Numeros 4 - Old Testament Quechua Wanca（QVW）

Coat ayllup ima lulaynincuna caśhantam nin

1Chaypïtam Moisestawan Aaronta Tayta Dios nin:

2“Levi ayllucunäpi Coatpa milaynincunacta wasinpi-cama sinsapäcuy.

3Chaynütac quimsa ćhunca watayüpi aśhta picha ćhunca watayü-cama tincuna carpaćhu lulananpä allin cä wayapacunäta sinsapäcunqui.

4“Coatpa milaynincuna tincuna carpap sumä chuyannin sityućhu cäcunäta licaycücunämi capäcunꞌa.

5Juc läduman aśhupäcunan captinꞌa Aaronmi chulincunawan Chuya Sityucta laquï curtïnacta julupäcunꞌa. Chay curtïnäwanmi limalicuśhan babulcäta täpaycapäcunꞌa.

6Janäninmanñatacmi fïnunnin utawan. Jina janäninmanñatacmi murädu lataśhwan täpaycälinꞌa. Chaypïtam apapäcunanpä cä bärancunacta ćhulaycälinꞌa.

7“Tanta ćhulana mïsap jananmanñatacmi murädu curtïnacta lancaycälinꞌa. Chaypa jananmanñatacmi lätucunäta, wishlacunäta, bäsucunäta, järracunäta jićhaywan uycunapä ćhulaycälinꞌa. Chayćhütacmi muyun-muyun uycuna cä tantactapis chayman ćhulaycälinꞌa.

8Lluy caycunap jananmanmi puca lataśhta maśhtaycälinꞌa. Jinaman mïsap lluy jananman fïnu-cama utacunäwan maśhtaycälinꞌa. Jinamanlämi apanapä cä bäracunäta ćhulaycälinꞌa.

9Chaypïta murädu lataśhwanmi täpaycunꞌa jatun michïrüta, puntanćhu walanancunäta, micha cuchucuncunacta, lätuchancunacta, asaytipa lluy sirbichicunancunactapis.

10Chaypïta jatun michïructawan lluy cänincunactam fïnu-cama utawan pitwiycälinꞌa. Jinalculmi apapäcunanpä bäracunätapis ćhulaycälinꞌa.

11“Chaynütacmi asul lataśhwan ürupi cä babulcämanpis täpaycälinꞌa. Jinamanmi fïnunnin utacunäwan maśhtaycälinꞌa. Chaypïlämi apapäcunayquipä cä bäracta ćhulapäcunꞌa.

12“Chay carpaćhu lluy sirbichicunapä cäcunätapis asul lataśhwanmi ipichaycälinꞌa. Jinaman fïnunnin utanwanmi maśhtaycälinꞌa. Chaypïlämi apapäcunayquipä cä bäracta ćhulapäcunꞌa.

13“Chaypïta chay uycunapä patacćhu cä ućhpancunactam julupäcunꞌa. Jinamanmi murädu lataśhwan täpaycälinꞌa.

14Chay patacmanmi lluy sirbichicunancunäta ćhulaycapäcunꞌa: pälanta, tinidurninta, ućhpa ćhulacunta, tasunninta, jinaman lluy ima cänincunactapis. Jinamanmi fïnunnin utacunawan maśhtaycälinꞌa. Jinalculmi apapäcunayquipä cä bäracta ćhulapäcunꞌa.

15“Chaynu Aaronwan chulincuna tincuna carpacta lluy cänintinta ipichayta camacäläliptinlämi Israel caśhtacunaca liyta allaycapäcunꞌa. Chaylämi Coat ayllucunäpis śhapämunꞌa carpacta apapäcunanpä. Ñatac yaꞌallapä japächäśhä cäcunäta manam uchuyllapis yataycapäcunmanchu mana wañupäcunanpä. Chaynütacmi chay carpactapis lluy imancunactapis apapäcunꞌa.

16“Ñatac sasirdüti Aaronpa chulin Eleazarmi licaycunꞌa: jatun michirup asaytinta, mishqui aśhnä insinsiucta, imaypis uycuśhä micuy cäcäta, japächaycunapä cä asaytictapis. Chaynütacmi carpacta, chayćhu lluy chuya cänincunactapis licaycunꞌa” nil.

17Chaypïtam Moisestawan Aaronta Tayta Dios nin:

18“Levitacunäćhu Coat ayllucunaca chincapäcunanta amam munapäcunquichu.

19Paycuna chay chuya sirbichicunapä cäcunäman aśhuycapäcul mana wañupäcunanpä Aaronwan chulinmi niycunꞌa: imacunacta apapäcunanpäpis, lulapäcunanpäpis.

20Coat ayllucunaca manam yaycapämunꞌachu chay chuya sirbichicunapä cäcunäta licaycapäcüllapis. Chaynu licälälilꞌa wañülälinꞌam” nil.

Gerson ayllup ima lulaynincuna caśhantam nin

21Chaypïtam Moisestawan Aaronta Tayta Dios nin:

22“Gerson ayllucunäta milayninpi-cama, wasinpi-cama ayca capäcuśhantapis sinsapäcuy.

23Tincuna carpaćhu sirbipäcunanpä allinninta aclaycuy quimsa ćhunca watayüpïta aśhta picha ćhunca watayü-camacta.

24“Gerson ayllucunäpä lulaynincuna apaycämi canꞌa.

25Chayurá apapäcunꞌa: tincuna carpap curtïnancunacta, Chuya Sityucta, tïlapi atacucunacta, chaypa jananćhu cä fïnunnin utacunäta, Chuya Sityup puncunćhu cä curtïnancunacta,

26patyup curtïnancunacta, carpap puncunpa curtïnanta, lluy watuncunactapis, jinaman lluy sirbichiculcänancunactapis. Chaycunam lulaynin canꞌa.

27Ñatac Aaronwan chulincunam Gerson ayllucunäwan imacta lulapäcunanpäpis apapäcunanpäpis camachinaculcäla. Paycunam lluy apapäcuśhancunaćhu niycälinan capäcula.

28Caycunamari Gerson ayllucunap lluy lulaynincuna tincuna carpaćhu canꞌa. Sasirdüti Aaronpa chulin Itamarpa caminaycuśham lluy lulaycälinꞌa.

Merari ayllup ima lulaynincuna caśhantam nin

29“Merari ayllucunäta milayninpi-cama, wasinpi-cama ayca capäcuśhantapis sinsapäcuy.

30Tincuna carpaćhu sirbipäcunanpä allinninta aclapäcuy quimsa ćhunca watayüpïta aśhta picha ćhunca watayü-cama.

31Paycunap lulaynincunam tincuna carpacta apaycaćhay canꞌa: carpap paradïruncunacta, bärancunactapis, pustincunacta, simintuncunacta,

32patyup pustincunacta, simintuncunacta, ishtacancunacta, watuncunacta, jinaman lluy sirbichiculcänancunactapis. Paycunactam niycunqui imacunacta apapäcunanpä caśhantapis.

33Caycunamari Merari ayllucunap lulaynincuna tincuna carpaćhu caycunꞌa. Ñatac sasirdüti Aaronpa chulin Itamarmi licaycüninca canꞌa” nil.

Coat aylluctam sinsan

34Chaymi Coat ayllucuna ayca capäcuśhantapis Moiseswan Aaron malcap puydïnincunawan sinsapäcula wasinpi-cama, milayninpi-cama.

35Aclapäcula tincuna carpaćhu sirbiyta atipäcunätam quimsa ćhunca (30) watayüpïta aśhta picha ćhunca (50) watayü-cama.

36Lluy ayllunpi-cama sinsaptinmi ishcay walanga aćhish paćhac picha ćhunca (2,750) nunacuna capäcula.

37Caycunamari tincuna carpaćhu lluy Coat sirbïcunaca capäcula Tayta Dios nishanmannu Moiseswan Aaron sinsapäcuśhancunaca.

Gerson aylluctam sinsan

38Gerson ayllucunactam sinsapäcula milayninpi-cama, wasinpi-cama ayca capäcuśhantapis yaćhapäcunanpä.

39Aclapäcula tincuna carpaćhu sirbinanpä atipä wayapactam quimsa ćhunca (30) watayüpïta aśhta picha ćhunca (50) watayü-cama.

40Lluy capäcula ishcay walanga süta paćhac quimsa ćhunca (2,630) nunacunam.

41Cay Gerson ayllucunämari tincuna carpaćhu lluy sirbïcunaca capäcula Tayta Dios nishanmannu Moiseswan Aaron sinsapäcuśhancunaca.

Merari aylluctam sinsan

42Merari ayllucunactam sinsapäcula milayninpi-cama, wasinpi-cama ayca capäcuśhantapis yaćhapäcunanpä.

43Aclapäcula tincuna carpaćhu sirbiyta atipäcunätam, quimsa ćhunca (30) watayüpïta aśhta picha ćhunca (50) watayü-cama.

44Lluy capäcula quimsa walanga ishcay paćhac (3,200) nunacunam.

45Paycunamari tincuna carpaćhu lluy sirbïcunaca Merari ayllup ayllunpa-cama capäcula Tayta Dios nishanmannu Moiseswan Aaron sinsapäcuśhancunaca.

46Chayurá Moiseswan Aaron jinaman Israelpa puydïnincunam sinsapäcula lluy levitacunäta milayninpi-cama, wasinpi-cama ayca capäcuśhantapis yaćhapäcunanpä.

47Sirbiyta atipäcunätam aclapäcula quimsa ćhunca watayüpïta aśhta picha ćhunca watayü-cama tincuna carpaćhu sirbipäcunanpäpis, chaynütac apapäcunanpäpis.

48Lluy sinsapäcuśhanmi ćhalälin pusä walanga picha paćhac pusä ćhunca (8,580) nunacunaman.

49Moisespacamam Tayta Dios lluytapis imacta lulapäcunanpäpis, imacunacta apapäcunanpäpis niycula.

Chaynu Tayta Dios Moisesman nishanmannümi lluy sinsaśha capäcula.