1 Cronicas 26 - Old Testament Quechua Wanca（QVW）

Puncu täpäcunäpa lulaynincuna

1Puncu täpäcunaca tücachinacuypa täpapäcunanpä caynu laquisham cala:

Corepa milayninpïtam Ebiasafpa chulin Meselemias.

2Meselemiaspa chulincunapïtañatacmi süta cala: wamä chulin Zacarias, jinaman Jediael, Zebadias, Jatniel,

3Elam, Johanan, Elioenaipis.

4Obed-edompa chulincunapïtañatacmi pusä cala: wamä chulin Semaias, jinaman Jozabad, Joa, Sacar, Natanael,

5Amiel, Isacar, Peultaipis. Chayurá Tayta Diosmari allinpä licaycul Obed-edomta achca chulicunacta uycula.

6Obed-edompa chulin Semaiaspïtañatacmi chulincuna, alli-cama capäcul aylluncunaćhu puydï capäcula.

7Semaiaspa chulincunapïtañatacmi cala: Otni, Rafael, Obed, Elzabad, Samaquias, jinaman alli-cama wawꞌi-caśhan Eliupis.

8Lluy paycunamari Obed-edompa milaynincuna. Chulincunawan wawꞌi-caśhancuna süta ćhunca ishcayniyümá (62) capäcula. Paycuna callpasapa-cama, alli-cama sirbïcunamá capäcula.

9Meselemiaspa alli-cama chulincunawan wawꞌi-caśhancunañatacmi ćhunca pusäniyu (18) capäcula.

10Merarip milaynin Hosap chulincunapïñatacmi cala: Simri (pay masqui wamä chuli mana cayaptinpis papäninmi puydïpä ćhulaycula),

11Hilcias, Tebalias, Zacariaspis. Chayurá Hosap lluy chulincunawan wawꞌi-caśhancuna ćhunca quimsayümari (13) capäcula.

12Paycunamari puydïnincunawan wawꞌi-caśhancunawan puncucta täpapäcula tücachinacuypa, Tayta Diospa alawana wasinćhüpis sirbishtin.

13Chüsaypam ayllunpa-cama tücachila mayurtapis śhullcactapis, puncucunacta täpapäcunanpä.

14Chaynu chüsaptinmi inti ishpimunan lädu puncuca Selemiasman tücala. Nurti lädumanñatacmi Selemiaspa allin yaćhaywan caminaycü chulin Zacariasta tücala.

15Sur lädu puncumanñatacmi Obed-edomman tücala. Chulincunamanñatacmi alawana wasićhu pilwanapä cäcunäta täpapäcunanpä tücala.

16Inti jiꞌalpunan lädućhu cä Salequet puncuñatacmi Shupimman, jinaman Hosaman tücala. Chay puncu cayan wićhanapä caminućhümari.

Caynümi tücachinaculcäla:

17Inti ishpimunan lädućhümi levitacuna muyun-muyun süta täpapäcula: norte lädućhüñatac tawa, sur lädućhüpis tawa, ćhulanapä cuartucunätañatacmi ishcay-cama,

18inti jiꞌalpunan lädu puncup pampantañatacmi tawa, lulićhu cä patyuctañatacmi ishcay täpapäcula.

19Chaynümari chay puncucunacta täpapäcunanpä Corepa, Merarip milaynincuna tücachisha capäcula.

20Waquin levitacunañatacmi alawana wasićhu cänincunacta, Tayta Diospä japächaśhancunäta täpapäcunanpä ćhulaśha capäcula.

21Gersonpa chulin Laadan ayllućhümi, jucnin puydïnin Jehiel cala.

22Jehielpa, Zetampa, jinaman wawꞌi-caśhan Joelpa chulincunañatacmi Tayta Diospa alawana wasinpa sumä ćhaniyünincunacta täpapäcunanpä ćhulaśha capäcula.

23Caycunamari Amram, Izhar, Hebron, Uzielpa milaynincunapïta cä puydïcunaca:

24Gersonpa chulin Sebuelmi illay juntücunäpa puydïnin cala. Gersonꞌa Moisespa chulinmari cala.

25Gersonpa wawꞌi-caśhan Eliezerpa milaynincunañatacmi: Rehabias, Jesaias, Joram, Zicri, Selomitpis.

26Selomitwan lluy wawꞌi-caśhancunañatacmi Tayta Diosllapä japächapäcuśhan cäcunäta täpapäcula. Chaycunactam mandacü David, ayllucunap puydïnincuna, walanga (1,000) pilyäcunap paćhac (100) pilyäcunap puydïnincuna, jinaman juc puydïcunapis uycapäcü cala.

27Chay pilyucunapi apapämuśhancunapïmari japächapäcula, Tayta Diospa alawana wasinta allichachipäcunanpä.

28Chaynütacmi willacü Samuel, Cispa chulin Saul, Nerpa chulin Abner, Sarviap chulin Joab japächaycapäcuśhancunactapis Selomitwan wawꞌi-caśhancuna täpapäcula.

Izhar ayllupïta caminaycücuna

29Izhar ayllup milaynin Quenaniaswan chulincunañatacmi israelcunäpa puydï caminaycünincuna, licaycünincuna capäcula. Paycuna manamá alawana wasićhuꞌa lulaycapäculachu.

Hebronpa milaynincunapi mandäcuna

30Hebronpa milayninpïñatacmi Hasabiaswan wawꞌi-caśhancuna capäcula walanga anćhish paćhacniyu (1,700) alli-cama nunacuna. Paycunam Jordan mayup chimpan inti jiꞌalpunan lädućhu cä israelcunäta sirbipäcula, jinaman Tayta Diosta sirbiyćhüpis, mandacüca nishancunactapis licaycapäcü cala.

31Chaymi tawa ćhunca (40) wata David mandacuyaptin, Hebronpa milaynincuna isquirbisha caśhanćhu ayllun-ayllun sumäta licaycul, talïla Galaad lädu Jazer malcaćhu sumä alli-cama umricuna capäcuśhanta. Hebronpa milaynincunap puydïnin Jeriasmi cala.

32Chaynu ayllunćhu-cama alli-cama capäcula ishcay walanga anćhish paćhacniyu (2,700) nunacunam. Chay Ruben, Gad, ćhawpi ayllu Manasesta licaycapäcunanpämari mandacü David paycunacta ćhulaycapäcula. Chaymari paycuna Tayta Diospa nishancunacta, mandacücäpa nishancunactapis licaycapäcunan cala.