Exodo 39 - Old Testament Quechua Wanca（QVW）

Sasirdütip müdanancunactam lulapäcun Exo 28.1-43

1Ñatac Chuya Sityućhu chuya cuartu sasirdüti sirbinanpä müdanancunam lulaśha cala: asulpi, murädupi, pucapi. Chaynütacmi Tayta Dios Moisesta nishannu Aaronpa sumä chuya cä müdanancunapis lulaycuśha cala.

2Chay chalicum cala: ürupi, asulpi, murädupi, pucapi, lïnu cawpüśhapïpis.

3Ñatac üructam papiltanücamacta sinsilwan julülälila. Chaytam shilta-shiltacta cuchülälila. Jinalculmi shimpäla tuqui-tuquicta asulcäwan, muräduwan, pucawan, lïnuwanpis.

4Chay cala chalicunpa tirantin chalalänanpä ishcaynin umruncunaćhümi.

5Chaynütacmi wiyawninman watacunanpäpis ürupïta tuqui luläśha cala. Chay quiquillanpïtacmi watacunpis yalula. Jinaman asul, murädu, puca puchcapïta, chaynütac lïnu cawpuśhapïtam cala. Caynu lulaśha cala Tayta Dios camachishannümari.

6Chaynütacmi onice aläja lumicunäman Israelpa chulincunap śhutinta sïlläśhactanu isquirbila. Chaytam ürupi luläśha chalachicunman ćhulala.

7Jinalculmi chay ishcay lumïta chalicunpa tirantinman ćhulala, Israelpa chulincunacta yalpanapä. Caynu lulala Tayta Dios Moisesta nishanmannümari.

8Chaynütacmi chalicu lulaśhannu pichïruntapis tuqui-tuquicta ürupïta lulala: asulpïta, murädupïta, pucapïta, fïnu lïnupi cawpüśhapïtapis.

9Chay pichïruca cäjanu cuadrädum cala. Tawan lädunmi ishcay ćhunca ishcayniyu (22) cintimitru-cama cala.

10Pichïrup janäninmanmi tawa patac aläja lumicunacta ćhulala. Punta pataccäćhümi sardica, topacio, carbunclo aläjacuna cala.

11Ishcay pataccäćhümi esmeralda, zafiro, diamante aläja lumicuna cala.

12Quimsa pataccäćhüñatacmi jacinto, agata, amatista aläja lumicuna cala.

13Tawa pataccäćhüñatacmi berilio, onice, jaspe aläja lumicuna cala. Lluy caycunapis üruwan luläśha chalachicunman chalächisham capäcula.

14Chay ćhunca ishcayniyu lichcä lumicunämanmi Israelpa ćhunca ishcayniyu chulincunap śhutincuna luläśha cala.

15Chay pichïrup watacuncunacta cawpüśha cadinactanümi ürunllanllanpi lulala.

16Chaynütacmi ishcay linlincunacta, ishcay chalachicuntinta-cama ürupïta lulalcul pichïrup janay lädu ishcay isquinanman ćhulala.

17Jinalcul chay cadinanu cäcunäta pichïrup janay lädu linlincunamanmi chalächila.

18Chay pichïructa chalalänanpä ishcay cadinäpa puntanwanmi watala chalicup umrunćhu cä onice lumicunäpa argüllanman.

19Chaynütacmi cäjanu cä pichïrup ulapay lulï lädunćhu lulala ürupïta argüllancunacta. Chaymi cala quiquin chalicu lädućhu.

20Chaynütacmi ürupïta ishcay argüllacunacta lulala. Chaytam chalicup puntanman ćhulala. Chay cala jiläsha cäcäpa janäninćhu; wiyaw watacup janapascanćhümari.

21Chayurá pichïrup argüllanta chalicüpa argüllanman chalächila asul cadinanu cayäcäwanmi. Chaymi pichïruca chalicup watacunpa janascanćhu quïdala. Chaynüpam mana lluptilachu. Chaynu lulaśha cala Tayta Dios camachishannümari.

22Chaynütacmi ćhawpi sutänanta asulpïta lulala.

23Chay ćhawpi sutänapam ćhawpinćhu ućhcuyu cala uman pasananpä. Chay ućhcunpa muyülïnintam patilcul mana shalshinanpä sumä masïsucta burdäla.

24Ćhawpi sutänap ulapay manyanmanmi walcala granadillanu cä uyluchacunacta. Chay granadillanu cäcunämi asulwan, muräduwan, pucawan, lïnu cawpüśhawanpis luläśha cala.

25Walcaläcunäpä ćhawpincunamanñatacmi ürunllanllanpïta luläśha campanillacunäta walcäla. Chayurá chay jinantin muyülïninćhümi walcala juc campanillacta, atïninmanñatac granadillanu cä uyluchacta.

26Chaynu atinacuyllamari granadillacunaca lluy walcalapäcula sirbinanpä cä müdananćhu. Caynu lulaśha cala Tayta Dios camachishannümi.

27Chaynütacmi fïnu lïnupïta burdäsha jatun sutänanta lulala Aaronpäwan chulincunapä.

28Chaynütacmi chucuntawan watacuncunacta fïnunnin lïnupi lulala. Calsunsilluncunactañatacmi lïnu cawpüśhapi lulala.

29Jinamanmi wiyaw watacunpis luläśha cala: asulpi, murädupi, pucapi, lïnu cawpüśhapïtapis. Caynu lulaśha cala Tayta Dios camachishannümari.

30Chaynütacmi ürunllanllanpïta juc tablachactanu lulala. Chayćhümi sïlläśhactanu isquirbila caynu niyäta: “Tayta Diospä japächäśham” nil.

31Chay tablachactam, asul puchcawan chalächila. Chaymi tablachaca chucunpa puntanćhu cala. Caynu lulaśha cala Tayta Dios camachishannümari.

Tayta Dios nishantanülla Israel caśhtacunaca lulaycälishantam Moises licaycun Exo 35.10-19

32Chaynüpam camacäśha cala chuya carpaca, Tayta Dioswan tincuycunapä cäcä. Caynu Israel caśhtacunaca lulapäcula Tayta Dios Moisesta nishantanüllamari.

33Chaynu lulalculmi Moisespa maquinman ćhulaycälila: chuya carpacta, chuya cuartucta lluy cänintinta, argüllancunacta, lluy paradïruncunacta, apanancunacta, simintuncunacta,

34jinaman pucawan tiñïsha ulu uwishpa utanpi atacuncunacta, sumä fïnunnin utapi atacuncunacta, cuartucta ishcayman laquï curtïnactapis.

35Chaynütacmi limalicuśhan babultapis, bärancunactapis, täpantapis uycula.

36Chaynütacmi mïsactapis lluy cänincunactawan, Tayta Diospä japächaycuśha tantactapis uycula.

37Chaynütacmi ürunllanllanpi cä jatun michïructapis lluy cänintinta, atinacuylla cä michïruchancunactapis, latananpä asaytictapis uycula.

38Chaynütacmi ürupi cä insinsiucta cañaycuna patacta, japächaycunapä cä asayticta, tuqui aśhnä insinsiucta, chaynütac chuya cuartup yaycunanćhu cä curtïnactapis uycula.

39Chaynütacmi brunsipïta uycuna patacta, brunsipïta mällactanu cäninta, bärancunacta, lluy ima cänincunacta, maqui paꞌacunacta täcunantintapis uycula.

40Chaynütacmi chuya carpap patyunpa curtïnancunacta, paradïruncunacta, simintuncunacta, chay patyup puncunpä curtïnanta, watacuncunacta, chuya carpap ishtacancunacta, jinaman chuya carpap lluy cänincunactapis uycula.

41Chaynütacmi chuya cuartućhu sirbinanpä müdanancunacta, sasirdüti Aaronpä sirbinan müdanancunacta, jinaman chulincunap sasirdüti müdanancunactapis uycula.

42 Tayta Dios Moisesta nishantanüllamari Israel caśhtacunaca lluy lulapäcula.

43Moisesñatacmi Tayta Dios nishantanülla lluy lulapäcuśhanta licaycul allin capäcunanpä niycula.