Oseas 7 - Old Testament Quechua Wanca（QVW）

1“Cuyaśhá nunäcunacta allinman muyuycachiptí,

Israelta yaꞌa allinyaycachiptí,

Efrainpa mana allin lulaynin,

Samariap juchancunam camalacamunꞌa.

Paycuna casquiculcanmá.

Suwaculcänanpämi wasicunaman yaycapäcun.

Cällicunäćhümi nunacunäta waycapäcun.

2Lluy-lluy juchancunacta

yaꞌa yalpalcuśhäta manamá tantiapäcunchu.

Mana allin lulaynincunamá cunćhalayan.

Lluy juchancunactamari tuquicta licayá.

3“Mana allincunacta lulayninwanmá mandacücäta cushichipäcun.

Casquicuycunacta limalmi puydïnincunacta cushichipäcun.

4Paycuna mansibaculcänanpä listumá cayalcan.

Tanta luläcäpa jurnunnümá walayalcan.

Tanta luläca arinacta punquishancama,

jurnup sumä-sumä caldayninnümá cayalcan.

5“Mandacücäpa fistachacuyninćhu

puydïcunaca sumä shincanancamamá upyälälichin.

Chaymi mandacüca jalutacü nunacunätalä fistanman ayaycülun.

6Paycunañatacmi ipanchayninwan aśhuycapäcun

walayä jurnu śhunꞌunwannu.

Tutay walächimá mana manalcul śhanśhanu mismiyalcan.

Chaymi ayllïluptin nina

sumä-sumä walayäcänu wälälälin.

7Sumä caldayä jurnunümá

puydïnincunacta lluy camacaycälälin.

Lluy mandacünincunamari palpälälin.

Ñatac yanapaycunäpä manamá mayanllapis yaꞌacta ayacalcämanchu.

8“Juc nasyuncunäwanmi Efrain jucllachacülun.

Efrain nunacunaca, juc lädullanpa cusäśha tantanümari cayan.

9Mana Israel caśhtacunämá paycunap callpanta camacaycülun.

Paycunañatacmi nï tantiaculcanchu.

Paycuna suꞌu umamanña muyülälishantapis

manamari tantiaculcanchu.

10“Israelpa nunatucuyninmari cuntran cayan.

Ñatac yaꞌa Tayta Diosninmanꞌa manamá cuticalcämunchu;

chaynu pasayalcalpis manatacmi ashiycälimanpischu.

11Uman muyüśha pantäśha ulpaynümá Efrain cayan.

Chaymi yanapänanpä Egipto läducta mañacun;

abisnintá Asiria lädumanmi laꞌacacun.

12Chay läduman liyalcaptinmá

paycunap jananman trampacta maśhtaycüśhä.

Pälicaćhä pishucunätanümá palpächishä.

Juntunacuynincunaćhu willacuśhanmannümá

mana allin lulaynincunapïta mućhuycachishä.

13“Imanuylä capäcunꞌa, yaꞌapi japächacücunaca.

Yaꞌap cuntrá śhalcücunaca camacaycüśhamá capäcunꞌa.

Libraycuyta munaptïpis

paycuna articunallactamá cuntrá nipäcun.

14Llapan śhunꞌunwanchu yaꞌacta manamá ayacalcäman,

sinuꞌa puñunanćhu jitalällalmá ayaycaćhapämun.

Trïgucta, bïnucta mañaculcalmi aychancunactapis cuchuculcan.

Chaynu lulayninwanmari cuntrá cayalcan.

15Paycunacta yaꞌami yaćhaycachilá, callpacta uyculá.

Jinaycuptïpis paycuná yaꞌap cunträmi imactañapis umachanaculcan.

16Manamari yaꞌamanchu cutipämun.

Wiscu flïcha ćhächicu-yupaymari juc läduman liculcan;

nunatucüśha limaśhanpïmá puydïnincunapis

ispädawan camacaycüśha capäcunꞌa.

Egipto nasyunćhümari paycuna jalutacüśha capäcunꞌa.