1 Cronicas 16 - Old Testament Quechua Wanca（QVW）

1Chaynüpa Tayta Diospa babulninta apalcälimulmi, David lulachishan carpacta alistaycälil ćhawpinman ćhulaycapäcula. Jinalculmi Tayta Diosman cañaywan David uycula, jinaman allin cawsaśhanpïpis uyculatacmi.

2Chaynu David cañaywan uycul jinaman allin cawsaśhanpïpis uyculmi jinantin malcaca allin caycälinanpä Tayta Diospa śhutinćhu niycula.

3Jinalculmi lluy israelcunäta wayapactapis walmictapis juc tantacta, partin aychacta, päsas culpachäśhactapis aypuycula.

4Chaypïtam David ćhulaycula waquin levitacunäta Tayta Diospa babulnin caśhancäćhu mañaculcänanpä, sulpäta uycunanpä, jinaman israelcunäpa Tayta Diosninta alawaycälinanpäpis.

5Paycunap puydïninmi Asaf cala. Atimünincunañatacmi: Zacarias, Jeiel, Semiramot, Jehiel, Matatias, Eliab, Benaia, Obed-edom, Jeielpis capäcula. Paycunam quïnacunacta, jatućhä-uchuchä arpacunacta tucapäcula. Asafñatacmi latillucta tucala.

6Sasirdüti Benaiawan Jahazielñatacmi Tayta Diospa limalicuśhan babulninpa ñawpäninćhu curnitillacta imaypis tucapäcula.

Sulpäta ucuyninwanmi David taquin Sal 105.1-15; 96.1-13; 106.1, 47-48

7Chay muyunllam Asaf, jinaman yanapänincunapis Tayta Diosta cay taquiwan alawapäcunanpä David nin:

8“Tayta Diosta sulpäta uycuśhun;

śhutinta altuman juluycuśhun.

Sumä lulaynincunapïta jinantin malcacunäćhu willacuśhun.

9Alawapäcuy; taquicunawanꞌari alawapäcuy;

sumä-cama lulaynincunapïta willaculcay.

10Sumä chuya śhutinta lisishayquipïtari alawaculcay;

Tayta Diosta ashïcuna llapan śhunꞌuyquiwan cushiculcay.

11 Tayta Diostawan munaynintari ashiycäliy;

payllactari imaypis ashiycäliy.

12Milagrucunacta, äśhalayllaman camana lulaśhancunacta yalpalcäliy.

Tincüninman licaycuynincunacta yalpalcäliy

13nunan Israelpa milaynincuna,

Jacobpa aclacuśhan chulincuna.

14“Tayta Diosmi Diosninchic;

jinantin allpäćhümá tincüninman cäraycun.

15Limalicuśhancäta imaypis yalpalayanmá;

walanganpi milaycuna pasaptinpis manamá unꞌaycunchu.

16Abrahamman limalicuśhanta,

Isaacman tacyalpachishanta yalpalayanmari.

17Jacobwanmi camachicuynincunacta tacyalpachila;

wiña-wiñaypä limalicuynin cananpä israelwanmari caynu tacyalpachila.

18Chaymi nila: ‘Canaan nishan allpactam uycuśhayqui;

tücäniquipämá uycuśhayqui’ nil.

19“Paycuna masqui ashllaylla cayalcaptinpis,

purinquichunu cayalcaptinpis,

20malcan-malcan pulicü cayalcaptinpis,

mandacünin-mandacünin pasayalcaptinpis,

21mayanllan ñacachinallantapis manamá cunsintiyculachu.

Aśhwanpam paycunacta cuyayninwan mandacücunäta anyapaycula:

22‘Japächaśhäcunäta amam tupaycapäcunquichu;

willacünïcunacta amamá imanaycullanquipischu’ nil.

23“Jinantin pachäćhu cä nunacuna Tayta Diosta alawapäcuy;

salbaycapäcuśhuśhayquipi muyun-muyun willaculcay.

24Sumä cayninpïta nasyuncunäćhu willaculcay;

sumä allin lulaycuśhancunäpi malcacunäćhu willaculcay.

25 Tayta Diosꞌa sumä jatunmá; maynu alawaycunamá.

Payꞌa lluy diostucücunäpa manchayninmá.

26Lluy malcacunäpa diosnincuna taytachacunallamá;

Tayta Diosñatacmi ichá sïlütapis luläca.

27Pay caśhancäćhuꞌa sumä cayninmi chipipicyayan;

pay yaćhaśhancäćhuꞌa sumä munayninwan

sumä tuqui caynin juntamá cayan.

28“Jinantin allpäćhu ayllucuna Tayta Dios caśhanta tantiaycäliyꞌari;

sumä munayninpïta, sumä cayninpïta Tayta Diosta altuman julaycäliy.

29 Tayta Diosta tincüninmannuꞌari altuman julaycäliy.

Uycunayquicunawan payman aśhuycapämuy.

Chuya sumä wasinćhu Tayta Diosta alawaycäliy.

30Jinantin pachäćhu cäcunaca paypa ñawpäninćhuꞌari chucchupäcuchun.

Paymari jinantin pachäta tacyachila mana cuyunanpä.

31Janay pachäpis cay pachäpis cushiculcächun.

Jinantin nasyuncunäćhu cäcunäpis

‘Tayta Diosmi gubirnäca’ nipäcuchun.

32Lamarcäpis lluy cänintin apalipäcuchun.

Ćhaclacunäpis lluy cänintin cushiculcächun.

33Jinantin pachäta cäraycunanpä śhamü,

Tayta Diospa ñawpäninćhu munticunäćhu,

lantacunaca cushicuypi taquipäcuchun.

34“Tayta Dios sumä allin caśhanpïta alawapäcuy.

Paypa llaquipäcuynin wiña-wiñaypämari.

35Lluy nipäcuy: ‘Salbacü Tayta Diosllay, salbaycälillämay.

Nasyuncunäpa maquinpïta libraycul juntuycälillämay,

śhutiquita alawapäcunäpä,

cushisha altuman julaycälinacpä’ nil.

36Israelcunäpa Tayta Diosnin,

wiña-wiñaypä alawäśha cachun” nil.

Niptinmi jinantin malcaca: “Chaynu cachun” nil Tayta Diosta alawapäcula.

37Chaypïta Davidmi ćhulaycula Asaftawan wawꞌi-caśhancunacta, Tayta Diospa limalicuśhan babulninpa ñawpäninćhu, lulaypä cäcunäta muyun-muyun lulapäcunanpä.

38Puncucta täpäninpäñatacmi ćhulaycula Obed-edomta, süta ćhunca pusäniyu (68) lulawshï-masincunacta, Jedutunpa chulin Obed-edomta, jinaman Hosantapis.

39Gabaonćhu cä Tayta Diospa carpanćhu cananpäñatacmi ćhulaycula sasirdüti Sadocta lluy sasirdüti-masincunactawan.

40Paycunamari Israelman camachishanmannu, wälanpapis tardinpapis uycuna patacćhu, Tayta Diospa cañaywan imaypis uycapäcü cala.

41Chaynütacmi śhutinpa-cama aclaśhancunäta ćhulaycula, wiñay simpri llaquipayniyu caśhanpi Tayta Diosta alawapäcunanpä. Paycunawan cuscactatacmi Hemantawan Jedutuntapis ćhulaycula.

42Paycunamari curnitillancunawan, latilluncunawan, juc tucanacunawanpis Tayta Diosta alawapäcuśhancunaćhu taquiwshipäcula. Jedutunpa chulincunañatacmi puncu täpäcuna capäcula.

43Chaypïtam lluy nunacunaca wasinta-cama liculcäla. Davidpis wasinta cuticula aylluncunacta allin caycälinanpä niycümi.