1 Tayta Diosllay, anmi śhunꞌulläta tuquicta
licaycamanqui, sumäta lisiycamanqui.
2Imay śhalcuśhätapis taycuycuśhätapis tuquictamá am yaćhaycunqui.
Calućhu cayaptïpis ima tantiaśhäcunapis ampá yaćhaśhallamá.
3Yaluśhätapis, cutiycamuśhätapis, jamapäśhätapis tuquictamari yaćhaycunqui.
Lluy puliśhätapis sumätamá lisiycunqui.
4Manaläpis limalcuptïmá am Tayta Diosllá
yaćhanquiña imacunacta limanätapis.
5Ipäpapis ñawpänïpapis cunćhalayämanquimá.
Altunpapis maquillayquiwanmá atajaycamanqui.
6Caynu sumä yaćhayniquipi äśhalayllamanmá camaycú.
Cayꞌa mana tantiay atipana maynu sumä-sumämá.
7¿Ispirituyquipïta maytaćh ayiculläman?
¿Ñawiquipïta maytaćh ayilläman?
8Masqui janay pachäta ishpïluptïpis chayćhüpis cayanquimá.
Masqui cay pachäpa lulïninman jiꞌalpüluptïpis chayćhüpis cayanquitacmá.
9Masqui inti ishpimunan läduman pälicuptïpis,
inti jiꞌalpunan läduman yaćhä licuptïpis,
10maquiqui chayćhüpis caminaycamanꞌamá.
Allï maquiqui manamá caćhaycamanꞌachu.
11Masqui “tutawyaycäćha pacaycamanꞌa” niptïpis
tutawyayca acchinülämá muyülïnïćhu acchiycunꞌa.
12Tutawyaycäpis ampá manamari tutawyaychu.
Tutapayca ampá muyunnümá acchiycun.
Tutapis acchipis ampá chaynüllamari.
13Anmá yaꞌaćhu lluy-lluy ima cäcunätapis lulaycamälanqui.
Anmá mamäpa patanćhu awäcänu awaycamälanqui.
14Caynu sumä-sumä allin lulaycamäśhayquipïtamá alawaycuc.
Lluy lulaśhayquicunaca äśhalayllaman camanamá.
Caynu caśhanta tuquictamá yaćhaycú.
15Pacapällanćhu tullücuna wiñaśhanpis
ampïtá manam pacaycuśhachu cala.
Allpap lulïninćhünu awamäśhayquipïtapis
ampïtá manam pacaycuśhachu cala.
16Mamäpa patanćhu yawarlla cayaptïmá am licamälanquiña.
Manalä licalïsha cayaptïmá ayca wata cawsanätapis unanchamälanquiña.
Lluy-lluy ima pasamänancunäpis libruyquićhümá isquirbïshaña cayäla.
17Tayta Diosllay, ¡tantiayniqui maynu-maynümá!
¡Lluy tantiayniquicuna yupayta mana atipaycunamá!
18Yupayta allaycuptiꞌa lamarcäćhu aꞌucunäpïpis mas-masläćha cayanman.
Manamá fintayta imaypis camacaycümanchu.
Masqui fintayta atipalpis muspaynïćhünüllaläćhá lisiycucman.
19Tayta Diosllay, maynüläćha munäman mana allin nunacunäta camacaycünayquita.
Am, nuna wañuchicücuna, ñawïpïta chincaculcay.
20Taytallay, paycunamari cuntrayqui limapäcun.
Yanꞌal-yanꞌalpïmá śhutiquita jalutaculcäśhunqui.
21 Tayta Diosllay, ¿ćhïnishüniquicunacta
manachun ćhïnicú imatá?
¿Jalutacüniquicunäpä manachun piñacú imatá?
22Sumä-sumätamá ćhïnipaycú.
Cunträpämá licaycú.
23Ay, Tayta Diosllay, tuquicta licaycamalꞌari śhunꞌulläta lisiycallämay.
Imacuna śhunꞌulläta lumiyächishantapis licapaycamalꞌari lisiycallämay.
24Mana allin caminunpa liptiꞌa tantiaycachillämayꞌari.
Wiña-wiñay cawsayman lï caminupꞌari caminaycallämay.
Who We AreWhat We EelieveWhat We Do
2025 by iamachristian.org,Inc All rights reserved.
