Josue 12 - Old Testament Quechua Wanca（QVW）

Mandacücunäta Moises llallishantam yalpachin

1Má, inti ishpimunan lädu Jordan mayup chimpanćhu yaćhä mandacücunäpa allpancunactam Israel läducunaca llallilcul duyñuchacaycälila. Chay Arnon mayupïta aśhta Hermon ulücamam cala; chaynütac inti yalamunan lädu Jordan mayup pampancunaćhüpis aśhta Arabacamam cala. Chay mandacücunämi caycuna:

2Hesbon malcaćhu yaćhä Amhor läducunap mandacüninmi Sehon; paypa maquinćhümi cala Amon läducunäpa culindanpa Arnon mayu patanćhu cä Aroer malcapïta aśhta Amon läducunäpa culindanćhu cä Jaboc mayucama.

3Chaynütacmi paypa maquinćhu cala, inti ishpimunan lädu Jordan pampapis Cineret ućhapïta aśhta Puchucü Lamarcäcama; sur lädumanñatac Bet-jesimot lädupïta allaycul Pisga ulꞌup wätancama cala.

4Chaynütacmi llallila Basanpa mandacünin Ogtapis. Payllañamari Refai lädu ayllucunapïta, Astarotćhu, Edreićhu yaćhala.

5Paypa maquinćhümi cala Salca malcapïta, Hermon ulꞌupïta, jinaman Basan lädupïta aśhta Gesurcama, Maacap culindancama, jinaman Galaadpa ćhawpinpïta aśhta Hesbon malcap mandacünin Sehonpa allpancama.

6Cay mandacücunätam Tayta Diospa uywaynin Moiseswan lluy israelcunaca llallïlälila. Chay lädu allpacunätam Moises tücachila Ruben, Gad, chaynütac Manases ćhawpi ayllucunäman.Juc mandacücunätam Josue llallin

7Canan má, inti ishpimunan lädu Jordan mayup chimpanćhu Josuewan israelcunaca achca mandacücunactam llallipäcula. Paycunap maquinćhu cala Libanop pampanćhu Baal-gaadpïta aśhta Seir läduman ishpï Halac ulꞌucama. Chay mandacücunäpa allpacunactam israelcunäman ayllunpa-cama Josue tücachila.

8Chaynu tücachila: ulꞌucunäćhu, pampacunäćhu, Arabacunäćhu, wätacunäćhu, chunyäcunäćhu, Neguevćhüpis cäcunätam. Cay allpacunam Het, Amhor, Canaan, Ferez, Hev, Jebus läducunäpa cala.

9Chay llallishan mandacücunaca caycunam: Jericopa mandacünin, Bet-elpa sircanćhu cä Hai malcap mandacünin,

10Jerusalenpa mandacünin, Hebronpa mandacünin,

11Jarmutpa mandacünin, Laquispa mandacünin,

12Eglonpa mandacünin, Gezerpa mandacünin,

13Debirpa mandacünin, Gederpa mandacünin,

14Hormap mandacünin, Aradpa mandacünin,

15Libnap mandacünin, Adulampa mandacünin,

16Macedap mandacünin, Bet-elpa mandacünin,

17Tapuapa mandacünin, Heferpa mandacünin,

18Afecpa mandacünin, Saronpa mandacünin,

19Madonpa mandacünin, Hazorpa mandacünin,

20Simron-meronpa mandacünin, Acsafpa mandacünin,

21Taanacpa mandacünin, Meguidopa mandacünin,

22Cedespa mandacünin, Carmeloćhu cä Jocneampa mandacünin,

23Dorćhu cä Dorpa mandacünin, Gilgal lädućhu cä Goimpa mandacünin,

24chaynütac Tirsapa mandacüninpis. Lluy capäcula quimsa ćhunca jucniyu (31) mandacücunamari.