2 Reyes 20 - Old Testament Quechua Wanca（QVW）

Mandacü Ezequiasmi ishyan 2Cro 32.24-26; Isa 38.1-8

1Chay muyuncunaćhümi mandacü Ezequias ishyälul pasaypiña cayäla. Chaymi Amozpa chulin willacü Isaias watucuycü lil nin: “Tayta Diosmi caynu nin: ‘Manañam allinyanquimanñachu; aylluyquicunacta incaracuyña, tistamintucuyña; wañucunquiñamá’ ” nil.

2Niptinmi Ezequias pila läduman muyuculcul Tayta Diosta mañacula.

3Llaqui-llaquicta waꞌaśhtinmari nin: “Tayta Diosllay, rasunniquimannu, munaśhayquimannu llapan śhunꞌüwan ñawpäniquićhu imaypis cawsaycuśhäta yalpalcullayꞌari” nil.

4Chaymi palasyup ćhawpi patyunman Isaias manaläpis yaluptin Tayta Dios nin:

5“Cutiycul malcäpa puydïnin Ezequiasta niycamuy: ‘Awquilluyqui Davidpa Tayta Diosninmi nin: Mañacuyniquita uyaliycümi, waꞌacuyniquita licaycümi. Allinyachiptïmi quimsa muyunpïta alawana wasïman linqui.

6Ćhunca pichayu (15) wata mastalämari cawsayta uycuśhayqui. Amtapis, cay malcätapis, Asiriap mandacüninpa maquinpïta libraycuśhayquimari. Cay Jerusalen malcactam quiquï-laycu, uywayní David-laycu libraycuśhä’ ” nil.

7Niptinmi Isaias ïgusta aꞌalcachil, Ezequiaspa dañädunman laꞌalun. Jinaptinmi allinyälun.

8Chaymi Isaiasta mandacü Ezequias nin: “Tayta Dios allinyächimaptin quimsa muyunpïta alawana wasiman linäpä ¿imanuypam tantiaśhä?” nil.

9Niptinmi Isaias: “Tayta Dios limalicuśhanca rasun caśhanta tantianayquipä caytam lulaycunꞌa. Má, ¿intip llantuynin ćhunca grädacta pasanantachun munanqui icha ćhunca gräda ipaman cutinantachun munanqui?” nil.

10Niptinmi Ezequias: “Intip llantuynin ćhunca grädacta pasaytá pasälunmanmi. Ñatac ćhunca grädacta ipamanꞌa manamá cutinmanchu” nin.

11Niptinmi willacü Isaias mañacula Tayta Dios intip llantuyninta cutichinanpä. Chaymi mandacü Acaz intiwan tantiaśhanmannu, Tayta Dios llantuycäta ćhunca grädacta ipaman cutïchila.

Babiloniapi ćhämücunätam mandacü Ezequias ćhasquin 2Cro 32.31; Isa 39.1-8

12Chay timpucunaćhümi Babilonia nasyunpa mandacü Merodac-baladan yaćhälun Ezequias ishyaśhanta. (Merodac-baladanꞌa Baladanpa chulinmari cala.) Chaymi cartactawan rigälucta apachila.

13Ezequiasñatacmi chay śhamücunäta allinpä ćhasquiycul lluy ima cänincunactapis licaycachila: illaynincunacta, üruncunacta, pirfümincunacta, fïnu asaytincunacta, ćhulalä armancunactapis, jinaman lluy-lluy cänincunactapis. Palasyunćhu lluy mandacuśhanćhu cänincunactamari mana pacaycullal manya-manyapi licaycachila.

14Chaypïtam Tayta Diospa willacünin Isaias, mandacü Ezequiasman aśhuycul nin: “¿Chay śhamü nunacunaca imactam munapäcuña? ¿Maypïmi śhapämuña?” nil. Niptinmi Ezequias: “Paycuna Babilonia calu-calu nasyunpïmi licäní śhapämuña” nin.

15Niptinmi Isaias: “¿Palasyuyquićhu, imacunactamá licapäcula?” nin.

Niptinmi: “Lluy-lluy cänïcunactamá licälälin. Mana licaycälishanꞌa manamá imallapis cayculachu” nin.

16Niptinmi Isaias nin: “Tayta Diospa nishanta canan uyaliy:

17‘Palasyuyquićhu lluy ima cäniquicunacta apacunan muyun jiꞌacaycayämunñamá. Awquilluyquicuna canancama lluy juntuśhancunäta Babiloniaman apaśhañamá canꞌa. Manamari imallapis quïdaycunꞌachu.

19Niptinmi Ezequias: “Tayta Dios nishanta willamäśhayquica allinmi. Cawsaśhäcama jawca, allinllari caycuchun” nin.

Ezequiasmi wañucun 2Cro 32.32-33

20Ñatac Ezequias mandacuyninćhu lluy lulaśhancuna, mana manchacuycul llallishancuna, chaynütac malcaman yacucta puśhamunanpä siquiactawan istanquicta lulaśhancunäpis, Juda lädu mandacünincunap isquirbishan librunćhümari cayan.

21Ezequias wañucuptinmi awquilluncuna caśhanman pampälälila. Chayurá paypa pudirnin chulin Manasesñamá mandacüca cala.