1 Samuel 8 - Old Testament Quechua Wanca（QVW）

Israel caśhtacunämi mandacüta mañapäcun

1Samuel yaśhaña cayal chulincunactam Israel caśhtacunäpa caminaycüninpä ćhulaycula.

2Wamä chulinpam Joel śhutin cala, atimünincäpañatacmi Abias. Ishcayninmi Beerseba malcaćhu caminaycü capäcula.

3Ñatac ishcaynin chulinpis taytannuꞌa manam cawsapäculachu. Aśhwanpam quiquillanpä imallapïpis wañuyäcama capäcul, juchacta luläcunaca pacallap pägaptinpis ćhasquipäcula, ima sasachacuytapis mana tincüninman allichapäcü capäcula.

4Chaymi Israel caśhtacunap yaśhancuna juntunacuycul Rama malcaman lipäcula, Samuelwan limä.

5Chayćhümi Samuelta nipäcun: “Am yaśhayälunquiñam; chuliquicuna manam quiquiquinüñachu lulapäcun. Chaymi caminaycälimänanpä cäraycälimänanpäpis juc malcacunap mandacünintanüña yaꞌacunap mandacünïtapis ćhulanayquita munapäcú” nil.

6Chaynu “mandacüta ćhulaycälipamay cäraycälimänanpä” nishanmi Samuelpa śhunꞌunpänu mana captin Tayta Diosta mañacula.

7Tayta Diosñatacmi nin: “Malcaca nishuśhayquita uyaliycuy jinalla. Amtachu manamá ipanchayalcäśhunqui. Yaꞌactamari ipanchayalcäman mandacünin canäta mana munayninwan.

8Egipto nasyunpïta julamuśhäpïta canancamam ipanchaycamal taytachancunactaña sirbiyalcan. Chaynümi amwanpis lulayalcan.

9Chayurá nipäcuśhuśhayquita uyaliycuy jinalla. Ñatac sumäta anyaycul licaycachiy chay mandacüca imanuypa mandaycälinantapis” nil.

10Chaynu Tayta Dios nishantam mandacüta mañä israelcunäman Samuel niycula:

11“Mañapäcuśhayqui mandacüca caycunactam lulachipäcuśhunqui: Chuliquicunactam gïrrapä puśhaculcanꞌa. Chaymi waquintá ćhulanꞌa carritacunacta puśhananpä, waquinnintá cawallun silläśha pilyananpä, waquincunactá pilyäcunäpä puydïninpä.

12Chaynütacmi waquintá ćhulanꞌa walanga (1,000) pilyäcunap puydïninpä, waquintá picha ćhunca (50) pilyäcunap puydïninpä. Waquincunactá ćhulanꞌa ćhaclaćhu lulananpä, cusichananpä; waquintá ćhulanꞌa armancunacta, gïrrapä carritancunacta lulananpämi.

13Chaynütacmi wamla chuliquicunactapis puśhacunꞌa pirfümicta lulachinanpä, yanucachinanpä, tantacta lulachinanpäpis.

14Jinaman allinnin ćhaclayquicunacta, üba lantayquicunacta, ulïbus lantayquicunactapis chalacuycunꞌam. Jinalculmi yanapänincunap maquinman ćhulaycunꞌa.

15Amcunactapis talpuyniquicunapïtam, üba lantayquicunapïtam ćhuncapïta jucta-cama uycachipäcuśhunqui. Chaycunactam puydï yanapänincunaman, uywaynincunaman uycunꞌa.

16Chaynütacmi uyway nunayquicunactapis, allinnin wäcayquicunactapis, aśhnuyquicunactapis apacunꞌa. Jinalmi quiquinpä lluy lulachicunꞌa.

17Uywayquicunapïpis ćhuncapïta jucta-camam uycälinqui; aśhta quiquiquicunapis uywaynincunam capäcunqui.

18Chay muyunćhu mandacü mañapäcuśhayquipïta awćhupäcuptiquipis Tayta Diosꞌa manañam uyaliycälishunquiñachu” nil.

19Chaynu Samuel niptinpis malcaca mana uyalïtucuyculmi nicuyalcan: “Chayꞌa imapis manam ucamanchicchu. Mandacüniyu caytam munanchic.

20Juc malcacunänümi mandacüniyu cayta munanchic caminaycälimänanpä, gïrraman lipäcuptïpis cusca liycunanpä” nil.

21Chaynu malcaca nishantam Tayta Diosman Samuel willaycula.

22Chaymi Tayta Dios nin: “Munapäcuśhanmannu juc mandacüta ćhulaycapuy” nil.

Niptinmi jinantin nunacunäta Samuel nin: “Canan malcayquita cutipäcuy” nil.