Ezequiel 5 - Old Testament Quechua Wanca（QVW）

1Nilculmi Tayta Dios niman: “Am wañucülla nuna, cananꞌa śhapla cuchucupä sumä afiläśha cuchillucta apticulcul ächayquita lutucuy; śhaplayquitapis cuchucuy. Jinalcul tupucuwan quimsa partiman chay cusca-camallacta laquïluy.

2Chaypi chay cunćhaläśhayqui muyunca camacäluptinñatacmi quimsaman laquishayqui ächacta malcaćhu cañaycülunqui; jucnin partictañatacmi jinantin malcäpa muyülïninćhu ispädawan cuchuy pawalcul chiꞌichinqui. Chay jucnin partictañatacmi waywäman wacaycülunqui. Yaꞌañatacmari ispädäwan paycunacta camacaycüśhä.

3Chay lutuśhayqui ächayquipi quimsa tawallacta chalalcul müdanayquip manyanman watäluy.

4Ishcay quimsallactatac ninaman wicapaycüluy walananpä. Chayllapïmari ninaca jinantin malcäman walälunꞌa” nil.

5Chaypïtam sumä munayniyu yaꞌa Tayta Dios ní: “Cayćhümá Jerusalen malca cayan. Lluy malcacunäpa ćhawpinmanmi yaꞌa ćhulayculá; juc nasyuncunäta muyülïninćhülä cananpämá ćhulayculá.

6Payñatacmi ichá nishäcunap, camachishäcunap cuntranlä śhalcälälin. Camachishäcunacta, yaćhachishäcunacta jalutaculcul muyülïninćhu cä malcacunäpïpis, nasyuncunäpïpis piyurlämá lulapäcunpis.

7“Chaymi yaꞌa Tayta Dios ní: Muyülïniquićhu nasyuncunäpïpis mas cullu linli-camam capäcunqui. Yaćhachishäta manamá uyaliculcanquichu; camachishäta manamá lulapäcunquichu. Má, aśhta chay malcacunap camachishancunallactapis manamari lulaycapäculanquichu canpis.

8Chaymi yaꞌa Tayta Dios ní: Yaꞌapis am Jerusalenpa cuntrayquim cayá. Lluy nasyuncunap ñawpäninćhümá amta mućhuycachishayqui.

9Millachicuy lulayniquicunapïmá canan sumäta lawćhaycuśhayqui; caytanuꞌa puntacta manamá mayantapis lawćhayculächu nï śhamü timpućhüpis lawćhaycuśhäpischu.

10Chaymari amcunaćhu tayta mamacunaca chulincunacta micapäcunꞌa;Deut 28.53-57; Jer 19.9; Lam 4.10. chulicunäpis taytancunactam micapäcunꞌa. Yaꞌamari mućhuycachishä, aśhta quïdäcunätapis intiru-intirumanmá chiꞌichishä.

11“Chaymi yaꞌa Tayta Dios rasunpa cawsaśhänu, chuya carpäta millachicuy anla lulaśhayquicunawan jalutacuśhayquipi camacaycälälishayqui; manamá llaquipaycuśhayquichu nï pampachaycuśhayquipischu.

12Amcuna quimsa partiman laquïsha capäculmi jucnin parti micuycunapi, ishyaycunawan cällicunäćhu wañupäcunqui. Juc partiñatacmi malcap muyülïninćhu ispädawan wañupäcunqui. Chay quïdä partictañatacmi intiru-intiruman chiꞌichishä. Ispädäwanmá amcuna aticaćhaśha capäcunqui.

13“Chaylämi piñacuyní śhaycunꞌa, rabyacuyní pasanꞌa; chaylämi jawcayaycuśhä. Chayćhümi yaćhapäcunꞌa yaꞌa Tayta Dios sïlacuynïćhu nishäta.

14Yaꞌa mana cäman muyülächiptïmi muyülïniquićhu lluy nasyuncunaca, chayninpa pasäcunaca asipäculcäśhunqui.

15Sumä piñacuynïćhu, rabyacuynïćhu amta mućhuycachiptïmi muyülïniquićhu nasyuncunäpa asipäculcänan, jamuyäculcänan, burlaculcänan jinaman licachipä capäcunquipis. Yaꞌa Tayta Diosmari niyá.

16“Camacaycü flïchactanümi micuy wanaycäta amcunaman caćhamuśhä. Ima micuypis pishinanpämá, micuy wanay cacunanpämá caćhamuśhä.

17Awari, micuy wanaytawan munti uywacunactamá caćhamuśhä mana chuliyüta caćhaycapäcuśhunayquipä. Ishyaycunäwan ispädacunämi camacaycälälishunqui.Eze 14.21; Apo 6.8. Yaꞌa Tayta Diosmari niyá” nil.