1Usya timpupïmi Jeremiasta Tayta Dios nin:
2“Juda lädu pasaypi llaquićhümi cayan;
malcancuna pasaypi lawtïshamá cayalcan.
Nunacunaca llaquicuypïmá pampällaćhu täcuyalcan.
Jerusalenćhu sumä-sumä ayaycaćhayllañamá cacuyan.
3Rïcucunäpis nunancunactamá yacu ashï caćhapäcun;
püsucunäman lipäculpis yacucta manamá talipämunchu.
Chaymi imanaytapis mana atipal jina wacuyllanwanña cutipäcun;
cärapis wällïsha, uyshucuśhallamari cutiycapäcun.
4Tamya mana captinmari allpaca
chaqui-chaquiña laꞌalayan.
Ćhaclayücunaca imanaytapis
mana atipalñamá umallantaña aywiculcan.
5Pastucuna manaña captinmá
luychucunäpis chayllalä waćhäśha
wawincunactapis ulꞌucunäćhu caćhaycälälin.
6Munti aśhnucunäpis chunyä ulꞌup
puntancunaćhüñamá atücunänu jäcatayalcällan.
Pastu manaña captinmá manca
ñawïśhaña licaycaćhayalcan jinallaña” nil.
7Chayćhümi nunacunaca nipäcun:
“Tayta Diosllay, cullu linli cayní acusayalcämaptinpis,
cutipalcul-cutipalcul amta ipanchayalcaptïpis,
ampa cuntrayqui mana allinllacta lulayalcaptïpis,
imam allinpä licaycuśha caśhayquimannuꞌari yanapaycälillämay.
8Anmari, Israelpa chalapacunan caycunqui;
anmá, llaquicuy timpućhu salbaycünin caycunqui.
Chayurá ¿imapïmá cay malcaćhu pasacünülla cayanqui?
¿Imapïmá juc tuta jamapacünülla licalïlunqui?
9¿Imapïmá licapayllaman camäśha cayanqui?
¿Imapïmá gïrraćhu salbaycuyta
mana atipä cachacunu cayanqui?
Tayta Diosllay, yaꞌacunawanmari am cayanqui;
malcayquimá capäcullá. Amari caćhaycapällämaychu” nil.
10Malcantam Tayta Dios nin:
“Cay malcaca mana jamayculmi munaśhallanmannu
wicman-cayman cürricaćhaculcäla.
Chaymi śhunꞌüpänüñachu manaña capäcun.
Chayurá chay mana allin lulaynincunapi yalpalayalmari
juchanpïta mućhuycachishä” nil.
11Chaypïtam Tayta Dios niman: “Cay malcacta allinpä licaycunäpä amaña mañacayämayñachu.
12Masqui ayunapäcul mañacalcämaptinpis manañamá uyaliycuśhächu. Masqui cañaywan uycunacta ütac ćhacla micuyta uycälimaptinpis manañamari ćhasquiycuśhäñachu. Aśhwanpamá micuy wanaywan, ishyaywan, ispädawan lluy camacaycüśhä” nil.
13Nimaptinmi nilá: “Tayta Diosllay, willacüniquicunam niyan: ‘Micuy wanayta manamá pasapäcunquichu; gïrra manamá canꞌachu. Aśhwanpa rasun jawca cawsayta cayćhu uycälishunqui’ ” nil.
14Niptïmi Tayta Dios niman: “Yaꞌap śhutïćhu chay willacütucücunaca willaculcäśhancuna yanꞌal-yanꞌalmá. Yaꞌa manamari caćhalächu imacta lulananpäpis, nï imacta limananpäpis. Chay willacücunaca niyalcäśhunqui suyñuyllancunacta, yanꞌal licacuycunallacta, articunallacta, umallancunapi tantiaynincunallactamari.
15“Yaꞌa Tayta Diosmari ní: Yaꞌa mana caćhayaptïpis śhutïćhülämá willaculcäla: ‘Cay nasyunćhu manam gïrra canꞌachu, nï micuy wanaytapis pasapäcunquichu’ nil. Chaynu artish caśhanpam quiquincuna micuy wanaywan, gïrrawan camacaycüśhä capäcunꞌa.
16Chay willacuyta uyalïcunaca micuy wanaywan, gïrrawan wañupäcuptinmi Jerusalenpa cällincunaćhu jitaycüśha lawaläculcanꞌa. Walmincunapis, walaśh wamla chulincunapis camacaycüśha captinmari manaña mayan pampaycüpis canꞌañachu. Chaynüpamá paycunaman quiquinpa mana allinnin cutiycächisha canꞌa.
17Jeremias, canan paycunacta niycamuy:
“ ‘Umricta manalä lisï malcänïmi
jatun llaquicuyćhu cacuyan;
sumä-sumä dañäducüśham cacuyan.
Chaymari tutay muyun mana jamaycul
waꞌayaptí, wiꞌinïpis chaquïlunña.
18Ćhaclacunäman yalulpis ispädawan wañüchisha maśhtalayalcätam licayällá.
Malcaman yayculpis micuy wanaywan wañüśha lawayalcällactam taliycullá.
Willacücunäwan sasirdüticunämi lulaynincunacta jinalla lulapäcun;
ñatac ima lulaśhantapis manamá yaćhapäcunchu’ ” nil.
Nunacunäpämi Jeremias mañacun19Tayta Diosllay, ¿pasaypipächun
Juda läducta ipanchälunqui imamá?
¿Rasunpachun Sionta ćhïnïlunqui imatá?
¿Imapïmá jampiyta mana atipanawan lawćhälälimanqui?
Jawca cawsayta alcayalcaptïpis manamá
jawca cawsay ćhaycamunchu.
Allinyaycuśha capäcunäpä alcaycäliptïpis sumä manchachicuyllamá ćhaycamun.
20 Tayta Diosllay, mana allin lulaynïcunacta canan tantiaculcäñam;
awquillücunap juchancuna caśhantapis yaćhaycälilläñam.
Ampa cuntrayquimari mana allinta lluy lulälälillá.
21Śhutiquita-laycu amari jitälälillämaychu;
sumä cayniquita amari mana cäman ćhulaycuyaychu.
Dispächuyqui cananpä aclaśhayqui malcayquita amari mana cäman ćhulaycälillämaychu.
Yaꞌacunaman limalicalcämäśhayquitari yalpalcullay.
Amari mana cäman muyuycälichillaychu.
22¿Juc lädu nasyuncunap taytachancuna
tamyacta tamyachimunmanchun imatá?
¿Icha sïlüchun quiquillanpi tamyacta tamyachimüca cayan imamá?
Manamari. Am Tayta Diosllamari
tamyachimüca cayanqui;
amllamari ima aycactapis lulaycüca cayanqui.
Chaymi am Taytallá yanapaycälimänayquita chalapaculcällá.
Who We AreWhat We EelieveWhat We Do
2025 by iamachristian.org,Inc All rights reserved.
