2 Cronicas 8 - Old Testament Quechua Wanca（QVW）

Salomon juccunactapis lulaśhancuna 1Rey 9.10-28

1Canan má, mandacü Salomonmi Tayta Diospa alawana wasintawan quiquinpa palasyunta ishcay ćhunca (20) wata ishpichila.

2Jinaman mandacü Hiram uycuśhan malcacunäta caśhan śhalcalcachilmi, chayćhu israelcunaca yaćhananpä ćhulaycula.

3Chaypïtam Soba lädu Hamat malcap cuntran Salomon pilyä lil, lluy llallilcul pudiracuycula.

4Jinalculmi chunyäcäćhu Tadmor malcacta śhalcachila. Jinaman micuyta ćhulananpä malcacunactapis Hamat lädućhu śhalcachilam.

5Chaynütacmi janay lädu ulay lädu Bet-horon malcacunactapis śhalcachila sumä murällayüta, wićhacuyu puncuyü-camacta.

6Jinaman Baalat malcactapis, juc malcacunactapis muśhüpi śhalcachilam micuycunacta ćhulachinanpä, jinaman pilyananpä cä carritancunacta, cawallucunacta ćhulachinanpäpis. Chaynütacmi Jerusalenćhu, Libano ulꞌucunäćhu, maquinćhu cä malcacunäćhüpis lluy ima lulay munaśhancunactapis śhalcachila.

7Ñatac mana Israel caśhtam capäcula Amhor, Het, Ferez, Hev, Jebus lädu puchücunaca.

8Paycunap punta awquilluncunactam punta Israel caśhtacuna chincachiyta mana atipapäculachu. Paycunap milaynincunactamari mandacü Salomon sasa lulaycunacta dinbaldilla lulachila. Chaynüllamari canancamapis paycuna cayalcan.

9Israel caśhtacunätam ichá uyway nunactanüchu nï lulachila. Aśhwanpa paycuna capäcula: pilyäcuna, jinaman pilyäcunap puydïnincuna, carritacunäpa sillädancunap puydïnincunamá.

10Mandacü Salomon lulachishan nunancunap puydï licänincuna, ishcay paćhac picha ćhunca (250) licäcunamari capäcula.

11Chaypïta Davidpa Malcan nishanpïta Egiptop mandacüninpä wamla chulinta Salomon puśhala, juc muśhü palasyucta lulachipuśhancämanmi caynu nil: “Israelpa mandacünin Davidpa lulachishan cay palasyunćhu walmí manañam yaćhanmanchu. Tayta Diospa babulnin caśhancunaca chuyamari” nin.

12Chaypïta Salomonmi Tayta Diosman cañaywan uycunanpä uycula, alawana wasip puncun patyućhu cä uycuna patac lulachishancäćhu.

13Chaynu uycula Moises camachishanmannümari: jamana muyunćhu,Num 28.9-10. llullu quilla fistaćhu,Num 28.11-15. jinaman watäćhu quimsa puydï cä fistacunäćhüpis.Exo 23.14-17; 34.22-23; Num 28.16—29.39; Deut 16.16. Chay fistacunam: Mana Libadürayu Tanta Fista, Simäna Fista, Chucllachacuy Fista cala.

14Chaynütacmi papänin David camachishanmannu Salomon ćhulala sasirdüticunaca tücachinacuypa lulapäcunanpä. Levitacunätapis camachilam taquicunaćhu taquipäcunanpä, jinaman muyun-muyun sasirdüticunäta lulayninćhu yanapapäcunanpäpis. Chaynütacmi puncućhu-cama tücachinacuypa täpapäcunanpäpis puncu täpäcunäta ćhulaycula. Chaynu cananpämari Tayta Diospa nunan David camachila.

15Chayurá mandacüca camachishantanüllamá sasirdüticunäwan, levitacunäwan, illay juntücunäwanpis lulaycula.

16Chaynüpamari Tayta Diospa alawana wasinta simintachiy allaycuśhanpïta ishpinancama Salomon lulachila. Chaynüpamá Tayta Diospa alawana wasinta lluy camacachila.

17Chaypïtam Salomon lila Puca Lamar patan Edom lädućhu cä Ezion-geber, Elot malcacunäman.

18Mandacü Hiramñatacmari barcu manijänincunacta, Salomonpa nunancunawan cusca lipäcunanpä caćhamula. Chay Hirampa manijänincuna sumä-cama, lamartapis tuquicta lisï-camam caculcälläla. Paycunamá Ofir läducama barcuwan lipäcul ćhunca pichayu walanganu (15,000) quïlu ürucunacta mandacü Salomonman apapämula.