1 Reyes 19 - Old Testament Quechua Wanca（QVW）

Horeb ulꞌumanmi Elias ayicun

1Mandacü Acabmi walmin Jezabelman willaycula Elias ima lulaśhantapis, Baalpa willacünincunacta ispädawan imanuypa muꞌuchishantapis.

2Chaymi Eliasman Jezabel nichila: “Baalpa willacünincunacta wañuchishayquinümi amtapis wañuchishayqui. Cay üranu wälapa mana wañuchiptí taytachacuna mana llaquipaycul mućhuchimächun” nil.

3Chaynu wañuchinanpä caśhanta Elias uyalïlulmi Juda lädu Beerseba malcaman ayicula. Yanapänintañatacmi Jezreelćhu caćhaycüla.

4Eliasñatacmi juc muyun pulina caminucta chunyäcäman licula. Chayćhu wañuyninta munayninwanmi ritama jaćhap llantuyninman taycucuycul nin: “Tayta Diosllay, caycamallañari cawsayculläśhä; wañulpächimayña. Awquillücunapïta mijurchu manamari callá” nil.

5Nilculmi ritamap llantuyninman jitalacuycul puñüña. Chayćhümi juc anjil unꞌaypi yataycul: “Śhalcuculcul micuy” nin.

6Eliasñatacmi licaćhacülul muyülïninta licaycaćhaśhanćhu licälun, śhanśhaćhu tanta cusäśhawan butïlla yacu jawnanćhu ćhulalayäta. Chaymi micucuycul, yacuctapis upyacuycul caśhan puñucuycula.

7Tayta Diospa anjilninñatacmi caśhan śhalcamul yataycula: “Calu-calulämi pulinayqui cayan; śhalcuculcul micuy” nil.

8Niptinmi Elias śhalcuculcul micula, yacuctapis upyacuycula. Chay micuśhanwanmi callpacta chaläla tawa ćhunca (40) muyun, tawa ćhunca tuta Tayta Diospa ulꞌun Horebman ćhänancama.

9Chayman ćhälulmi maćhayllaman yaycucuycul puñucuycula. Chayćhümi Tayta Dios nin: “Elias, ¿imactam cayćhu lulayanqui?” nil.

10Niptinmi Elias nin: “Am sumä munayniyu Tayta Dioslläćhümi śhunꞌullá cayan. Israelcunämari limalicuśhayquita caćhaycul uycuna patacniquitapis tunïlälin, willacüniquicunactapis ispädawan camacaycälälin. Yaꞌallañam quïdäśha cayá; cananꞌa yaꞌactapis wañuchimänanpämi ashiyalcäman” nil.

11Niptinmi Tayta Dios: “Maćhaycäpi yalulcul ñawpänïćhu śhäcuy” nin.

Chayćhu Tayta Dios pasayaptinmi sumä-sumä waywa ulꞌuctapis quićhacächicuyan, wancacunactapis partichicuyan. Ñatac chay waywaćhu Tayta Diosꞌa manam calachu. Chay waywa pasacuptinmi pachacuyuy pasala. Ñatac Tayta Diosꞌa pachacuyuycäćhüpis manam calachu.

12Pachacuyuy pasacuptinmi nina walayä pasala. Ñatac Tayta Diosꞌa nina walaycäćhüpis manam calachu. Chaypa ipanmanmi tuqui ushya suynaylla pasala.

13Chayta uyalïlulmi Elias müdananwan cäranta täpacuycula. Chay maćhaypi yalalcamul puncunćhu śhäcuyalmi uyalïlun: “Elias, ¿cayćhu imactam lulayanqui?” nilpamüta.

14Niptinmi Elias nin: “Am sumä munayniyu Tayta Diosllaćhümi śhunꞌullá cayan. Israelcunämari limalicuśhayquita caćhaycul uycuna patacniquitapis tunïlälin, willacüniquicunactapis ispädawan camacaycälälin. Yaꞌallañam quïdäśha cayá; cananꞌa yaꞌactapis wañuchimänanpämi ashiyalcäman” nil.

15Niptinmi Tayta Dios nin: “Chay śhamuśhallayqui caminullap cutiy, Damascoćhu chunyäcäcama. Chayćhümi Siriap mandacüninpä Hazaelta japächaycunqui.2Rey 8.7-13.

16Nimsipa chulin Jehutañatacmi israelcunap mandäninpä japächaycunqui.2Rey 9.1-6. Chaynütac Abel-mehola malcayu Safatpa chulin Eliseocta pudirniqui willacü cananpä japächaycunqui.

17Chaynüpam Hazael mana wañuchishanta Jehu wañuchinꞌa. Jehu mana wañuchishantañatacmi Eliseo wañuchinꞌa.

18Chaynu captinpis Israelćhu anćhish walanga (7,000) nunacunacta wañuchinanpi manalcachishämi. Paycunamá taytacha Baalman mana uyshuycapäculachu nï muchaycapäculapischu” nil.

Eliseoctam Elias ayan

19Chaypi Elias pasaculmi talïlun Safatpa chulin Eliseo ćhaclanćhu ärayäta. Ćhunca ishcayniyu yunda puntapäcuptinmi payñatac ipallanta yundanwan liña. Chay Eliseop lädunpa Elias pasayalmi cäpanta Eliseop jananman jitaycülun.

20Chaymi Eliseo yundanta caćhaycul Eliaspa ipanta licun. Alcansälulmi: “Mamäta taytätalä macallacuycul ‘jamallá’ niycamulläśhä; chaypïtam ichá amwan lishun” nin.

Niptinmi Elias nin: “Liyꞌari. ¿Yaꞌa mićhacuyacchu imamá?” nil.

21Chaymi cutilcamul yundanta Eliseo ćhipilcul äraduncunawan aychäta yanülun. Jinalculmi nunacunäta alaycula. Chaypïtam Eliaswan licula paypa yanapänin cananpäña.