Salmos 102 - Old Testament Quechua Wanca（QVW）

Llaquićhu cayalmi mañacunMandacüca llaquicuyćhu cayal Tayta Diospa puntanćhu mañacuśhan.

1 Tayta Diosllay, mañacuylläta uyaliycallämay.

Ayacuylläta ćhasquiycallämay.

2Llaquićhu cayaptí amari pacacuycuychu.

Ayacamuśhá üra juclla uyaliycamänayquipä

linlillayquitari quićhaycullay.

3Cawsaynïmari untaynu mana caśhanmanña muyuyällan.

Tullücunapis śhanśhanüñamá walalpuyällan.

4Śhunꞌüpis awïśha ulanüñamá pasaypi cayällan.

Micanaynïpis chincacunñamá.

5Mañacuy-mañacuy cayaptïmá

tullüpis fintaycunaña cayällan.

6Chunyäcäćhu chusic-yupayñamá cayällá.

Pulumäśhaćhu cä tucunüñamá cayällá.

7Puñuytapis manañamá talïñachu.

Wasi jananćhu japallan pälï pishu cäyäcänüñamá cayällá.

8Ćhïnimänïcuna mana jamayculñamá muyun-muyun jalutacayalcäman.

Śhutïtapis mana allin canäpäñamá ćhulayalcäman.

9Micuynïpis ućhpallañamá cayan.

Upyaśhäćhüpis wiꞌilläñamá cayan.

10Altuman julaycamanqui rabyacuyniquiwan

piñacuyniquiwan pampäman wicapaycämänayquipämá.

11Llantuycänümá cawsayní pasayan.

Ulänüñamá awilpuyällá.

12 Tayta Diosllay, amñatacmi ichá

wiña-wiñaypä mandacunqui.

Śhutiqui wiña-wiñaypä yalpaśhamá canꞌa.

13Śhalcunqui Sion malcacta llaquipaycunayquipämi.

Llaquipaycunayqui timpuñamá.

Yanapaycunayqui ürañamá.

14Pampaman muyüchisha cä malcanta

licapäcul sirbïniquip śhunꞌunpis nanaypañamá nanaycun.

Aśhta ćhaćhäśha pilancunactapis cuyapäcunmá.

15Jinantin nasyuncunäpis am Tayta Diostamá manchaculcäśhunqui.

Jinantin pachäćhu mandacücunäpis sumä cayniquitamá manchapäcunꞌa.

16Sionta Tayta Dios caśhan śhalcachiptinmari

sumä caynin licaycuśha canꞌa.

17Mana pïllanpis cäniyücunäpa mañacuyllantamá uyaliycunqui.

Paycunap ayacuynincunacta manamá unꞌaycunquichu.

18Caynu pasaśhancunaca ipa śhamücunäpä isquirbisha cachun,

näsimü malcaca Tayta Diosta alawapäcunanpä.

19 Tayta Diosmá altu yaćhaśhancäpïta licayämun.

Sïlüpïtamá cay allpäta licayämun.

20Wićhaläśha cäcunäpa iquicyalcul-iquicyalcul

mañacuynincunacta uyaliycunanpämá licayämun.

Wañuchisha cananpä cäcunäta libraycunanpämá licayämun.

21Jinaptinmi Sionćhu Tayta Diospa śhutinta willaculcanꞌa.

Jerusalenćhümi alawapäcunꞌa.

22Jinantin malcacunaca, mandacücunaca

juntunaculcanꞌa Tayta Diosta sirbipäcunanpä, alawapäcunanpämá.

23Callpayülä cayaptïmá callpäta apälläman,

watäcunactapis mirmächinmá.

24Chaymi nilá: “Tayta Diosnillay,

manalä timpüćhu amari puśhallämaychu.

Ampa cawsayniquiꞌa imaypis mana camacaycümá” nil.

25Allaycuycäćhu cay allpätapis anmá lulayculanqui.

Janay pachäpis maquiquiwan lulaśhayquimá.

26Lluy caycuna camacällamá.

Amñatacmi ichá wiña-wiñaypä caycunqui.

Chaycuna müdananu mawcällamá.

Müdanactanümá lluy pitwïlunquipis, cambiälunquipis.

27Amñatacmi ichá jinalla wiñaypä caycunqui.

Mana camacaycü watayümá canqui.

28Sirbïniquicunap milaynincuna

ñawillayquićhümá cawsaycälinꞌa.

Quiquiqui caśhayquićhümá tacyaycälinꞌa.