1 Reyes 14 - Old Testament Quechua Wanca（QVW）

Jeroboam mana allinćhu camacänanpämi Ahias willaycun

1Chay timpum Jeroboampa chulin Abias ishyätucülun.

2Chaymi walminta Jeroboam nin: “Yaꞌa Jeroboampa walmí caśhayquita mayanpis mana tantiananpä juc müdanawan müdacämuy. Jinalcul Silo malcacta liy. Chayćhümi cay malcap mandacünin canäpä nimä willacü Ahias nishan cayan.

3Chaymanmi ćhunca tantacta, panquïquicunacta, järra mishquicta apaculcul linqui. Paymi chulinchicwan ima pasanantapis niycuśhunqui” nil.

4Nishantanüllam Jeroboampa walmin lulaycula. Allichaculcul Silo malcacta lilmi Ahiaspa wasinman ćhälun. Ahias yaśhaña captinmi ñawin manaña ancha ćhächilachu.

5Ñatac Tayta Dios Ahiasta nilañam: “Jeroboampa walminmi jucpa pasachiculcul śhamunꞌa ishya chulinpi tapucuśhunayquipä. Paytam nishätanülla niycunqui” nil.

6Chay puncup walmica yaycamuśhanta uyalïlulmi Ahias nin: “Jeroboampa walmin pasaycamuy. ¿Imapïmi jucpa pasachicunqui? Ampämi llaqui willacuyta willaycunacpä ćhasquiyculá.

7Chaymi Jeroboamman cutilcul Israelpa Tayta Diosnin caynu nishanta willaycamunqui: ‘Yaꞌam jinantin nunäcunapi japächaycul Israel malcäpa puydïninpä ćhulayculac.

8David ayllucta mandacü cayninpi yaꞌami jululcul anman uyculac. Caynu ćhulaycuptïpis uywayní Davidnüchu manamá camachicuynïta cäsuculanqui. Payꞌa llapan śhunꞌunwanmi lluy munaśhäta lulaycula.

9Amñatacmi juc taytachacunacta jïrrucunapi lulaśhayquiwan punta pasäcunäpïpis mas mana allintalä lulälanqui. Chaynu ipanchamäśhayquiwanmi piñachimanqui.

10Chaymi Jeroboam aylluman mana allincunacta ćhächimuśhä. Jinantin israelćhu lluy walaśh milayniquicunamari wañupäcunꞌa, masqui uyway ütac mana uyway calpis. Manamá jucllapis puchuycunꞌachu.1Rey 15.29. Jeroboampa milaynincunacta wanucta pichaśhanchiccänümi chincächishä.

11Malcaćhu wañü milayniquicunacta allꞌucunallam micapäcunꞌa. Ćhaclaćhu wañücunätañatacmi pälï wisculcunalla micapäcunꞌa. Chaynu cananpä yaꞌa Tayta Diosmari camachí’ nin.

12“Canan amñatac walmi, wasiquita cuticuy. Malcacta ćhäluptiquim wawiqui wañucunꞌa.

13Jinaptinmi jinantin Israel sumä llaquicuywan pampapäcunꞌa. Chay ayllućhu payllam Israelpa Tayta Diosninpa munayninmannu cawsaycüca cala. Chaymi Jeroboampa milayninpi paylla pampaśha canꞌa.

14Chaypïta israelman juc mandacütam Tayta Dios ćhulaycunꞌa. Paymi Jeroboampa milaynincunacta chaypunpïta lluy camacaycülunꞌa.

15Yacuca śhuꞌuśhcunäta apaśhannümari israelcunäta Tayta Dios camacaycülunꞌa. Mamacha Aserap uchuchachä liträtuchallanta lulapäcuśhayquiwanmá Tayta Diosta sumä piñachipäcunqui. Chaymi awquilluyquicunaman uśhan allin allpapïta alapaculcul Eufrates mayup wic lädunman wicapälunꞌa.

16Jeroboam quiquinpis malcantapis mana allinta lulachishanpïtamá Israelta Tayta Dios caćhaycülunꞌa” nil.

17Niptinmi Jeroboampa walmin śhalcuculcul Tirsa malcaman cuticula. Chay wasinpa puncunman yaycuycuyaptinmari wawin wañucula.

18Chaymi Tayta Dios willacünin Ahiaswan willacachimuśhannu jinantin Israel waꞌacuśhtin pampapäcula.

19Ñatac Jeroboam mandacuyninćhu lluy lulaśhancuna, gïrracunaćhu llallishancunapis israelcunäpa mandacünincunap isquirbisha librunćhümi cayan.

20Ishcay ćhunca ishcayniyu (22) watam Jeroboam mandacü cala. Wañucuptinñatacmi chulin Nadab mandacü yaycula.

Juda lädućhümi Roboam mandacun 2Cro 12.1-16

21Salomonpa chulin Roboammi Juda lädućhu mandacü cala. Tawa ćhunca jucniyu (41) watanta liyalmi Jerusalenćhu mandacuyta allaycula. Jerusalenćhu ćhunca anćhishniyu (17) watamari mandacula. Chay malcactam jinantin Israel ayllucunäpi Tayta Dios aclaycula chayćhu alawaśha cananpä. Roboampa mamanñatacmi Amon lädu Naama cala.

22Juda lädup lulaynincunam Tayta Diospa ñawquin mana allinchu cala. Chaynu awquilluncunapïpis mas-mas mana allinllacta lulaśhanwanmi Tayta Diosta piñachila.

23Ulꞌup altunnincunaćhümari uycunacunacta śhalcachipäcula; mamacha Aserap liträtuncunactapis lumipïta, cullupïta lulalculmi śhalcachipäcula, sumä pallaysapa jatun jaćhacunap siquincunaćhüpis śhalcachipäculamari.2Rey 17.9-10.

24Chaynütacmi malcaca taytachanta alawapäcul waticaculcäla.Deut 23.17. Chay malcapi Tayta Dios alapacuśhan nunacunaca millachicuy imaymana anla lulaycunacta lulapäcuśhannümi israelcunaca lulapäcula.

25Roboam picha wata mandacuyaptinmi Egiptop mandacünin Sisac camacaycünanpä Jerusalenman yaycüla.2Cro 12.2-8.

26Jinalmi Tayta Diospa alawana wasinpïtawan palasyupïta lluy cänincunacta pudiracuycun. Chaynütacmi Salomon ürupi lulachishan atajachicuncunactapis apacun.1Rey 10.16-17; 2Cro 9.15-16.

27Chay atajachicucunap pudirnintam brunsipïta mandacü Roboam lulachila. Jinalculmi palasyup puncunta täpäcunäpa puydïnincunaman uycula, licapäcunanpä.

28Chaymi Tayta Diospa alawana wasinman mandacüca liptin täpäcunaca atajachicuncuna apacälälisha liwshipäcula. Chaypïtá ćhulalänan wasimanmi caśhan cutiycachipäcü cala.

29Ñatac Roboam mandacuyninćhu lluy lulaśhancuna Juda lädu mandacünincunap isquirbisha librunćhümi cayan.

30Roboam mandacuyninćhu Jeroboamwanmi pilyayllaćhu capäcula.

31Amon lädu Naamap wawin Roboam wañucuptinmi awquilluncuna pampaläśhan Davidpa Malcan nishanman pampälälila. Roboampa pudirnin chulin Abiamñam mandacüca cala.