Deuteronomio 3 - Old Testament Quechua Wanca（QVW）

Basanćhu Og gubirnaśhan malcacunäta llallishantam yalpachin Num 21.31-35

1“Chaypïtam Basan läduman lï caminunpa cutimulanchic. Chayćhümi Basanpa mandacünin Og lluy cachacuncunawan yalälälimula Edrei lädućhu supayapachinacunanchicpä.

2“Chayćhu Tayta Diosñatacmi nimäla: ‘Paycunacta ama manchacuychu. Og mandacücäta lluy cachacuntinta, jinantin malcantinta, lluy allpantinta maquiquimanmi ćhulaycamú. Hesbonćhu yaćhä Amhor lädup mandacünin Sehonwan lulaśhayquinümi paywan lulanqui’ nil.

3“Chaymari quiquin Tayta Diosninchic Basan malcap mandänin Ogta lluy nunantinta maquinchicman ćhulaycamun. Chaynüpam paycunacta manyapïta camacaycülunchic; manam nï jucllapis cawsalañachu.

4Juc malcallactapis mana caćhayculmari lluyta llallïlanchic. Chaycuna cala Basan nasyunćhu, Argob lädućhu süta ćhunca (60) malcantinta Og mandacuśhancunämi.

5Lluy cay malcacunämari jatućha masïsu-cama murällawan murälläśha, puncunpis masïsucamam sumä bärancunawan wićhäśha capäcula. Juc mana murälläśha uchuchä malcacunallapis calatacmi.

6Malcan-malcanmi wayapacunacta, walmicunacta, walaśh wamlacunactapis mana caśhanman muyuchilanchic, Hesbonćhu puydï mandacü Sehonta camacaycüśhanchicnu.

7Ñatac uywancunawan, malcanćhu cänincunawanꞌa quïdaculanchicmi.

8“Chaynüpam chay muyuncuna Amhor läducunäpa ishcay mandacünincunap jinantin nasyunnincuna maquinchicćhüña licalïla. Chaycuna Jordan mayup inti yalamunan lädu Arnon mayüpïtac aśhta Hermon ulꞌücama cala.

9Má, chay Hermon ulꞌuctamari Sidon läducunaca Sirion nipäcula, Amhor läducunäñatac Senir nipäcula.

10Chaynütacmi lluy pampäćhu cä malcacunactapis, lluy Galaad, Basan läductapis aśhta Salca, Edrei malcäcama pudiracuyculanchic. Chay malcacunaca Basan nasyunćhu Ogpa gubirnaśhan malcancunam cala.

11Basan nasyunpa mandacünin Og nishallanñamari lluy jatućha callwancunäpi quïdäla. Cämanpis jïrrupïmi cala; midïdanñatacmi largunmanꞌa tawa mitru, anchunmanꞌa ishcay mitru cala. Cayta canancamapis Amon läducunäpä Raba malcanćhu licachwanlämi.

Rubenta, Gadta, Manasespa ćhawpi ayllunta tücachishantam yalpachin Num 32.1-42

12“Chay allpacunaca maquinchicćhüña licälïluptinmi Ruben, Galaad ayllucunäman tücachilá. Cay allpacunaca cayan Arnon mayućhu cä Aroer malcäpïta aśhta Galaad ulꞌucunap ćhawpincamam.

13Ñatac Galaad parti puchücäta, Ogpa gubirnaśhan Basanta, Manasespa ćhawpi ayllunmanmi uyculá. Chaynütacmi callwanpa lisipäcuśhan Argob läductapis paycunaman uyculá.

14Chaypïtam Manasespa milaynin Jair jinantin Argob läducta aśhta Gesur, Maacap culindancama chalacuycula. Jinalculmi Basan-havot-jair nïwan śhutichäla; canancamapis chay śhutillanwanmi lisipäcun.

15Maquirtañatacmi Galaad läducta tücachilá.

16Ruben, Gad ayllucunätañatacmi Galaadpïta Arnon mayücama tücachilá. Culindanmi cala chay pampapïta allaycul Amon läducunäpa allpanwan tincuycü Jaboc mayup ćhawpincama.

17Chaynütacmi Araba läductapis uyculá. Chaypa lindancunam lluy Jordan mayuca cala. Chay mayum Cineret ućhapïta Araba lamarcäcama ütac Puchucü Lamarcäcama cala. Chay lamar cayan inti ishpimuna lädućhu cä Pisga ulꞌup saytanćhümari.

18“Chayćhümi paycunacta nilá: ‘Quiquin Tayta Diosniquim cay allpäta maquiquiman uycuśhulanqui. Canan alli-cama pilyä umricunaca armädu-cama Israel caśhta-masiquicunacta liwshipäcuy.

19Cay tücachishá malcacunäćhu walmiquicuna, chuliquicuna, lluy uywayquicunallam quïdapäcunꞌa. Yaćhaśhänüpis amcunap achca uywayquicunamari cayan.

20Chayurá uycuśhuśhayqui allpaman cutipämunqui maynümi amcunacta jawcayayta upäculac, chaynu wawꞌi-caśhayquicunactapis jawcayayta Tayta Dios uycuptinlämá; jinaman Jordan mayup chimpanćhu Tayta Diospa uśhan allpacta duyñuchacaycäliptinlämá’ nil.

21“Chayćhütacmi Josuetapis yaꞌa nilá: ‘Tuquictam licalanqui ishcay mandacücunäta Tayta Dios imacta lulaśhantapis. Chaynümi pay lulaycunꞌa pasapäcuśhayquićhu nasyuncunäwanpis.

22Amari manchaculcaychu; quiquin Tayta Diosniquim amcunapïta pilyanꞌa’ nil.

Jordan mayucta chimpananpä Moises mañacuśhantam yalpachin

23“Chayćhütacmi Tayta Diosta mañaculá:

24‘Tayta Diosllay sumä jatun cayniquitam, munayniquitam cay uyway nunallayquita licaycachimayta allayculanqui. ¿Mayanmá cay pachäćhu ütac janay pachäćhüpis sumä-cama lulaśhayquitanuꞌa lulaycunman?

25Ama chaynu callaychu, Jordan mayucta chimpaycachillämay, chay allin allpacta, tuquicama ulꞌuncunacta, Libano munticunätapis licaycunäpä’ nil.

26Ñatac Tayta Dios amcunap janayqui yaꞌawan piñacülulmi mana awnimälachu. Aśhwanpam caynu nimäla: ‘¡Upälla! Caycunapi amaña mastá limapämaychu.

27Pisga ulꞌüman ishpil chaypiꞌari tawan läducta licamuy. Jordan mayucta manañamá chimpanquichu.Num 27.12-14; Deut 32.48-52.

28Aśhwanpa Josueta yaćhaycachiy, caminaycuy, callpanchaycuy. Paymi israelcunäpa puntanta lil licamunayquipä cä allpacta tücachinꞌa’ nil.

29“Chaypïtam Bet-peorpa chimpan pampäćhu quïdaculanchic.