2 Samuel 19 - Old Testament Quechua Wanca（QVW）

Davidmi Jerusalenman cutin

1Chaypïtam Joabman willaycälälin: “Mandacücämi chulin Absalonpïta llaqui-llaquicta waꞌayan” nil.

2Chaynu chulinpi mandacüca llaquisha caśhanta jinantin malcaca yaćhälälilmi chay llallishanpi cushiculcänantá llaquicuy muyunman muyüla.

3Chaymi pilyupi ayimü pacallap pinꞌacüśhalla yaycamücunänu paycunapis malcaman uyshucälälishalla yaycapämula.

4Ñatac mandacüca cäranta täpacuyculmi apalcaćhaypa nicuyan: “¡Absalon, Absalonllay! ¡Absalon, Absalonllay! ¡Cuyaśhá walaśh! ¡Cuyaśhá iju!” nil.

5Ñatac mandacüca caśhanman lilculmi Joab nin: “Taytallay, lluy nunayquicunactam pinꞌayman ćhulälunqui. Paycunamari amtapis, chuliquicunactapis, walmiquicunactapis, uywanacuśhayqui walmiquicunactapis libraycapäcuśhulanqui.

6Amꞌa, ćhïniśhüniquicunactamá cuyanqui. Cuyaśhüniquicunactañatacmi ćhïninqui. Cananmi lisichicuyanqui pilyäniquicunactawan puydïnincunacta imapis mana ucuśhuśhayquita. Am, cushishaćh canquiman Absalonlla cawsaptin, yaꞌacuna lluy wañuculcaptïpis.

7Chayurá cananꞌari am waśhaman yalul pilyäniquicunacta tuquillap limapaycamuy. Chaynu mana lulaptiquiꞌa licäpä Tayta Diosta śhaycaycachilmi limalicú canan tuta jucllayllapis yanapäśhüniqui mana quïdananpä. Chaynu captinꞌa müsu caśhayquipïtapis mana pasaśhuśhayqui sumänin llaquićh pasäśhunquiman” nil.

8Niptinmi mandacüca śhalculcul puncu yaycunanman lilcul taycucuycula. Chayćhu mandacüca caśhanta willaycäläliptinmi jinantin malcaca payman lipäcula.

Davidpa cuntran cä israelcunäñatacmi ichá wasinta-cama ayiculcäla.

9Lluy israelcunämari aylluncunaćhu ninaculcäla: “Ćhïnicüninchiccunapi mandacücämi libraycamanchic. Paymi Filisteo läducunap maquinpïta salbaycamanchic. Ñatac Absalonta manchacuypïmi malcanchicpïta ayicun.

10Cananꞌa mandacüninchicpä japächaśhanchic Absalon pilyućhu wañucunñamari. Chayurá ¿imactañamá alcayanchic? Mandacü Davidtañari mandacüninchicpä cutichimuśhun” nil.

11Chaynu nipäcuśhancunacta mandacü David uyalïlulmari sasirdüti Sadocman, Abiatarman caynu nichila: “Juda lädu yaśhacunämanmi lipäcunqui. Paycunacta nipäcamuy: ‘¿Imactatan amcuna alcayalcanqui palasyuman mana cutichimal? Israel nunacunacá cutichipämänanpä limanacälälinñamá.

12Am wawꞌi-caśhäcunawan juc aychallapi cayaptinchic, mandacüpa puntactalämi cutichipämanquimanpis. Chayurá ¿imactalämá alcayalcanqui?’ nil.

13Chaynütacmi Amasamanpis lipäcul caynüta ninqui: ‘¿Amwanpis manachun juc aychallapi canchic? Cachacücunap puydïnin Joabpa pudirninpämi wiña-wiñaypä amta chulaycuśhayqui. Chaynu mana lulaycuptiꞌa Tayta Dios sumä-sumäta mućhuchimächun’ ” nil.

14Chaynüpam lluy Judapa śhunꞌunta suwaycülun. Jinaptinmi juc shimilla nipäcula: “Mandacücäwan lluy pilyänincuna cutipämuchun” nil.

15Nipäcuptinmi mandacüca cutimul Jordan mayücama ćhämula. Juda nunacunäñatacmi Gilgal malcaman talipapäcula mandacücäta ćhasquiycul mayucta chimpachipämunanpä.

16Bahurim malcayu Gerapa chulin Simeipis2Sam 16.5-13. Juda nunacunäwanmari liculcan mandacü Davidta ćhasquinanpä.

17Paywanmi walanga (1,000) Benjamin ayllucuna lipäcula. Jinaman Saulpa ayllunpa puydï yanapänin Sibapis ćhunca pichayu (15) chulintin, ishcay ćhunca (20) uywaynintin mayuman wayra-wayra lipäcula. Paycunamari mandacüca manalä ćhamuśhancama mayup bädunman ćhälälin.

18Chaymi Jordan mayucta chimpapäcula mandacü Davidtawan lluy aylluncunacta pasayta yanapapäcunanpä.

Ñatac mandacüca chimpananpäña cacuyaptinmi Gerapa chulin Simei puntanman uyshucuycul nin:

19“Mandacü taytallay, cay nunallayquita pampachaycallämay Jerusalenpi yalamuśhayqui muyun mana allin lulaśhäpïta. Chayta amañari śhunꞌuyquićhu uywaycullayñachu.

20Cay nunallayqui juchacuśhäta tantiaculmi Jose ayllupïta yaꞌa puntamullalá am mandacü taytalläta ćhasquiycunacpä” nil.

21Chayta uyalïlulmi Sarviap chulin Abisai nin: “¿Tayta Diospa japächacuśhancäta unay jalutacuśhanpi Simei manachun wañunan imamá?” nil.

22Niptinmi David: “Caycuna imam ucuśhunqui am Sarviap chulincunacta. Amcuna ćhïnicünïnüñamari nicayalcämanqui. ¿Israelpa mandacünin canäpä canan muyun cutiyämuptí imanuypamá jucllapis wañuyanman?” nin.

23Nilculmi Simeitañatac mandacüca limalicula: “¡Manamari wañunquichu!” nil.

24Chaynütacmi mandacücäta ćhasqui Saulpa willcan Mefi-bosetpis lila.2Sam 9.1-13; 16.1-4. Paymi mandacüca licuśhanpi aśhta allin jawca cutimunancama ćhaquintapis mana paꞌaculachu, müdanantapis mana täśhaculachu, śhaplantapis mana lutuculapischu.

25Pay ćhasquïnin Jerusalenta ćhäluptinmi mandacüca nin: “Mefi-boset, ¿imapïmá yaꞌawan mana lilanquichu?” nil.

26Niptinmi Mefi-boset: “Mandacü taytallay, yaćhaśhayquinüpis cay nunallayqui wishtumari callá. Amwan linäpämari uywayní Sibacta: ‘Sillacunäpä aśhnucta carunapamay’ nilá. Uywaynïñatacmi casquipäman.

27Jinaman am mandacücämanmi tumpämänanpä cürrimulapis. Ñatac am mandacüní taytallay, Tayta Diospa anjilninnümi canqui. Chayurá tincüllanmanmari yaꞌawan lulaycunqui.

28Papänïpa ayllunćhu lluy-lluy wañupäcunäpä cayalcaptïpis am mandacü taytallämari cay nunallayquita wasiquićhu cusca micunäpä ćhasquiycamälanqui. Chayurá ¿ima mastalämi am taytalläta mañacucman?” nin.

29Niptinmi mandacüca: “¿Imapäñam mastá limayäśhun? Sibawan ćhaclacta aypunaculcänayquipä nishañamari cayalcanqui” nin.

30Niptinmi Mefi-boset: “Lluywanña Siba quïdacuchun. Mandacü taytá cawsayniyu allin palasyuman cutimuśhallanwanmi yaꞌa cushisha caycú” nin.

31Chaynütacmi Galaad lädu Barzilaipis2Sam 17.27-29. Jordan mayuman lila. Paymi Rogelim malcapïta śhamula mayucta chimpayta yanapalcul dispidicunanpä.

32Barzilai pusä ćhunca (80) watantañamari liyäla. Pay sumä cäniyu calmi Mahanaim malcaćhu cayal mandacücäman lluy pishipacuśhanta uycula.

33Barzilaitam mandacüca nin: “Acuchun Jerusalenta. Ima pishipacuśhayquipïpis yaꞌaćha licaycuśhayqui” nil.

34Niptinmi Barzilai: “Mandacücäwan Jerusalenta linäpä manañam achca watachu cawsaśhä.

35Pusä ćhunca (80) watayüñamari cayá. Manañamá gustu cawsaycuy canñachu. Micuśhäca, upyaśhäca allin ütac mana allin caśhantapis manañam tantiächu. Manañatacmi walmi ütac wayapa taquishantapis uyaliyta atipäñachu. Mandacü taytallay, ¿imapäñam cay nunallayquita afanniquipä puśhallämanqui?

36Cay nunallayqui Jordan mayullacta chimpawshiyällaptí ¿imapïmi mandacüní caynu ‘allinnintalä uycuśhayqui’ niyämanqui?

37Aśhwanpa malcäman cuticulläśhä, chayćhu wañucul taytäpa caśhanćhu pampacamunäpä. Yaꞌap pudirní sirbishunayquipä chulí Quimamta caćhaycuśhayqui. Paytaña imaćhüpis mandacü taytay, yanapaycullanqui” nin.

38Niptinmi mandacüca: “Chayurá Quimamtamari puśhacuśhä. Mañamäśhayquimannümari payta yanapaycuśhä; ima munaśhayquitapis uycuśhayquimá” nin.

39Chaypïta mandacüca lluy nunacunäwan Jordan mayucta chimpalcälilmi Barzilaita muchaycul allin caycunanpä niycula. Jinaptinmi Barzilai malcanta cuticula.

40Mandacücäñatacmi Gilgalman pasapäcula Quimamwan, Judapa pilyänincunawan, Israelpa ćhawpi pilyänincunawanpis.

41Chaypïta lluy israelcunämi mandacücäman talipalcälil nicuyalcan: “¿¡Imapïmá Jordan mayucta chimpawchïshishulanqui wawꞌi-caśhá Juda läducunälla am mandacücäta, aylluntinta, pilyänintinta!?” nil.

42Niptinmi Juda läducunaca: “Mandacüca ayllümi. ¿Chaypïchun piñacüśha cacuyalcanqui? ¿¡Mandacücäpïchun micuyalcá imatá!? ¿¡Imallactapis prubichayalcächun imamá!?” nin.

43Nipäcuptinmi israelcunaca: “Amcuna jucllay ayllulla capäcuśhayquipïta mas dirichuyu cayalcá ćhunca ayllu capäcuśhäpïtamari. Jinaman mandacü David cutimunanpä yaꞌacunam puntacta mañäca cayalcá. ¿Chaychun imapäpis mana bälïta-yupay licayalcämanquiman?” nin.

Chaynu israelcunaca nipäcuptinpis Juda läducunäñatacmi sumä nana-nanay shimincunawanlä israelcunäta nipäcula.