Ezequiel 47 - Old Testament Quechua Wanca（QVW）

Alawana wasipi yalamü yacupïtam nin

1Chaypïtam chay nunaca alawana wasip yaycunanman cutïchiman. Chayćhümi puncup lulinpïta yacu yalayämüta licälú. Chay yacuca alawana wasi licaläśhan, inti ishpimunan cä lädumanmi liyäña; alawana wasip lädunpa, uycuna patacpa sur lädunpamari liyäña.

2Chaypïtam nurti lädu puncup yalalcachimal waśha lädunpa muyuchimäla inti ishpimunan lädu puncucama. Chayćhümi yacuca sur lädupi yalamuśhanta licälú.

3Chaypïtam chay nunaca tupunanpä cä curdilnin apapacüśha inti ishpimunan lädu yacu lïcäman puśhäman. Chayćhu tupuptinmi picha paćhac (500) mitru caña. Chay yacunpa pulichimaptinmi ćhaqui pilulü-camalla yacuca caña.

4Chaypi yapa picha paćhac (500) mitructa tupulcul chayninpa pulichimaptinmi unꞌulnïcama yacuca caña. Chaypïta yapa picha paćhac (500) mitructa tupulcul chayninpa pulichimaptinmi wiꞌwanïcamaña yacuca cacuña.

5Chaypïtañatacmi yapa picha paćhac (500) mitructa tupulcul chayninpa pulichimaptin pasayta mana atipana mayuña caña. Chaymi nädaywanña pasana caña.

6Chayćhümi nunaca niman: “Wañucülla nuna, licaśhayquita sumäta tantiaycuy” nil.

Chaypïtam mayup patallanpa cutichiman.

7Chaynu cutiyächimaptinmi mayup wic lädu, cay lädu patancunaćhu achca-achca lantacuna cayäta licälú.

8Chayćhümi chay nuna niman: “Cay yacuca inti yalamunan lädumanmi liyan. Jinalmi Araba nishanpa pasayal Wañüśha Lamar nishanman ćhäyan. Chayman ćhälulñatacmi mishqui yacumanña muyuchin.

9Cay mayu maymanpis ćhäśhancäćhuꞌa imaymana uywacunam cawsanꞌa. Chaynütacmi challwacunapis achca-achca cacunꞌa. Chay yacu ćhäśhanca allinmanmá muyunꞌa. Chaymi chay yacu mayman ćhäśhanćhüpis lluy cawsapäcunꞌa.

10Jinantin Puchü Lamarcäćhümari challwa chaläcuna capäcunꞌa; En-gadi lädupi allaycapäcul aśhta En-eglaim läducamam challwa chalacuntapis chaquichipäcunꞌa. Mediterraneo lamarćhu caśhancänümari chayćhu imaymana challwacuna timpucunꞌa.

11Ñatac mitu-mitucunäćhu, ućha-ućhacunäćhu cä yacuca manamá mishqui yacuman muyunꞌachu. Puchucü yacuca jinallam canꞌa, caćhicta julunanpä.

12Chay mayup wic lädu, cay lädu patancunaćhu sumä wayuyniyü-cama imaymana lantacuna, jaćhacunamá wiñanꞌa. Lapincunapis manamá awinꞌachu, nï palpupäcunꞌachu. Alawana wasipi yalamü yacuwan rïgaśha calmi quillan-quillan wayupäcunꞌa. Wayuynincuna micunapämá canꞌa; lapincunapis jampicunapämá canꞌa” nil.

Tücänincunap culindancunactam nin

13Chaypïtam Tayta Dios niman: “Israelpa ćhunca ishcayniyu (12) aylluncuna ćhasquipäcunanpä tücänincuna caynümi canꞌa: Josepa milayninmanꞌa ishcay ayllup tücäninlämi tücaycunꞌa.

14Juc ayllucunacá chay iwal-camallactam aypunaculcanꞌa. Awquilluyquicunamanmi cay allpacta uycunäpä maquïta pallalcul yaꞌa limaliculá. Cananꞌa amcunap tücäniquiñamari cay allpaca caycunꞌa.

15“Canan má, nurti lädupi culindanmi canꞌa: Mediterraneo Lamarpi allaycul Hetlon malcap pasanꞌa, Zedad läducunap,

16jinaman Hamat, Berota, chaypïta Damascopi Hamatman linaćhu cä Sibraim malcacunap, aśhta Hauranpa culindanćhu cä Hazar-aticon läducama.

17Chayurá nurti lädupi culindan Mediterraneo Lamarpi aśhta Hazar-enancamam canꞌa; Damascup sur lädunćhu, Hamat läducunap nurti lädunćhümari canꞌa.

18“Inti yalamunan lädupi culindanñatacmi canꞌa: Hauran, Damasco malcapi allaycul, Jordan mayunllanta sur lädunpa lil, Galaadwan Israelpa culindanpa pasanꞌa, jinaman Wañüśha Lamarninpa Tamar malcaman ćhänancama. Caynümari inti yalamunan lädu culindan canꞌa.

19“Sur lädu culindanñatacmi inti jiꞌalpunan läduman caynu canꞌa: Tamar malcapïta allaycul Meriba-Cadesćhu yacu caśhancäcama; chaypi Egipto mayu patallanpam linꞌa aśhta Mediterraneo Lamarcäcama. Caynümari sur lädu culindan canꞌa.

20“Inti yaycunan lädupi culindanñatacmi canꞌa: Mediterraneo Lamarpi allaycul nurti lädup pasanꞌa aśhta Hamat läduman yaycunancama. Caynümari inti jiꞌalpunan lädu culindan canꞌa.

21“Chay allpactamá Israelpa ćhunca ishcayniyu (12) aylluncuna aypunaculcanqui.

22Chayurá cay allpacunacta amcunaman, chaynütac amcunaćhu juc caśhtacuna chayćhu yaćhayalcal chulincunacta ishpichïcunämanpis tücachinquim. Paycuna Israel lädunüña capäculmari tücäninta ćhasquipäcunꞌa.

23Chay mana Israel caśhtacuna mayannin ayllućhüpis yaćhaśhancäćhümari tücäninta uycapäcunqui. Yaꞌa Tayta Diosmari niyá” nil.