1Maynu cushisham allin cawsayllaćhu pulïcunaca.
Maynu cushisham Tayta Diospa yaćhachicuyninćhu pulïcunaca.
2Maynu cushisham yaćhachicuyninta cäsucücunaca,
llapan śhunꞌunwan ashïcunaca.
3Tayta Diospa caminunćhu pulïcunaca
mana allincunätá manamari lulaycälinchu.
4Anmá camachilanqui yaćhachicuyniqui,
sumä manchacuywan cäsucuśha cananpä.
5Maynu allinlä canman
camachicuyllayquićhu sumäta yaꞌa tacyaycuptiꞌa.
6Lluy nishayquimannu cawsayculꞌa
manamá imapi uyshuläná canꞌachu.
7Allin tincüninman licaycü caśhayquita
yaćhalmá lluy śhunꞌüwan alawaycuśhayqui.
8¡Camachicuyniquitam lulayculläśhä!
¡Pasaypipä amari unꞌaycallämaychu!
Bet9¿Imanuypamá müsuca chuya allinlla cawsaycunman?
Yaćhachicuyniquita śhunꞌunman ćhulayculmá.
10Taytallay, llapan śhunꞌüwanmá ashiycullac.
Yaćhachicuyniquipi mana pantaycunäpä licaycallämayꞌari.
11Willacuyniquita śhunꞌümanmi ćhulayculá
ampa cuntrayqui mana lulanäpä.
12¡Tayta Diosllay, allinpä licaśham canqui!
Camachicuyniquita yaćhaycachillämay.
13Lluy nipämäśhayqui camachicuyniquicunacta shimïmi willaycun.
14Lluy ima cäniyu caypïtapis mas-mastalämi
yaćhachimäśhayquimannu cawsaycul cushicú.
15Yaćhachicuyniquimanmi tantiapayculläśhä.
Caminuyquimanmi ñawilläta ćhulayculläśhä.
16Willacuyniquicunaćhümá cushicú.
Limayniquita manamá unꞌaycuśhächu.
Guimel17Cay nunallayquita llaquipaycallämayꞌari cawsaycunäpä.
Chayćha yaćhachicuyniquita cäsulläśhä.
18Ñawilläta quićhaycallämay maynu-maynu
yaćhachicuyniqui caśhanta sumäta tantiapaycunäpä.
19Cay allpäćhu pasacüllam cayällá.
Amari yaꞌapïta camachicuyniquita pacaycullaychu.
20Camachicuyniquipi imaypis wañupacuyalmá
jämalcuytapis manaña atipällächu.
21Taytay, yaćhachicuyniquipi japächacücunäta,
nunatucücunäta, mana allin
juyu nunacunätamá lacsaypa-lacsaycülunqui.
22Yaꞌactañatac pinꞌaypïta,
jamuyäśha caypïta japächaycallämay.
Yaćhachicuyniquita yaꞌa cäsucümá.
23Masqui puydï mandacücuna cuntrá
limanaculcaptinpis cay nunallayquiꞌa
camachicuyllayquimanmá tantiapaycun.
24Yaćhachicuyniquimá cushiycachimäní, limapaycamäní.
Dalet25Wañüśhanüñamá pulbüćhu piswacalpuyällá.
Limaśhayquimannuꞌari cawsapacachillämay.
26Imanuy caśhätapis willacuptí uyaliycallämälanquimá.
Camachicuyniquita yaćhaycachillämayꞌari.
27Yaćhachicuyniquita tantiaycachillämay
sumä-cama lulaycuśhayquicunäta tantiapaycunäpä.
28Sumä llaquicuyćhu anualpuyälläñamá.
Limalicuśhayquimannuꞌari tacyaycachillämay.
29Artish cawsaycunäpïta japächaycallämay.
Llaquipayniquićhu yaćhachicuyniquiwan lisiycachillämay.
30Rasun allin caminuctamá aclaycú.
Tincüninman-cama licaycuyniquitamá ashiycú.
31 Tayta Diosllay, yaćhachicuyniquimanmi laꞌacacülú.
Amari pinꞌayman ćhulaycallämaychu.
32Sumäta tantiaycachimaptiquimari yaćhachicuyniquita
cushicuywan mana-mana lulayculläśhä.
He33 Tayta Diosllay, camachicuyniquita
yaćhaycachillämay wañucunäcama cäsucunäpä.
34Camachicuyniquimannu cawsaycunäpä,
llapan śhunꞌüwan lulaycunäpä tantiayta uycallämay.
35Yaćhachicuyniquip, allin caminuyquip puśhaycallämay.
Chayćhümá sumä cushicuyta taliycú.
36Lägacuycunällaćhu śhunꞌú cayänantá
aśhwanpa yaćhachicuyllayquićhu śhunꞌú cananpä ćhulaycuy.
37Yanꞌalcunaman ñawillá licayänanpïta japächaycallämay.
Caminuyquićhu yaꞌa puliycunäpä licaćhacachillämay.
38Cäsucüniquicunaman limalicuśhayquitari
cay nunallayquiwanpis lulaycuy.
39Pinꞌacuy lulaycunäta yaꞌapïta juluycullayꞌari.
Chaytá manchacullämá.
Tincüninman licaycuyniquiꞌa maynu allinmá.
40Yaćhachicuyniquipi wañupacümi.
Tincüniquimannuꞌari cawsapacachillämay.
Vau41 Tayta Diosllay, llaquipäcuyniquita licaycachillämay.
Limalicuśhayquimannu salbaycallämay.
42Chayćhá yaćhachicuyniquiman chalapacuśhäpi
jamuyämänïcunäta niycunäpä caycunꞌa.
43Awari, rasuncäta shimïpïta imaypis ama juluycuychu.
Tincüninman-cama licaycuyniquimanmá alcaycuyá.
44Yaćhachicuyniquita imaypis
wiña-wiñaypämá sumä cäsucuśhä.
45Nimäśhayquita lulayman
ćhulayculmá libriña cawsaycuśhä.
46Yaćhachicuyniquicunapi mandacücunäćhu
limal manamá pinꞌacuná canꞌachu.
47Sumä cuyaśhá camachicuyniquićhümá cushicú.
Maynu-maynümá cuyá.
48Maquïta chacchalculmari cuyaśhá camachicuyniquita altuman juluycullá.
Nimäśhayquimanmá yalpalayá.
Zain49Cay nunallayquiman limalicuśhayquita yalpayꞌari.
Limalicuśhayquimanmá chalapacachimälanqui.
50Chaymá llaquicuynïcunaćhüpis cunsuylaycaman.
Willacuyniquimá cawsapacachiman.
51Nunatucücunaca maynu-maynu
jamuyayalcämaptinpis yaꞌa manamá yaćhachicuyniquipi laquicüchu.
52 Tayta Diosllay, allaycuycäpi nimäśhayquicunäta
yalpalmá jawcayayta taliycú.
53Mana allin nunacunaca yaćhachicuyniquita
unꞌäläliptinmá sumä-sumäta piñacüśha cayá.
54May malca caśhäćhüpis,
camachicuyniquimá taquí caycullan.
55 Tayta Diosllay, tutanpapis śhutiquimanmá yalpalayá.
Yaćhachicuyniquimannümá cawsaycú.
56Awari, caynu cawsaycú, shimiquita uyaliculmá.
Chet57Lluy ima cänïpis am Tayta Diosllämá caycunqui.
Yaćhachicuyniquimannu cawsaycunäpämi limalicú.
58Llapan śhunꞌüwanmá amta ashiycullac.
Limalicuśhayquimannuꞌari llaquipaycallämay.
59Imanuy pulishätapis sumäta tantiacuyculmi
yaćhachicuyniquiman caśhallan cutiycamulá.
60Mana-mana paćhcayculmari
willacuyniquimannu cawsaycullá.
61Mana allin nunacunaca muyülïnïćhu
sumä cacuyaptinpis camachicuyniquita manamá unꞌaycüchu.
62Tincüllanman licaycü caśhayquipïmá
ćhawpi tuta śhalcuculcul alawaycullac.
63Amta manchacücunäwan,
yaćhachicuyniquita cäsucücunäwanmari allinpä apanaculcá.
64 Tayta Diosllay, jinantin allpämá
sumä llaquipayniquip juntäśha cayan.
Camachicuyniquita yaćhaycachillämay.
Tet65 Tayta Diosllay, cay nunallayquita
nishayquimannümá allinpä licaycallämanqui.
66Shimiquimanmi chalapacú.
Allin tantiaytawan yaćhaytari yaćhaycachillämay.
67Manaläpis usuchisha cayalmi pantäśha pulilá.
Cananñatacmi ichá yaćhachicuyniquita cäsucú.
68Amꞌa allinmi canqui. Allincällactamá lulaycunquipis.
Camachicuyniquitari yaćhaycachillämay.
69Nunatucücunaca yanꞌalpi juchachapämaptinpis
llapan śhunꞌüwanmá yaćhachicuyniquita cäsucú.
70Paycunap śhunꞌun sumä lumiyäśha imactapis mana sintïmi cayan.
Yaꞌañatacmi camachicuyniquićhu sumä cushicú.
71Allinpämá usuchisha calá.
Chaynüpamari camachicuyniquita yaćhaycú.
72Walanganpi cä illaycunäpi, ürucunäpïpis
mas allinmi yaćhachicuyniqui.
Yod73Am quiquiquimá maquiquiwan lulaycul cawsayta uycamälanqui.
Camachicuyniquita yaćhanäpä tantiayta uycallämay.
74Yaćhachicuyniquiman chalapacuśhäta licapämalmari
altuman juluycuśhüniquicuna cushiculcanꞌa.
75 Tayta Diosllay, tincüninman-cama
licaycü rasun caśhayquita yaćhaycümá.
Chaynütacmi tincüniquiman-cama lawćhaycamäśhayquitapis yaćhaycú.
76Cay nunallayquiman limalicamäśhayquinuꞌari
canan llaquipaycamal cunsuylaycamay.
77Llaquipayniqui śhamuchunꞌari cawsayta uycamänanpä.
Yaćhachicuyniquićhümá sumä cushicú.
78Yanꞌalpi jalutacamä nunatucücunaca uyshulächisha capäcuchun.
Yaꞌañatacmi camachicuyniquiman yalpalayá.
79Yaćhachicuyniquita lisïcunaca,
altuman juluycuśhüniquicunaca yaꞌawan cusca juntunaculcächun.
80Camachicuyniquićhu llapan śhunꞌú
caycullächun imapïtapis mana uyshulänäpä.
Caf81Salbaycamänayquipä alcaynïwan wañuypa patanćhüñamá cayällá.
Yaćhachicuyniquimanmá chalapacuynïta ćhulaycamullá:
82“¿Imayñaćh yanapaycamäní śhamunꞌa?” nil
limalicuyniquita alcay-alcay cayaptïmá ñawilläpis aspalpuyällanña.
83Masqui mana cäpa licaśha, ütac chaquïshanu, shipüśhanu
cayalpis camachicuyniquicunacta manamá unꞌaycullächu.
84Cay nunallayqui ¿imaycamamá caynu alcaycunꞌa?
¿Imayñatá aticaćhamänïcunacta cäraycunqui?
85Yaćhachicuyniquimannu mana cawsä
nunatucücunämá palpunäpä trampacta ućhcülälin.
86Lluy willacuyniquicuna rasu-rasunpamá.
Yanꞌal-yanꞌalpïmá aticaćhaśha cayällá, yanapaycamayꞌari.
87Ñaćha-ñaćham cay allpäpi wicapäläliman.
Yaꞌañatacmi ichá camachicuyniquita mana caćhaycüchu.
88Llaquipayniquimannuꞌari cawsapacachimay.
Chayćha nimäśhayquimannu cawsayculläśhä.
Lamed89 Tayta Diosllay, limalicuśhayquica wiña-wiñaypämá.
Janay pachäćhu tacyaycachishamá cayan.
90Amllamá wiña-wiñaypä chalapacuna canqui.
Cay allpäta am tacyaycachiptiquimá jinallaćhu tacyaycun.
91Lluy imapis nishayquinüllamá canancama masïsu tacyayalcan.
Lluy chaycuna sirbiycälishunquimá.
92Yaćhachicuyniqui cushicuyta mana
uycamaptinꞌa llaquicuyca camacaycämanmanñaćh cala.
93Shimiquita manamá imaypis unꞌaycuśhächu.
Chaywanmá cawsaycachillämanqui.
94Salbaycallämayꞌari nunayqui caśhä-laycu,
yaćhachicuyniquita ashiycuśhä-laycu.
95Mana allin nunacunämá pampaman
muyuchipämänanpä licapayalcäman.
Yaꞌañatacmi ichá yaćhachicuyllayquita licaycullá.
96Lluy ima allincunapis camacälla caśhanta licaycümi.
Yaćhachicuyniquiñatacmi ichá imaypis mana camacä.
Mem97Camachicuyniquita maynu-maynümi ama-pacha niycullá.
Chayllamanmá anyaśh muyunpis yalpalayällá.
98Yaćhachicuyniqui yaꞌaćhu cayaptinmá
ćhïnicünïcunapïta mas yaćhayniyümanlä muyuycachimanqui.
Yaćhachicuyniquimá imaypis yaꞌawan caycun.
99Nimäśhayquiman tantiapayaptïmá
lluy yaćhachimänïcunapïtapis mas tantiayniyülä caycú.
100Shimiquita cäsuculmá yaśhacunäpïtapis
mas tantiayniyülä caycú.
101Yaćhachicuyniquita lulaycunäpämá
lluy imaymana mana allin caminucunapïpis ćhaquïta aśhuycachí.
102Ampa shimiquipïñatacmi ichá mana imaypis japächacullächu.
Chaycunawan yaćhachimäśhayqui-laycum mana laquicüchu.
103Limayniqui sumä mishquimá.
Mishquicunäpïtapis mas mishqui-mishquilämá.
104Shimiquipïtamá tantiayta ćhasquiycullá.
Chaymi lluy imaymana mana allincunätá ćhïnicullá.
Nun105Shimiqui michïrunümá puliynïpä,
acchinümá caminüpä.
106Sumä yaćhachicuyniquicunacta tincüninman
lulaycunäpä limalicuśhäta lulaycuśhämi.
107 Tayta Diosllay, sumä ñacayćhümi cayällá.
Nishayquimannuꞌari cawsaycachillämay.
108 Tayta Diosllay, ama chaynu callaychu
shimïwan alawaycuśhäcäta uycunactanu ćhasquiycallämay.
Yaćhachicuyniquita yaćhaycachillämay.
109Cawsayní wañuypa patanćhu walan-walan
cayällaptinpis yaćhachicuyniquita manamá unꞌaycullächu.
110Mana allin nunacunaca trampacunacta
ćhulälälimaptinpis camachicuyniquipïta manamá laquicüchu.
111Yaćhachicuyniquimá wiña-wiñaypä tücäní,
śhunꞌüta sumä cushiycachimänïmari.
112Llapan śhunꞌüwanmá camachicuyniquita lulaycuśhä.
Camacaycäcamamá wiña-wiñaypä lulayculläśhä.
Samec113Ishcay cära nunacunätá ćhïnicümi.
Yaćhachicuyniquitañatacmi ichá cuyá.
114Anmá pacaycamäní, atajaycamäní caycunqui.
Shimiquimanmá chalapacullá.
115Juyu nunacuna, yaꞌapïta aśhupäcuy
Tayta Diosnïpa nimäśhantamá lulaycuśhä.
116Taytallay, limalicuśhayquimannu
callpanchaycamaptiquiꞌa cawsayculläśhämá.
Chalapacuyní amari yanꞌalpa caycullächunchu.
117Yanapaycamaptiquiꞌa salbaycuśham calläśhä.
Camachicuyniquita imaypis lulayculläśhämi.
118Camachicuyniquipïta laquicücunätá camacaycülunquimá.
Paycunaćhuꞌa mana allin articunallamá cayan.
119Cay allpäćhu mana allin nunacunäta
pasaypi anlactanümá juc läduman wicapälunqui.
Chaymá yaćhachicuyniquita cuyaycullá.
120Ampa puntayquićhu manchacuypïta aychäpis chucchunmá.
Camachicuyniquita manchacuywanmá licaycullá.
Ayin121Tincüninman-cama licaycuycätawan allincätamá imaypis lulaycullá.
Ñacachïnïcunap maquinman amari caćhaycallämaychu.
122Cay nunallayquitari allin cananpä tacyaycachillämay.
Nunatucücunaca ñacachimänanta amari munaycuychu.
123Salbaycamänayquipä alcayaptïmá ñawilläpis aspalpuyällanña.
Tincüniquiman limalicuśhayquimannu julaycamänayquipämá alcaycuyällá.
124Cay nunallayquita llaquipäcuyniquimannuꞌari licaycullay.
Camachicuyniquita yaćhaycachillämayꞌari.
125Nunallayquimá callá; yaćhachicuyniquita
lisiycunäpä tantiayta uycallämay.
126 Tayta Diosllay, lulaycunayqui timpuñamá.
Yaćhachicuyniquita jalutacuyalcanñamá.
127Yaꞌañatacmi ichá ürucunäpïtapis, sumänin
ürucunäpïtapis mas-mastalä yaćhachicuyniquita ama-pacha niycullá.
128Chaymi lluy imaymana mana allincunactapis ćhïnicú,
aśhwanpa lluy imacunapïtapis mas ćhaniyüninpä
yaćhachicuyllayquitamá ćhulaycú.
Pe129Yaćhachicuyniqui maynu-maynu allinmá.
Chaymi śhunꞌüman ćhulaycullá.
130Yaćhachicuyniquita tantiaycachishá acchiycunmá.
Mana tantiäcunätapis tantiaycachinmá.
131Camachicuyniquipi wañupacuyalmá
shimïpis sumä micanäśhanu äśhaycaćhayan.
132Ampa śhutiquita wañupacüniquicunawan maynümi lulaycunqui,
chaynuꞌari yaꞌacta licaycamal llaquipaycallämay.
133Yaćhachicuyniquimannuꞌari caminaycallämay.
Mana allincäpa maquinćhu canäta amari munaycullaychu.
134Nunacunäpa ñacachiyninpïta libraycallämay
nimäśhayquicunäta lulaycunäpä.
135Sumä chipyayniquita cay nunallayquiman achicyaycachillämay.
Camachicuyniquitapis yaćhaycachillämay.
136Yaćhachicuyniquita manaña cäsuculcaptinmá
ñawïpïta wiꞌillaña mayunu unyayämun.
Tsade137 Tayta Diosllay, amllamá sumä allinnin canqui.
Cäraycuyniquipis tincüllanmanmá cayan.
138Uycapämäśhayqui yaćhachicuyniqui
tincüllanman-camamá, chalapacunamá.
139Ćhïnicünïcuna shimiquita jalutacäläliptinmá sumä amïshaña cayá.
140Limalicuyniqui yaćhapaycuśha cananpä imaymanapmi pasala.
Chaymi cay nunallayqui ama-pacha nillá.
141Masqui mana cäpa licaśha, jamuyäśha
cayalpis nimäśhayquitá manamá unꞌaycullächu.
142Tincüninman licaycuyniqui wiña-wiñaypä tincüllanmanmá.
Camachicuyniquipis rasuncällamá.
143Llaquicuywan ñacaywan intüśha cayaptïpis
yaćhachicuyniquiñatacmi ichá cushiycachilläman.
144Yaćhachicuyniqui imaypis allin tincüllanmanmá.
Cawsaycunäpä tantiayta uycallämay.
Cof145 Tayta Diosllay, llapan śhunꞌüwanmi mañacamullac.
Uyaliycallämayꞌari camachicuyniquita cäsucunäpä.
146Amllactamá ayacamullac.
Yaćhachicuyniquita cäsucunäpä salbaycallämay.
147Manaläpis achicyalpuptinmá mañacamullac.
Limalicuśhayquimanmá chalapacamullá.
148Camachicuyniquiman tantiaycunäpämá
tutay walächi mana imchiycullächu.
149 Tayta Diosllay, llaquipayniquimannu uyaliycallämay.
Tincüninman licaycuśhayquimannu cawsaycachillämay.
150Juyu aticaćhamänïcunaca jiꞌacaycayämunñamá.
Yaćhachicuyniquipïtañatacmi ichá calućhüña cayalcan.
151Am Tayta Dioslläñatacmi lädulläćhu cayanqui.
Lluy camachicuyniquicuna rasuncällamá.
152Una-unaypïñamá yaćhachicuyniquita yaćhaycullá.
Willacuyniquita wiña-wiñaypämá tacyaycachilanqui.
Resh153Llaquicuylläta licaycamalꞌari libraycallämay.
Yaćhachicuyniquita manamá unꞌaycullächu.
154Yaꞌapa faburní śhalcalcamal libraycallämay.
Limalicuśhayquimannu cawsaycachillämay.
155Mana allin nunacunäpïta calućhümá salbacuyniqui cayan.
Camachicuyniquita paycuna manamá ashiycälinchu.
156 Tayta Diosllay, maynu jatu-jatunmá llaquipayniqui.
Tincüninman licaycuśhayquinuꞌari cawsaycachillämay.
157Aticaćhamänïcunawan ćhïnicünïcuna achca-achcamá cayalcan.
Yaꞌañatacmi ichá yaćhachicuyniquipi mana japächacullächu.
158Ipanchaśhüniquicuna willacuyniquita mana cäsuculcäśhanpïmá
paycunacta licaytapis mana munal millachicú.
159 Tayta Diosllay, camachicuyniquita cuyaśhäta licayꞌari.
Llaquipayniquimannuꞌari cawsaycachillämay.
160Lluy yaćhachicuyniquicuna rasuncällamá.
Tincüninman cäraycuyniquipis wiña-wiñaypämá.
Sin161Puydï nunacunaca yanꞌal-yanꞌalpi aticaćhamaptinpis
yaꞌañatacmi ichá shimillayquita manchacú.
162Sumä ćhaniyu tapädacta talïcänümá
yaćhachicuyniquipi cushisha cayá.
163Casquicuycäta sumämi millachicú.
Licalcuytapis manamá munächu.
Camachicuyniquitam ichá cuyallá.
164Tincüninman licaycü caśhayquipïmá
imay ürapis alawaycullac.
165Shimiquita ama-pacha nïcunaca
allin jawca cawsayćhümi sumä caycälin.
Paycunactá imapis manamá palpuycachinmanchu.
166 Tayta Diosllay, salbaycamänayquitamá alcaycuyällá.
Nimäśhayquicunäta lulaymanmá ćhulaycullá.
167Yaćhachicuyniquitamá cäsucú.
Llapan śhunꞌüwanmá cuyá.
168Yaćhachicuyniquita willacuyniquita imaypis cäsucullämá.
Imanuy cawsayní caśhantapis tuquictamá lisimanqui.
Tau169 Tayta Diosllay, mañacuyllá anman ćhaycamuchun.
Am nishayquimannu tantiayta uycallämay.
170Ayacuyllá anman ćhaycamuchun.
Limalicuśhayquimannu libraycallämay.
171Camachicuyniquita yaćhaycachimaptiqui
shimïpi alawaycuylla yalaycamuchun.
172Camachicuyniquipïta shimí taquiycuchun.
Limayniquicuna allin tincüllanman caśhanpi
alawaycuylla shimïpi yalaycamuchun.
173Yaꞌami shimiquita atinäpä aclaycullälá.
Yanapaycamänayquipä maquillayqui listu caycuchun.
174 Tayta Diosllay, salbaycamänayquipïmi wañupacuyällá.
Yaćhachicuyniquićhümá sumä-sumä cushicú.
175Cawsayta uycallämay alawaycunacpä.
Tincüninman licaycuyniqui yanapaycallämächun.
176Uwish pintïshanümá pantäśha puliyällá.
Yaćhachimäśhayquita manamá unꞌaycullächu.
Cay nunallayquita ashiycü śhaycamullayñari.
Who We AreWhat We EelieveWhat We Do
2025 by iamachristian.org,Inc All rights reserved.
