1 Reyes 21 - Old Testament Quechua Wanca（QVW）

Nabotpa üba ćhaclantam Acab pudiracuycun

1Chaypïta caynümi pasala: Jezreel malcaćhümi Nabot nuna yaćhala. Paypa übas lantanmi Samariap mandacünin Acabpa palasyunpa lädunćhu cala.

2Juc muyunćhümi Nabotta Acab nin: “Üba lanta ćhaclayqui palasyüpa lädullanćhu caśhancäta lanticämay, ricäducunacta talpucunäpä. Pudirninta üba lanta allinnintaläćha uśhayqui ütac illayninpi niptiquiꞌa aycapis ćhanin caśhantaćh pägaycuśhayqui” nil.

3Niptinmi Nabot nin: “Papänïpa tücäninta unacpi Tayta Dios libraycallämächun” nil.

4Niptinmi Acab llaquisha, piñäśha palasyunta licula, Jezreel lädu Nabot: “Papänïpa tücäninta unacpi Tayta Dios libraycallämächun” nishanpi. Palasyunman ćhayculmi cämanman ćhaćhacuycula. Pila läduman muyuculculmari micuytapis mana munalachu.

5Chayćhümi walmin Jezabel aśhuycul nin: “¿Imapïmi llaquisha cayanqui? ¿Imapïmi micuytapis mana munanquichu?” nil.

6Niptinmi Acab nin: “Jezreel lädu Nabottam üba ćhaclanta lanticamänanpä ütac pudirninta juc ćhaclacta unäpä nilá. Niptïmi payñatac: ‘Üba ćhacläta yaꞌa manam ucmanchu’ niman” nil.

7Niptinmi walmin Jezabel nin: “¿¡Manachun Israelpa mandacünin cayanqui imatá!? Śhalcuculcul micuy, cushicuy; Jezreel lädu Nabotpa üba ćhaclanta yaꞌami uśhayqui” nil.

8Nilculmi wayapan Acabpa śhutinćhu cartacunacta isquirbiycul sïllunwan sïllaycul Nabot yaćhaśhan malcaćhu yaśhancunaman, puydïnincunaman apachila.

9Chay cartaćhümi niña: “Malcaca ayunapäcunanpä ayachiy. Nabottañatacmi malcap ñawpäninman taycachipäcunqui.

10Paypa puntanmanmi ishcay juyu pasaypi nunacunacta śhaycaycachinqui cuntran caynu nipäcunanpä: ‘Caymi Tayta Diostapis mandacücätapis jalutacuyan’ nil. Nipäcuptinmi Nabotta julalcälil tamshaywan wañülächinqui” nil.

11Chaynu Jezabel cartaćhu nishannüllam Nabot malcap yaśhancuna, puydïnincuna lulapäcula:

12Juc muyun ayünu cananpä ayalcachilmi Nabottapis lluy nunacunäpa ñawpäninman taycachipäcula.

13Chaymanmi ishcay juyu pasaypi nunacunaca ćhaycamul puntanćhu taycacaycälila. Paycunam lluy nunacunap ñawquin cuntran nicuyalcan: “Tayta Diostawan mandacücätam Nabot jalutacülun” nil. Chaynu nipäcuptinmi malcapi waśhaman puśhalcälil tamshaywan wañülächin.

14Chaypïtam Jezabelman willaycachipäcula: “Nabot tamshaywan wañüchishañam cayan” nil.

15Chaynu tamshaywan Nabot wañüchisha caśhanta Jezabel yaćhälulmi Acabta nin: “Üba ćhaclanta lanticuyta mana munaśhüniqui Jezreel lädu Nabot wañucunñam. Canan juclla pasay, ćhaclanta duyñuchacuycunayquipä” nil.

16Chaynu Nabot wañucuśhanta Acab uyalïlul-pacham üba ćhaclanta duyñuchacuycü pasacun.

17Chaymi Tayta Dios Tisbe lädu Eliasta nin:

18“Samariaćhu yaćhä israelcunap mandacünin Acabman wayra liy. Canan üra Nabotpa üba ćhaclanćhümi cayan duyñuchacuycunanpä.

19Paytam ninqui: Tayta Diosmi caynu niyäśhunqui: ‘¿Nabotta wañulcachil ćhaclantapis duyñuchacuycunquilächun canpis? Nabotpa yawarninta allꞌucuna lläwaśhanćhümi ampa yawarniquitapis allꞌucuna lläwapäcunꞌa’ ” nil.

20Niptinmi Acab nin: “Cuntrá, ¿talïmäñämi aw?” nil.

Niptinmi Elias: “Awari, talïlucmi. Mana allincätamá Tayta Diospa ñawquin lulälunqui.

21Chaymi Tayta Dios nin: ‘Mana allintam anman ćhächimuśhä. Amtapis lluy aylluyquicunactapis camacaycüśhämari. Israelćhu lluy-lluy milayniquicunactam masqui sirbï, mana sirbï nuna cacuptinpis camacaycüśhä.

22Piñachimäśhayquipi, israelcunäta juchaman jitaycuśhayquipïmi Nabatpa chulin Jeroboamwan, Ahiaspa chulin Baasawan lulaśhänu aylluyquiwanpis lulaycuśhä’ nil.

23Chaynütacmi Jezabeltapis Tayta Dios caynüta nin: ‘Jezreelpa pilanćhümi Jezabelta allꞌucuna micunꞌa’ nil.2Rey 9.36.

24Malcaćhu wañü aylluyquicunactá allꞌucunam micapäcunꞌa. Ćhaclacunäćhu wañücätañatacmi pälï wisculcuna micapäcunꞌa” nil.

25(Acabnuꞌa manamá mayanpis calachu. Walmin Jezabel umachaptinmari mana allincunallacta Tayta Diospa ñawquin lulayta ćhapala.

26Taytachacunacta alawayninwanmari millachicuy juchacunacta lulala; Amhor läducunäpa lulaśhantanümari lulala. Paycunactamá israelcunäpïta Tayta Dios alapacüla.)

27Chayta uyalïlulmi Acab müdananta laćhyacuyan, shicacücunawan müdaculculmi ayunalapis. Chaynu shicacü müdanacunawanmi puñula; llaquisham pulilapis.

28Chaynüta licalmi Tisbi lädu Eliasta Tayta Dios nin:

29“¿Licayanquichun imanuypa ñawpänïćhu Acab uyshucuycuśhantapis? Chaynu uyshucuycuśhanpïmi pay cawsaśhancama nï mućhuchishäñachu. Chulin mandacuyaptinñatacmi ichá nishämannu mućhuchishä” nil.