1Tayta Dios maynu sumä caśhantamá altu sïluca willaycamanchic.
Sïlüćhu lluy cäcunämá maquinwan
lulaycuśhä caśhanta tantiaycachimanchic.
2Paypïtamá muyunca muyun-pula willaycanacun.
Tutäpis tuta-pula yaćhachinacun.
3Masqui chaycunap limayninta,
shiminta mana uyaliyaptinchicpis,
4jinantin pachämanmá ćhaycun.
Limaynin cay allpap manyancamatacmá ćhaycun.
Altu sïlüćhümá wasicta intïpa lulaycula.
5Chaypïmi intica chayllalä casaracüśha müsunu yalamun.
Cürri nunanülämá cushicun.
6Intica sïlüpa jucnin manyanpïmá yalamun.
Jucnin manyanmanñatacmi ćhaycun.
Acachayninꞌa mayanmanpis ćhaycunmá.
7 Tayta Diospa yaćhachicuynin sumä
tincüllanman allinmi: allin cawsaytam uycamanchic.
Tayta Diospa nimäśhanchic maynu sumä chalapacunam:
allin śhunꞌuyücunätamá yaćhayta uycamanchic.
8 Tayta Diospa camachicuynin imam cällanman allinmi:
cushicuytam śhunꞌunchicman ćhulaycamun.
Tayta Diospa limaynincuna chuyam:
ñawinchicman acchictam ćhulaycamun.
9 Tayta Diosta manchacuywan licaycuy chuyam:
wiña-wiñaypämá tacyaycun.
Tayta Diospa cäraycuynin rasuncällam:
lluy-lluypis tincüllanmanmá.
10Ürupïtapis mas ćhaniyümi.
Sumänin ürunllanllanpïpis mas-masninlämi.
Mishquipïtapis mas mishquinninlämi.
Urunwaypa panalninpi śhutumü mishquipïpis masninlämá.
11Yaćhachicuyniqui cay nunallayquitapis anyapaycamanmá.
Cäsucücämá jatun primyucta ćhasquiycälishä.
12¿Mayantá mana allinnincunapi tantiacuycunman?
Mana tantiacuśhá juchäcunactari pampachaycallämay.
13Allinta yaćhayal mana allin lulanäpïpis
cay nunallayquita libraycallämay.
Maquinćhu amari uywaycallämächunchu.
Chayćha ima niycamänanpis nï caycunꞌachu,
nï cuntrayquipis millachicuyta lulalläśhächu.
14Wancanu cä pacaycamäní, libraycamäní
Tayta Diosllay, shimïpi limaynïcunawan,
śhunꞌüpi yalamü tantiaynïcuna
śhunꞌuyquipänu ćhasquiycuśhä caycullächun.
Who We AreWhat We EelieveWhat We Do
2025 by iamachristian.org,Inc All rights reserved.
