Jueces 14 - Old Testament Quechua Wanca（QVW）

Sansonmi casaracun

1Chaypi Timnat malcacta Sanson liśhanćhümi Filisteo lädućhu śhunꞌunpä wamla caśhanta licämuña.

2Chaymi wasinta cutimul taytanta mamanta nin: “Timnat malcaćhümi Filisteo lädu wamla śhunꞌupänu caña. Ama chaynu caychu walmïpä yaycapacülläśhun” nil.

3Niptinmi taytancuna: “¿Imam pasäśhunqui mana siñalachicüśha-cama cä Filisteo lädupïlä wamlacta ashiyämunayquipä? ¿Manachun ayllunchicćhu, jinantin caśhtanchicćhüpis wamlacuna cayan imamá?” nin.

Niptinmi Sanson: “Ima nimaptiquipis chay wamlämi śhunꞌüpä; imanuypapis yaycapacüśhun” nicuyan.

4Ñatac chay timpu Filisteo läducunäpa maquinćhu Israel caśhtacunaca cayalcaptinmi Filisteo läducunäta imanuypapis camacaycüluyta Tayta Dios ashila. Chaynu Sanson cuscananpä Tayta Diospa munaynin caśhanta taytancuna manamá yaćhapäculachu.

5Chaynüpam Sanson taytanwan mamamwan Timnat malcäta lipäcula. Chay malcap übas lantancunaman ćhäläliptinmi malta liyun apalcaćhaśhtin paćhcalcamul chaläluyta munacuyan.

6Chayćhu Tayta Diospa Ispiritun juclla śhalcamulmi Sansonta pudiracuycula. Jinaptinmi mana imayu cayalpis, malta capishchactanu liyuntá sumä ticshiy pawälun. Chaynu lulaśhanta mamanta taytanta uchucllapis manam willalachu.

7Chaypïmi malcaman ćhaycul śhunꞌunpä caśhan wamlawan Sanson limala.

8Juc muyunćhuñam wamläta julamunanpä cutil chay liyun wañuchishancäta licaycamü Sanson yaycula. Chaymi liyuncäpa aychanćhu nisyu-nisyu urunwaycuna cayalcäña, jinaman mishquinpis junta cayäña.

9Chay mishquicta maquinwan jululculmi micuśhtin lila. Chaypi mamanta taytanta alcansalcul mishquicta uycula paycunapis micapäcunanpä. Ñatac liyun wañuchishancäpa aychanpi julamuśhantá manam willalachu.

10Chaypïtam Sansonpa papänincuna wamläpa wasinta lipäcula. Chayćhümi Sanson müsucunäpa custumrinmannu fistachaculcäla.

11Filisteo läducunaca Sansonta manchaculcalmi quimsa ćhunca (30) müsucuna paywan lipäcunanpä caćhaśha capäcula.

12Chay liwshï müsucunätam Sanson nin: “Canan ‘imallaśh aycallaśhta’ niycälishayqui. Anćhish muyun fista caśhancamam niycälimanquiman ima caśhantapis. Mayanpis niycamäcätá quimsa ćhunca (30) fïnu müdanactawan fistapä quimsa ćhunca (30) müdanactam uycuśhä.

13Ñatac ima caśhantapis mana tantiapäculꞌa amcunam yaꞌacta upämanqui jucnincä-cama quimsa ćhunca (30) fïnu müdanactawan fistapä quimsa ćhunca (30) müdanacunacta” nil.

Niptinmi paycuna: “Má, chay tapucuyniquita niycälimay uyaliycälinäpä” nin.

14Niptinmi Sanson:

“¿Imallaśh aycallaśh? Micucücäpi micuy yalamun;

callpasapäpi mishqui yalamun” nin.

Chayta müsucunäñatacmi quimsa muyuntapis manalä ima caśhantapis tantiapäcunchu.

15Tawa muyuncäćhüñam Sansonpa walminta müsucunaca nipäcun: “Wayapayquita tapuycuy, ¿imallaśh aycallaśhca? ima caśhantapis willaycälimänayquipä. Chaynüta mana lulaptiquiꞌa amtawan taytayquip lluy aylluntam cañaycälälishayqui. Casaracuyniquiman ayachipamälanqui imätapis calapatapämänayquipächun imatá” nil.

16Niptinmi wayapan Sansonman lilcul waꞌayninwancama tapula: “Cay malcäćhu müsucunäta ¿imallaśh aycallaśhta? niycuyalpis yaꞌactañatac ima caśhantapis mana willaycamanquichu. Am manaćh cuyamanquichu; ćhïnicamanquićh” nil. Niptinmi Sanson: “Mamätapis taytätapis mana willayalchun ¡amtalätac willayacman ampá!” nin.

17Niptinpis walminꞌa Sansonta waꞌapayan fista camacänancamam. Chaynu jicutayaptinmi anćhish muyun camacalpunancäćhuꞌa Sanson willala ima caśhantapis. Chaymi walminñatac müsucünäta willaycula.

18Müsucunäñatacmi anćhish muyun fista camacänancäćhu manaläpis inti jiꞌalpuptin Sansonta nipäcun:

“Urunwaypa mishquinpïtá imamá mas mishqui canman.

Liyunpa callpannuꞌa imamá mas callpasapannin canman” nil.

Niptinmi Sanson:

“Waquillänïwan mana äralꞌa tapuśhäca

ima caśhantapis manam yaćhapäcunquimanchu cala” nin.

19Chaypïta Tayta Diospa Ispiritun juclla śhalcamulmi Sansonta pudiracuycula. Jinaptinmi Ascalon malcäta lilcul chayćhu quimsa ćhunca (30) wayapacunacta wañulcachil müdananta lluśhtilcul imallaśh aycallaśhcäta asirtäcunäta uycula. Chaypïtam sumä piñäśha taytanpa wasinta cuticula.

20Wamläpa papäninñatacmi chay wamla chulinta Sansonpa fistanćhu cawshï jucnin müsuwan cuscächila.