2 Cronicas 11 - Old Testament Quechua Wanca（QVW）

1Chaypïta Jerusalenman Roboam ćhälulmi Juda, Benjamin ayllucunapïta juntüla paćhac pusä ćhunca walanga (180,000) pilyäcunacta. Paycunawan jinantin Israelta llallilculmari mandacünin caśhan cananpä lisha niyäla.

2Ñatac Tayta Diospa nunan Semaiastam Tayta Dios nin:

3“Juda lädup mandacünin Salomonpa chulin Roboamta, jinaman Juda ayllućhu, Benjamin ayllućhu cä lluy israelcunäta nimuy,

4Tayta Dios caynu nishanta: ‘Israel caśhta, wawꞌi-caśhayquiwanꞌa amam pilyapäcunquichu. Aśhwanpa wasiquita-cama cuticulcay. Chaynu pasananpä yaꞌapa munaynïmi cala’ ” nil.

Chaynu Tayta Dios nishanta uyaliculcalmi wasinta-cama lluy cuticulcäla. Jeroboampa cuntran manañamá lipäculañachu.

Mandacü Roboampa lulaśhancuna

5Roboamñatacmi Jerusalenćhu yaćhal murälläśha malcacunacta Juda lädućhu śhalcachila.

6Chay malcacunam cala: Belen, Etam, Tecoa,

7Bet-sur, Soco, Adulam,

8Gat, Maresa, Zif,

9Adoraim, Laquis, Azeca,

10Zora, Ajalon, Hebronpis. Chay malcacunämari Juda, Benjamin läducunaćhu sumä murälläśha-cama capäcula.

11Chaynu murällacunacta sumä siguralpachilmi, chaycunaman ćhulala pilyäcunap puydïnincunacta, micuycunacta, asayticunacta, bïnucunactapis.

12Jinaman lluy malcacunämanmi atajachicucunactawan lansacunacta uycula. Chaynu masïsu sigüructa lulaycuptinmi, Judapa Benjaminpa maquinćhu caycula.

13Ñatac jinantin israelcunäpïmi sasirdüticunaca, levitacunaca Roboamman śhapämula jucllachaculcänanpä.

14Chay Jeroboamwan chulincuna mićhaculcaptinmari, ichadïruncunactawan ima cänincunactapis caćhaycul Juda läduman Jerusalenman śhapämula. Chaynu levitacunaca śhapämula, Tayta Diosta sasirdütinnu sirbipäcunanpämari.

15Jeroboamñatacmi quiquinpa sasirdütincunacta ćhuläla, chay ulꞌućhu cä uycunacunäćhu, jinaman supaycunäta, chaynütac lulachishan wäca taytachancunacta sirbipäcunanpä.1Rey 12.31.

16Ñatac jinantin Israelćhu ayllucunaca llapan śhunꞌunwan Israelpa Tayta Diosninta sirbïcunäñatacmi ichá levitacunäpa ipanta liculcäla. Awquilluncunap Tayta Diosninta cañaywan Jerusalenćhu uycälinanpämari liculcäla.

17Chaynüpam chay nunacunaca Salomonpa chulin Roboamta quimsa wata yanapapäcula. Chaynu quimsa wata Davidpa, Salomonpa allin cawsaynincunacta Roboam atichiptinmari Juda lädup mandacuynin masïsu tacyalpula.

18Roboammi casaracüla Jerimotpa wamla chulin Mahalatwan; Jerimotmi Davidpa chulin cala. Chaynütacmi Eliabpa wamla chulin Abihailwanpis casaracüla. Eliabꞌa Isaipa chulinmi cala.

19Roboampa chulincunam Mahalatćhu cala: Jeus, Semarias, Zahampis.

20Chaypïta Absalonpa chulin Maacawanmi Roboam casaracüla. Payćhümi chulincuna cala: Abias, Atai, Ziza, Selomitpis.

21Ñatac lluy walmincunapïpis, uywanacuśhan walmincunapïpis Absalonpa chulin Maacactam masta cuyala. Roboampam cala: ćhunca pusäniyu (18) walmincuna, süta ćhunca (60) uywanacuśhan walmincuna, ishcay ćhunca pusäniyu (28) walaśh chulincuna, süta ćhunca (60) wamla chulincunapis.

22Roboammi walmin Maacaćhu cä chulin Abiasta lluy wawꞌi-caśhancunap puydïninpä ćhuläla. Chaynu lulala mandacü cananpä munayninwanmari.

23Roboam lluy chulincunacta sumä yaćhaywanmi Judapa, Benjaminpa murälläśha malcancunaman caćhäla. Jinaman micuycunactapis achca-achcacta uycul chaynütac walmincunactapis achcacta ashiycapulmari lluy caćhäla.