Jeremias 5 - Old Testament Quechua Wanca（QVW）

Jerusalenpawan Juda lädup mana allin lulaśhancuna

1Tayta Diosmi nin:

“Jerusalenpa cällincunaćhuꞌari pulipämuy.

Jinantin läsacunäćhüpis sumätari ashipämuy.

Ichaläpis jucllay nunallactasi tincüllanman licaycüta,

rasuncäta ashiycüta taliycälinquiman.

Talïluptiquiꞌa Jerusalenta pampachaycuśhämá.

2Paycunamari ‘Cawsä Tayta Dios-laycum limalicú’

niyalcalpis janä śhunꞌullanwan nipäcun” nil.

3 Tayta Diosllay, ¿manachun rasuncäćhu cä allin nunacta ashiyanqui imamá?

Nunayquicunacta asutïluptiquipis

nanayta manamá sintinchu.

Camacaycüluptiquipis ćhasquicuyta manamá munanchu.

Aśhwanpamá lumipïtapis mastalä śhunꞌunta lumiyächin.

Wanaculcayta manamari munapäcunchu.

4Chaymi śhunꞌüćhu niculá:

“Caycuna pasaypi waccha luclucunallamá.

Tayta Diospa yaćhachicuyninta,

tincüninman licaycuyninta manamari lisipäcunchu.

5Aśhwanpa puydï nunacunämanñari lishä;

paycunam ichá Tayta Diospa yaćhachicuyninta,

tincüninman licaycuyninta lisipäcun” nil.

Ñatac chay puydïcunäpis Tayta Diospa yügunta paquïläliñämá;

lätiguntapis laćhüläliñämá.

6Chaynu captinmari muntićhu cä liyunca wañülächinꞌa;

chunyäcäćhu atücämi ticshiypa pawälunꞌa;

ucumälicunämá malcancunacta camacaycülunꞌa.

Malcapïta yalücunacá camacaycüśhamá capäcunꞌa.

Mana allin lulaynincuna achca-achcamanñamari milälälin;

ipanchaśhancunaca sumä-sumäñamá cacuyan.

7Tayta Diosmi nin:

“Caycunapïta ¿imanuypamá pampachaycucman?

Chuliquicunam jitäläliman;

taytachacunamanmá limalicalcälinpis.

Imallacta mana pishiycayächiptïpis paycuna mansibacälälinmá;

juntunacuycul-juntunacuyculmá waticacunäman pasaculcan.

8Jichur cawallunümá nuna-masinpa

walmincunapïta lücupacuyalcan.

9Chaychun ¿mana lawćhaycümanchu imatá?

Chaynu lulä malcacta, ¿manachun cutichicülüman imatá?

Yaꞌa Tayta Diosmari niyá.

10“Üba lantancunaman yaycuycul camacaycüluy,

ñatac waquinnintá cawsayniyüta caćhaycüluy.

Üba lantacunap pallaynincunacta paquiypa pawäluy;

chay nunacunaca manamá yaꞌapachu.

11Israelcunaca, Juda läducunaca ipanchälälimanmá.

Yaꞌa Tayta Diosmari niyá” nil.

12Paycuna Tayta Diosta ipanchalcul nipäcunlämi:

“Pay manamá Dioschu.

Manamá imapis pasamäśhunchu;

manamá gïrrapis nï micuy wanaypis canꞌachu.

13Chay willacücuna waywanu mana cällamari cayalcan.

Paycunacta Tayta Dioschu manamá nila.

Chay willacuśhancunaca quiquincunactamá pasälunꞌa” nil.

14Chaymi sumä munayniyu Tayta Dios nin:

“Chaynu malcá limaśhanpïtamá,

willacuynïta nina walayätanu ampa shimiquiman ćhulaycuśhä.

Chay malcätamari yamtactanu juntüśha,

ćhulaycuśhä lupäśha cananpä.

15Israel malca, calupïtalämá cuntrayqui malcacta puśhamuśhä;

chay malca una-unaypïta sumä-camamá.

Limayninpis mana yaćhaśhayquimá.

Chaymi ima nishantapis mana tantiapäcunquichu.

Yaꞌa Tayta Diosmari niyá.

16Paycuna gïrrapä sumä-camamá cayalcan;

flïchancunapis wañuchinanpä-camamá cayalcan.

17Paycuna cusichayquicunacta camacälälinꞌamá;

micuyniquicunacta micälälinꞌamá;

uwishniquicunacta, wäcayquicunacta,

üba, ïgus lantayquicunactapis micacälälinꞌamá.

Walaśh wamla chuliquicunactapis camacaycülunꞌamá.

Chalapacuśhayqui sumä malcayquitapis ispädawanmá

mana cäman muyülächinꞌa” nil.

18 Tayta Diosmi niman: “Ñatac chay muyun manamari lluy-lluytachu camacaycüśhä.

19Chay quïdäcunämi tapupäcuśhunqui: ‘¿Imapïmá Tayta Diosninchic caytanu lulämanchic?’ nil. Nishuptiqui amñatacmi ninqui: ‘Amcuna Tayta Diosta ipanchayculmi quiquiquip malcayquićhu taytachacunacta sirbipäculanqui. Chaymi canan, mana lisishayqui nunacunacta juc lädu nasyunćhüña sirbipäcunqui’ ” nil.

Juda läductam anyapan

20Tayta Diosmi nin:

“Jacobpa milaynincunaman willacamuy; Juda läducunäman niycamuy:

21‘Ñawiqui cayaptinpis mana licäcuna, linliqui cayaptinpis mana uyalïcuna,

mana tantiayniyu luclu nunacuna uyalipämayꞌari.

22Yaꞌa Tayta Diosmari niyá.

¿Manachun yaꞌacta manchacalcämanqui imamá?

¿Manachun ñawpänïćhu manchacuyniquipis can imamá?

Yaꞌamari lamarcäpa ćhululninpä aꞌucunäta ćhulälá;

lamarca imanaculpis chayninpa mana pasamunanpämari.

Masqui lamar yacuca maynu-maynu

mächicacamulpis pasamuyta manamari atipamunꞌachu.

23“ ‘Chaynu cayaptinpis cay malcá

lumi śhunꞌu, cullu linli-camamá;

caćhaycamalmá liculcan.

24Paycuna manamari nipäcunchu:

“Tayta Diosninchicta manchacuywan licaycuśhun.

Paymá punta ütac ipa tamyacunactapis timpullanćhu uycamanchic;

cusicha timpuctapis paymá uycamanchic” nil.

25Aśhwanpam chay quiquiquicunap juchayquicunapïta

chay allincunäta manaña ćhasquipäcunquiñachu.

Ima allincunacta ćhasquinayquipä cäcunätapis manañamá talipäcunquiñachu.

26“ ‘Cay malcäćhu mana allin nunacunamá cayalcan;

ulpaycunacta chapatänanpä awaytäcänümá

nuna-masinta palpachinanpä trampacunacta ćhulayalcan.

27Jawlaćhu pälï pishucuna junta-junta caśhancänümá,

lluy waycacuśhancunawan junta-junta wasin cayan.

Chaynüpamari sumä munayniyüman alli cäniyüman licalïlälila.

28Sumä llampuy-llampuymá wirayälälinpis.

Mana allin lulaynincuna sumä-sumäñamá timpuyan.

Mana cäniyücunäta

manamá tincüllanman mayanpis licaycälinchu.

Wacchacunäta manamá cällanmanchu yanapaycälin.

29“ ‘Chaychun ¿mana lawćhaycümanchu imamá?

Chaychun chaynu lulä malcacta

¿mana cutichicülümanchu imatá?

Yaꞌa Tayta Diosmari niyá.

30Cay nasyunćhu sumä manchachicuywan äśhalayllaman camanacuna pasanamari cacuyan.

31Willacücunaca casquicunactamá willaculcan;

sasirdüticunaca munaśhanmannümá sirbipäcun.

Chaynu canantamari malcá munapäcun.

Ñatac cananꞌa amcuna ¿imanapäcunquimá?