Isaias 37 - Old Testament Quechua Wanca（QVW）

Senaqueribpa maquinpïta Juda libraycuśha cananpämi nin 2Rey 19.1-37; 2Cro 32.20-23

1Chayta mandacü Ezequias uyalïlulmi llaquicuypi müdananta laćhyalcul, shicacü müdanawan ćhulaculcul Tayta Diospa alawana wasinman yaycula.

2Chaypïtam shicacü müdanawan müdacuśha-camacta, palasyućhu yanapä puydï Eliaquimta, isquirbïnin Sebnacta, puydï sasirdüticunätapis Amozpa chulin willacü Isaiasman caćhala.

3Paycunam nipäcun: “Ezequiasmi caynüta nin: ‘Canan muyun llaquisha, ñacachisha, jalutacuyman ćhuläśhamá cacuyanchic; ishyacunanpäña cayal mana callpayu walminüñamari cayanchic.

4Asiria mandacüca pilyänincunap puydïnin caćhamuśhanca ima nishanta, ichapis Tayta Diosniqui uyalïla. Chay limaynincunawan cawsa Tayta Diosniquita jalutacuśhanpi mućhuycachichunꞌari. Quïdäcunäpïñatac mañacullay’ ” nil.

5Chay nishantam mandacü Ezequiaspa yanapänincuna Isaiasman willaycälila.

6Niptinmi Isaias nin: “Mandacüniquiman niycamuy Tayta Dios caynu nishanta: ‘Asiriap puydï yanapänincuna nimäśhancunapi ama manchacuychu; yaꞌactamari jalutacayäman.

7Uyalipämay, yaꞌa quiquïmi Asiriap mandacüninta llaqui willacuywan jucmanyächiptí nasyunninman cuticunꞌa. Chayćhümi ispädawan wañuchisha canꞌa’ ” nil.

8Chaypïtam chay pilyäcunap puydïninca cutila Asiriap mandacüninman. Mandacüninñatacmi Laquis malcapi licuña Libna malcayücunäwan pilyä.

9Chayćhümi Asiriap mandacünin uyalïlun Etiopiap mandacünin Tirhaca pilyänincunawan cuntran śhacayämüta. Chaymi chay Tirhaca pilyänincunap cuntran manaläpis pilyä yalul mandacü Ezequiasman willacüninwan yapa willacachimula:

10“Judapa mandacünin Ezequiasta caynümi ninqui: ‘Chalapacuśhayqui Tayta Diosniquiwan ama ingañachicuyaychu. “Asiriap mandacüninpa maquinman Jerusalen manamá palpunꞌachu” nishanman ama chalapacuyaychu.

11Am tuquictamá yaćhanqui Asiriap mandacünincuna jinantin malcacunäta lluy camacaycälälishanta. Chaychun ¿am salbacülunquimanlä canpis?

12¿Awquillücuna camacaycüśhan cä malcacunäpa taytachancuna librayculachun imamá? Gozan, Haran, Resef, Eden malcacunäta, jinaman Telasar lädućhu yaćhäcunätapis manamari librayculachu.

13¿Mayćhümá Hamatpa, Arfadpa mandänincunapis cayalcan? ¿Mayćhütá Sefarvaim, Hena chaynütac Iva malcacunap mandacünincunapis cayalcan?’ ” nil.

14Chay willacücunäpa maquinpïta cartacta Ezequias ćhasquiyculmi lïgila. Chaypïtam Tayta Diospa wasinman lilcul Tayta Diospa ñawpäninman cartacta quićhalayäta ćhulaycula.

15Jinalculmi Tayta Diosta nin:

16“Sumä munayniyu Taytallay, Israelpa Tayta Diosnin, querubin anjilcunäpa ćhawpinćhu cawsä Taytallay, jinantin allpäćhu munayniyücunäpa Tayta Diosnin amllamá canqui. Amllamá janay pachätapis cay pachätapis lulalanqui.

17Tayta Diosnillay, uyshutyayculꞌari uyaliycallämay; ñawiquita quićhayculꞌari licaycuy. Am cawsä Tayta Diosta jalutacunanpä Senaquerib lluy willacachimuśhanta uyaliycuyꞌari.

18“Tayta Diosllay, Asiriap mandacünincuna rasunpamá lluy nasyuncunacta, allpantinta-camacta camacaycüla.

19Chay nasyuncunap diosnincunacta nina walayäcämanmari jitaycüla. Manamari dioschu cala, sinuꞌa nunacunallap lulaśhan lumicunawan ilucunallamari cala. Chaymari camacaycüla.

20Cananꞌa Tayta Diosnillay, chaypa maquinpïta libraycälillämay. Chayćha am Tayta Diosllá sumä pudirniyu Dios caśhayquita jinantin allpäćhu nasyuncunaca yaćhapäcunꞌa” nil.

Senaqueribmi wañucun 2Rey 19.20-37; 2Cro 32.20-21

21Jinaptinmi mandacü Ezequiasman Amozpa chulin Isaias caynu nichila: “Israelpa Tayta Diosnin caynümi nin: ‘Asiriap mandacünin Senaqueribpi mañacamäśhayquita uyaliycucmi.

22Chaymi yaꞌa Tayta Diospaypa cuntran caynu ní:

“ ‘Mandacü Senaquerib, amtamá tuquish Sion malca

lasac wamla jamuyäśhannu asipäśhunqui.

Ayicuptiquimá Jerusalen malca,

wamlanu umallanta aywicun.

23¿Mayantamá palalanqui, jalutaculanqui?

¿Mayanmanmá shimiquita pallalculanqui?

¿Pictamá ñawiquiwan nana-nanaypa licalanqui?

¡Israelpa Chuya Tayta Diosnintamari!

24Caćhamuśhayqui nunayquicunawanmari Tayta Diosta

jalutacachilanqui. Nilanquimari:

“Altu-altunnin ulꞌucunämanpis,

Libano ulꞌup wätancunamanpis,

achca-achca carritäcunawanmá yaycüśhä.

Jatu-jatun cedro iluncunactapis,

sumä-cama cipresnincunactapis cućhpächishämá.

Allin altunnin ulꞌucunämanpis ishpïshämá;

sumä-cama munticunämanpis yaycüśhämá.

25Juc lädu nasyun chaqui allpacunäćhümá

püsucunacta aśhpiycul yacuctapis upyalá.

Ćhaquïwan jalulculmi Egiptop mayuncunactapis lluy chaquïchilá” nil.

26“ ‘Ñatac ¿manachun uyalilanqui

yaꞌa Tayta Dios una-unaypïtaña

ima lulanäpäpis camachishäta?

Unaypïña camachishäcätamari cananꞌa lulaycuśhä.

Camachishämannümari sumä-cama malcacunäta,

am tunilcul lluy camacaycülunqui.

27Chayćhu cawsäcunäpa callpanpis

chincacuptinmá sumä ćhinaśhyäläliśha

imanaytapis nï atipapäcunꞌachu.

Paycuna ćhaclaćhu ulacuna,

llullu pastucunänümi chaquïlälin;

wasip jananćhu wiñä ulacunänümá

manalä sumäta wiñal chaquilälin.

28“ ‘Amta tuquictamá yaꞌa lisic; imay yaluśhayquita

imay cutiycuśhayquitapis yaćhämari.

Yaꞌapi sumä piñacuśhayquitapis yaćhätacmá.

29Chayurá yaꞌap cuntrá piñacuśhayquipïmi,

jinaman nunatucuyniqui yaꞌacama ćhämuśhanpïmi,

sinꞌayquiman ganchucta ćhuläśhayqui,

shimiquimanñatac jaquimacta.

Jinalculmá śhamuśhallayqui

caminup cutichishayqui’ ” nil.

30Chaypïta Ezequiastañatacmi Isaias caynu nin:

“Nishäca rasun caśhanta yaćhapäcunayquipä caynümi canꞌa.

Cay wata micapäcunqui quiquillanpi wiñamücunätam;

wata śhamücañatacmi chaycunap chillquinta micapäcunqui.

Quimsa wata śhamücäćhüñatacmi

imacta talpupäculpis cusichapäcunquiña;

übacta talpupäculpis wayuyninta micapäcunquiñamá.

31Judaćhu quïdäcunämari

jinaman camacaycüśha caypïta ayïcunämari

lantanu sapichaculcal allicta wayupäcunꞌa.

32Jerusalenćhümi ashchaylla quïdaycälinꞌa;

Sion ulꞌućhümi cawsayniyu puchuycälinꞌa.

Sumä munayniyu Tayta Diospa cuyayninwanmari

chaynu pasaycunꞌa” nil.

33Asiriap mandacüninpämi Tayta Dios caynu nin:

“Pilyänincuna Jerusalen malcaman manamá yaycamunꞌachu

nï juc flïchallactapis ćhaycachinꞌachu;

atajachicuntapis mana pallalcullalmá śhapämunꞌa;

allpactapis murällap ipanman manañamá muntunanꞌañachu.

34Caminu śhamuśhallanpamari cuticunꞌa;

cay malcaman manañamá yaycamunꞌañachu.

Yaꞌa Tayta Diosmari chaynu niyá.

35Cay malcacta yaꞌami ñawilläćhu caycachil salbaycuśhä.

Chaynu lulaycuśhä sirbïní David-laycumari,

jinaman quiquïtapis rispitachicuynïwanmari” nil.

36Chay tutam Tayta Diospa anjilnin Asiria läducuna jamapäcuśhanman lilcul, paćhac pusä ćhunca pichayu walanga (185,000) pilyäcunacta wañüchin. Quïdäcunäñatacmi achicyäluptin wañüśhacunalla maśhtalayalcäta talïlälin.

37Jinaptinmi Asiriap mandacünin Senaquerib, carpancunacta juntulcul, Ninive malcanman cuticul, chayćhüña yaćhala.

38Ñatac taytachan Nisrocpa juntunacunan wasinćhu alawayaptinmi, chulin Adramelecwan Sarezer ispädawan wañüchin. Jinalculmi Ararat läduman ayiculcan. Juc chulin Esar-hadonñam mandacüca pudirnin yaycula.