2 Samuel 10 - Old Testament Quechua Wanca（QVW）

Amon, Sirio läducunätam David llallin 1Cro 19.1-19

1Chay unay timpupïtam Amon lädup mandacünin Nahas wañucuptin chulin Hanunña, pudirnin mandacüca cala.

2Chaymi David pinsälun: “Papänin Nahas yaꞌacta allinpä licamäśhannümi yaꞌapis chulin Hanunwan caycuśhä” nil. Chaymi willacünincunactapis caćhälun Hanunpa papänin wañucuśhanpi llaquicuyninćhu cunsuylaycunanpä. Chay Davidpa willacünincuna Amon läduman ćhäluptinñatacmi ichá,

3chay malcap puydï yanapänincuna mandacünin Hanunta nicuyalcan: “Mandacü taytallay, ¿papäniquita cuyaśhan-laycuchun, jinaman altuman juluycuyninwanchun David cay willacünincunacta caćhayämunman imatá? ¿Aśhwanpa manachun malcanchicta camacaycünanpä licänin caćhayämun imamá?” nil.

4Chaynu nipäcuptinmi Davidpa willacünincunacta Hanun chalächin. Jinalculmi juc lädu cärallanpi śhaplanta cuchüchin; müdanantapis uticuncamam cuchüchin. Jinalculmi liculcänanpä caćhaycülun.

5Jinaptinmi Davidpa nunancuna sumä pinꞌacüśha cuticalcämun. Chayta mandacü David yaćhälulmi willacünincunacta caćhälun: “Jerico malcällaćhülä quïdacalcämuy śhaplayquicuna wiñamunancama; chaypïlämi cutipämunqui” nil.

6Ñatac Amon läducunaca Davidwan ćhïnichicälälishanta yaćhälälilmi Bet-rehob lädu, Sirio lädu Sobapi ishcay ćhunca walanga (20,000) nunacunacta pilyawshinanpä mincacälälila. Maaca malcap mandäcäpïtapis walanga (1,000) nunacunacta, Is-tob lädupïtapis ćhunca ishcayniyu walanga (12,000) nunacunacta puśhachimula.

7Chaycunacta David yaćhälulmi Joabtawan alli-cama lluy pilyänincunacta caćhälun.

8Amon läducunäñatacmi malcanpa puncuncama yalulcälil ćhulanacüśha pilyapäcunanpä cacuyalcäla. Siriaćhu cä, Soba, Rehob pilyäcunäñatacmi, Is-tob, Maaca pilyäcunäwan pampaćhu ćhulanacüśha cayalcäla.

9Chaynu ipanpapis puntanpapis lluy cunćhäśha caśhanta Joab licälulmi jinantin Israelpi allinnin-cama pilyäta aclälun Sirio läducunäwan pilyayta allacuycunanpä.

10Parti pilyäcunätañatacmi wawꞌi-caśhan Abisaipa maquinman ćhuläla Amon läducunäwan pilyapäcunanpä.

11Jinalculmi wawꞌi-caśhan Abisaita Joab nin: “Sirio läducunaca llallicayalcämaptinꞌa libraycamänïmi śhamunqui; chaynütac Amon läducunaca amtapis llallicuyalcäśhuptiquiꞌa libraycüniquim śhamuśhä.

12Chayurá ¡callpanchacuy! ¡Tayta Dios umäśhanchic nasyunnin-laycu, malcanchic-laycuꞌari sumäpa pilyaśhun! Quiquin Tayta Diosꞌari munaśhanmannu lulaycuchun” nil.

13Chaypïtam Joab lluy pilyänincunawan Sirio läducunäta camacaycünanpä aśhucuycuyaptin paycunañatac ayiculcan.

14Chaynu Sirio läducunaca ayipäcuśhanta licalmi Amon läducunäpis Abisaita caćhaycul malcaman pacacalcämü ayiculcan. Chaymi Joab pilyucta caćhayculña Jerusalenta cuticalcämun.

15Chaynu Israelwan llallichiculculmi Sirio läducunaca yapañatac juntunacälälin.

16Chaymi mandacü Hadad-ezer lluy ayächimun Eufrates mayup chimpanćhu cä Sirio lädu-masincunactapis. Paycunam Hadad-ezerpa puydï yanapänin Sobacpa mandunćhu Helam läduman lipäcula.

17Chayta David yaćhälulmi paypis jinantin Israelta juntüchimun. Jinalculmi Jordan mayucta chimpalcul paycunapis Helam läduman lipäcula. Chayćhümi Sirio läducunaca ćhulanacaycälil Davidwan pilyayta allacaycälin.

18Chayćhu Sirio läducunaca israelcunäpi ayiculcaptinmi anćhish paćhac (700) carritayücunacta, tawa ćhunca walanga (40,000) sillädacunacta David wañüchila. Chay pilyänincunap puydïnin Sobactapis ćhayćhümari wañüchila.

19Chaynu Sirio läducunaca israelcunäwan lluy llallichicüśhanta licalmi Hadad-ezerpa mandänincuna israelcunäwan amistaycälil maquinmanña ćhulaculcäla. Chay muyunpïtam Sirio läducunaca manaña mastá Amon läducunäta yanapayta pinsalcälilañachu.