälunꞌa” nin.

8Niptinmi mandacüca: “Wasiquita cuticuy. Chay sasachacuyniqui imanuy canantapis yaꞌami licaycuśhä” nin.

9Niptinmi Tecoa lädu walmica: “Awniycamaptiqui taytallay, cay nunallayquim lluy aylluntin mućhuycäta apaycälishä. Manamá am mandacüca dispächuyquiwan imapi apaycälinayqui canchu” nin.

10Niptinmi mandacüca: “Mayanpis mućhuchiyta munaśhüniquicunactá cayman puśhämuy. Chayćha manaña mastá uchuyllapis yataycuśhunquiñachu” nin.

11Niptinmi: “Mandacü taytallay, wawilläta wañuchiyta munäcunaca manaña masta-masta wañuchinanpä Tayta Diosniquita mañacullayꞌari, sinuꞌa jucnin wawillätapis camacalpülunꞌaćh” nin.

Niptinmi mandacüca: “¡Tayta Dios cawsaśhan-laycu wawiquip manam jucllay ächallanpis pampäman palpuycunꞌachu!” nin.

12Niptinmi walmica: “Mandacü taytallay, ama chaynu callaychu cay nunallayqui masta niycuśhunayquipä awniycallämay” nin.

Niptinmi: “Má, limayꞌari” nin.

13Niptinmi walmica: “Mandacü taytay, cananꞌa shimillayquimá palpächishunqui. ¿Tayta Diospa malcanwan imanuypamá chaynu pinsayanquiman? Chunyäcäćhu cä chuliqui cutimunanta mana munayniquiwanmá caynu ampis cayanqui.

14Taytallay, lluypis wañüllamá canchic. Pampäman yacu jićhaśhacta manaña cutilcachiyta atipäśhanchicnüllamá cayanchic. Tayta Diosñatacmi ichá cawsaycäta quitayta mana munanchu. Aśhwanpa alüśha nunaca payman cutimunanpämari imaymanap yanapaycun.

15“Mandacü taytallay, nunacunaca manchachimaptinmi caycunacta niycü śhamullalá: ‘Mandacücäta willaycamuśhä ichapis mañacuśhäcäta uyaliycallämanman.

16Uyaliycamalꞌa wawïtawan cuscactam libraycamanꞌa chincachimayta munä nunacunäpïta. Chaynüpaćh Tayta Dios tücachimäśhanćhu quïdaculcäśhä’ nil.

17Jinaman pinsalätacmi: ‘Mandacüní Diospa anjilnin-yupay allincätawan mana allincäta tuquicta lisiyalꞌa niycamäśhanca jacyalpachimanꞌaćh’ nil. ¡Tayta Diosniqui amwan caycuchun!” nin.

18Niptinmi mandacüca: “Cananmi imallactapis mana pacaycullal tapuśhäta niycamanqui” nin.

Niptinmi walmica: “Mandacü taytallay, má niycamay” nin.

19Niptinmi mandacüca: “Cay nimäśhayquicunaca ¿manachun Joabpa nishuśhayquica?” nin.

Niptinmi walmica: “¡Mandacü taytallay, ampa nishayquica rasunpamá! Nunayqui Joabmi imacta ninäpäpis yaćhaycachimal caćhamäla.

20Payꞌa imam pasaśhancunäta allichayninwanmari caycunaman muyuchila. Am mandacünïñatacmi ichá Tayta Diospa anjilninnu sumä yaćhayniyu cayal malcaćhu ima pasaśhancunactapis tuquicta yaćhayanqui” nin.

21Chaypïtam mandacüca Joabta ayalcachimul nin: “Mañacuśhayquica lulaśha cachun. Absalon walaśhta cayman cutichimuy” nil.

22Niptinmi Joab manchacuywan unꞌulacuycul pampäcama cärantapis ćhulaycul allin cananpä niycula: “Mandacü taytallay, cay nunallayquita llaquipaycul mañacuśhäta lulaycullanquimá. Caywanmi llaquipaycamäśhayquita tantiaycullá” nil.

23Chaymi Gesur malcaman Joab lilcul Jerusalen malcaman Absalonta puśhamula.

24Ñatac mandacüca niña: “Wasinman licuchun; amaña yaꞌaman śhamumächunchu” nil. Chaymi Absalon mandacücäman manaña ćhaycul wasinta licuña.

25Má, jinantin israelćhuꞌa Absalonnuꞌa tuqui-tuqui manam pipis calachu. Payꞌa ćhaqui puntanpi uma puntancamam tuquishlla cacula.

26Ächantapis anchap piñachiptinmi watan-watan lutuchicü cala. Chay ächa lutuśhancämi chayćhu mandacücäpa tupunwan tupuptin ishcay quïlu llasala.

27Chulincunañatacmi Absalonpa cala, quimsa walaśh, juc wamla. Tamar śhutiyu wamla chulinmi sumä tuquish-tuquishlla cacula.

28Chay Jerusalen malcaćhümi Absalon ishcay wata yaćhala mandacücäman mana yaycuycul.

29Juc muyunćhümi mandacücäman lïpunanpä Joabta Absalon mañacula. Ñatac Joab manam liyta munalachu. Chaynu yapa mañacuptinpis manam awnilachu.

30Chaymi Absalon uyway nunancunacta nin: “Uyalipämay, ćhacläpa matäninćhümi Joabpa siwänin cayan. ¡Chayman lilcälil cañaycälälimuy!” nil.

Niptinmi uywaynincuna lilcälil Joabpa talpuyninta cañaycälälipula.

31Jinaptinmi Absalonpa wasinta lilcul Joab nin: “¿Imapïmi uywayniquicuna ćhacläta cañaycälälimun?” nil.

32Niptinmi Absalon: “Caynu jinälú ayachimuynïwanmi, pudirní mandacücäman lil caynu ninayquipä: ‘Imapätan Gesur malcapi śhamulá. Mas allin canman chayćhu quïdacamuptïćha cala. Canan mandacücäwan tincuycuśhä; juchayu captiꞌa wañuchimächun’ ” nin.

33Niptin Joab mandacücäman willaycü liptinmi Absalon śhamunanpä nila. Niptinmi mandacücäpa puntanman Absalon ćhaycul uyshucuycula pampäman cäranpis ćhänancama. Mandacücäñatacmi chulin Absalonta muchaycul ćhasquiycula.