1“Cananñatacmi cay ipa wiñaycunaca yaꞌacta asipäcalcäman.
Chaycunap taytancunacta uwish michï allꞌücunawan cusca
pulinallanpäpis manamari ćhulaycümanchu cala.
2¿Imapätá yaꞌapä bälila
callpanpis mana cayaptinꞌa?
3Micuy wanaywan, waccha cayninwanmari pasa-pasaypi capäcula;
chaqui cala ulꞌucunällaćhümi allpacunällacta aśhpipäcula.
4Jaćha-jaćhacunäćhümá ulacunallacta pallapäcula;
ritamap sapincunallactamá micapäcula.
5Paycuna malcanpïtapis alapacüśhamá capäcula;
suwactanümá apalcaćhaśhtin aticaćhapäcula.
6Yaćhapäculapis wayucunap ućhcuncunallaćhu,
maćhaycunallaćhu, aꞌacunällaćhümari.
7Jaćha-jaćhacunällaćhümá apalcaćhaśhtin pulipäcula;
caśha-caśhacunällaćhümá juntunaculcälapis.
8Licaytapis mana munaśha pasaypi
luclucuna captinmá malcapïtapis alapacälälisha capäcula.
9“¿Chaynücunap chulinchun canan asipayalcämanman imatá?
Cananꞌa burlaculcänallanmá cacuyá.
10Millachicuyta ćhapapämalmi yaꞌapïta ayipäcun;
cäräman tuwaycamänallanpämá muyulcapämun.
11Quiquin Tayta Dios pasaypi uyshulächimaptinmari,
manaña jamaycul burlacalcäman.
12¿Chay nunälächun mayninpañapis yaꞌaman juntanacälälimun imatá?
Ćhaquí palpunanpämá trampacunacta ćhulälälimun,
camacaycämänanpämá pulishäcunaman trampacunacta ćhulapäcun.
13Pulishäcunäćhümi atajacaycäliman;
mayanpis mana yanapaycamäní captinmi lluy camacaycäläliman.
14Pilap aśhanpanu yaycaycamulmá,
wicpa-caypa janänïman jiꞌacaycälimun.
15Manchacuypïtam chucchucuyällá,
allinpä licaycuśha caynïpis waywanüllamá licun,
allin cäniyu caynïpis pucutaynümá chincacun.
16“Cananꞌa cawsayní licuyanñamá;
llaquicuycällañamá ñitilayäman.
17Tutanpa nanayca tullücamañamá yaycuyan;
mana jamayculñamá nanayca camacayäman.
18Quiquin Tayta Diosmá sumä callpawan müdanäpi chalacäman;
jamalcunäpäpis manamá caćhaycamanchu.
19Ñïcämanmi wicapaycäman;
ućhpanu, pulbunümá cayällá.
20“Tayta Diosllay, mañacamuptïpis manamá uyaliycamanquichu;
ñawpäniquiman aśhuycamuptïpis manamá licätucamanquichu.
21Pasaypi mana llaquipayniyüñamá yaꞌapä licalïlunqui;
sumä munayniquiwanmi ñacachimanqui.
22Sumä-sumä waywa tapsiycänümá,
waywäman ćhulculcul apächimanqui.
23Tuquictamá yaćhayá silpultüräman puśhamänayquita,
lluy cawsäcuna ćhänan sityuman ćhächimänayquita.
24“Ñatac ¿manachun mana cäniyücunäta yanapanchic imamá?
¿Manachun waccha cayninpi salbaycunchic imatá?
25¿Manachun ñacäcunäwan cusca waꞌanchic imamá?
¿Manachun pishipacücunäwanpis llaquicunchic imatá?
26Chaynu cayaptinchun allincäta yaꞌa alcaycuyaptí, mana allincälla ćhäcayämanman.
Chaychun acchïta alcaycuyaptí, tutawyaycälla ćhäcayämanman.
27Śhunꞌullá mana jamayculñamari ticticyayan;
ñacay muyuncunallañamari alcayäman.
28Janäpapis lulïpapis yanayalpuyälläñamá;
llaquicuywan ñitïsha, tutawyayäcäćhünümari cayällá.
Chaymari juntunacuycunäćhüpis yanapaycamänanpä mañacullá.
29Chaynu cayaptïpis atücunap wawꞌi-caśhantanüñamá licapäman;
tucucunap apanacuśhantanüñamá licapäman.
30Aychäcunapis yanayalculñamá lluchuyällan;
tullücunapis lupaypañam lupayällan.
31Arpäpis aya taquillactañamá waꞌayällan;
quïnäpis aya taquillactañamá suynayällan.
Who We AreWhat We EelieveWhat We Do
2025 by iamachristian.org,Inc All rights reserved.
