Proverbios 19 - Old Testament Quechua Wanca（QVW）

1Yanꞌalpi tumpayä luclu caypïtá mas allin

wacchalla calpis allin nuna caymi.

2Sumäta mana tantiaycul lulaycá manamá allinchu;

mana-mana imactapis lulaycá mana allinmanmá ćhächimanchic.

3Luclu nunäta luclu cayninmi cawsayninta pampaman muyuchin,

Tayta Diospälämi piñacunpis.

4Cäniyu nunäpa mayanñapis lisinacuśhanñamá cacuyan;

waccha nunätañatacmi ichá lisinacuśhanpis manaña lisïtucunchu.

5Artish tistïguca mućhuycachisha manamá quïdanꞌachu;

casquishca manamá ayinꞌachu.

6Allin śhunꞌuyu nunaman mayanñapis aśhupayanmá;

imactapis uycü nunap mayanñapis apanacuśhanñamá.

7Waccha nunacta wawꞌi-caśhancuna

licaytapis mana munayalcaptinꞌa, rasunñaćhá apanacuśhancunacá.

Masqui uchuy shimillanwan apanacuśhancunacta niptinpis manañamá talinꞌañachu.

8Yaćhaycäta uywäca quiquintamá cuyacun;

allin tantiaycäta uywäca allinmá caycunꞌa.

9Licäpa śhaycü artishca manamá mana mućhuycachisha quïdanꞌachu;

casquishca camacaycüśhamá canꞌa.

10Luclüpa manamá tincunchu imapapis janallanćhu sumä cawsaśhan;

manatacmá tincunchu uyway nunaca puydïcunäta mandaśhanpis.

11Allin tantiayniyu nunaca piñacuyninta sujitacunmá;

achäqui ashïninta mana cutipacüca allinpä licaycuśhamá.

12Mandacücäpa piñacuynin liyunpa sumä apalcaćhayninnümá;

cushisha yanapayninñatacmi ichá pastucunäman śhulli ćhäcänu.

13Luclu chulica taytanpa uma nanayninmi cayan.

Wayapanta achäqui ashipayä walmicá wasinćhu śhutuyämü yacunümá cayan.

14Wasipis, ima cäninpis taytanpa tücachishanmá.

Tantiayniyu walminñatacmi ichá Tayta Diospa uycuśhan.

15Illa cayca puñuyllactam apamun;

illa nunaca imaypis micuypïmi wañunꞌa.

16Yaćhachicuyta cäsucücá allin cawsaytamá taliycunꞌa;

yaćhachicuyta jalutacücäñatacmi ichá wañuyta talinꞌa.

17Waccha nunacta mañaycücá, quiquin Tayta Diostamá mañaycuyan;

chay allin lulaycuśhanpi pay quiquinmá cutiycachinꞌa.

18Timpunćhu caśhancamalla chuliquita asutiycuy;

amatac wañunancamá anchap lawćhaycuychu.

19Anchap piñacücá quiquillanmi cunca cuchuyninta ashicun;

piñacuyninta jawcayachiyta munäcá mastalämi piñacachinpis.

20Limapäśhuśhayquita uyalicuy, anyapäśhuśhayquita ćhasquicuy;

chaynüpamá yaćhayniyu camacanqui.

21Nunaca ima lulaytapis munanmanmá;

Tayta Diosñatacmi lulaśha ütac mana lulaśha cananpäpis nimanchic.

22Nunaca llaquipayniyu canantamá alcaycunchic;

artish nunapïtá mas allin wacchalla caymi.

23 Tayta Diosta manchacuywan cäsucuyca cawsaymanmi puśhamanchic;

paywanꞌa imapïpis jawcallamá cawsaycunchic,

ima mana allinpis manamá ćhaycamanchicchu.

24Illa nunaca lätunman maquinta ćhulayculpis

manamá micunallanpäpis shiminman apaycunchu.

25Jamuyä mana tantiayniyücunaca lawćhaycuptinlämi nuna cayta yaćhapäcun;

tantiayniyücäñatacmi ichá limapaycuyllawan mas yaćhayniyu capäcun.

26Chulica, taytanta suwal, wasinpi mamanta

alapacul cäranćhu mana yawarniyümá, pasaypi nunamá.

27Iju, anyapäśhuśhayquita mana ćhasquicuptiquiꞌa

yaćhaycäpïtamá laquïshunqui.

28Licäpa śhaycü artishca cäraycücäpïta asicunmá;

juyu nunap shimin mana allincällactamá liman.

29Burlacücunäpämá lawćhaycuyca alcayan;

luclucunäpa waśhanpämá asutica cayan.